«Jany schapili mianie ŭ dzień niaščaścia majho». Źmicier Daškievič prabyŭ paŭhoda ŭ bietonnaj kletcy

Źmicier prabyŭ u Žodzinie paŭhoda ŭ bietonnaj kletcy. Uvieś čas u karcary: ad lipienia i da studzienia. Ciapier jaho pieraviali znoŭ u Navasady. Tudy ž, dzie jamu zaviali kryminalnuju spravu. Ciapier jon znoŭ u šyza, dzie skardzicca na dziki choład. Kaža, što jamu prychodzicca pa 8 razoŭ za noč ustavać na zaradku, kab sahrecca. A za heta jamu składajuć raparty, što jon nie lažyć paśla adboju. Ja nie mahu zrazumieć, čamu prosta źniavoleńnia nie dastatkova? Čamu jon nie moža adbyć svoj termin i viarnucca damoŭ da svaich dziaciej? Da svajoj pracy i svajoj siamji?

Zadušša. Voś što ja adčuvaju ad dumki, što moj kachany čałaviek prachodzić praz hvałt, a z hetym ničoha niemahčyma zrabić. Ja nie viedaju, jak davać rady ŭsim pobytavym pytańniam i 4-m dzieciam bieź jaho, jak rabić usie damašnija zadańni dziaciej, rabić pracu, davać rady kružkam i barščam, kali ja viedaju, što moj muž trasiecca ad choładu ŭ navasadaŭskaj kamiery. Ja tak i nie navučyłasia z hetym žyć. Ja bajusia za jahonaje žyćcio i jahonaje zdaroŭje. I adzinaje, ab čym malu, heta ab palohcy dla jaho. Ja chaču, kab tata maich dziaciej viarnuŭsia dachaty žyvym i zdarovym.

Jašče raniej jon pisaŭ mnie vieršy, jakimi zaraz chaču padzialicca. Braŭ natchnieńnie z Knihi Psalmaŭ i ź inšych uryŭkaŭ Piśma. Hety vierš napisany pavodle psalmaŭ 18, 14, 5, 127. Va ŭsioj hetaj lubovi — uvieś Źmicier. I mnie tak baluča ad taho, što heta luboŭ nie dastajecca ciapier jahonym dzieciam.

Jany schapili mianie ŭ dzień niaščaścia majho

Jany schapili mianie 
Ŭ dzień niaščaścia majho,
Kali irvaŭsia k tabie
Ja z pałonu svajho.

Ale Hospad mnie byŭ
U niadoli padporaj.
I na volnuju vyvieŭ 
Mianie Jon prastoru. 

Ščyt zbaŭleńnia mnie daŭ,
Umacavaŭ uva śnie.
I łaskavaść Jaho
Pamnažała mianie.

I choć topčuć mianie,
Vorah u dušu pluje, 
Na zmahańnie Chrystos 
Za mianie paŭstaje.

Usio mahu ŭ Chryście,
Ja ŭ Zbaŭcy maim,
Ja prajdu ŭvieś šlach
Razam z Boham Śviatym.

Tolki vieru maju
Zachavaj, Boža Moj. 
I tady na mury 
Uzydu ja z Taboj.

Tolki žonačku Ty, 
Duch Śviaty, aśviaci,
Kab luboŭju jana 
Usio zdaleła ŭ žyćci. 

Tolki dzietak maich
Tata moj, abdymi
I dałońkaj Svajoj
Da Siabie prytuli.

Uźviesialimsia tady 
U tvaim ratavańni,
Kali viernieš ty naš
Pałon na śvitańni.

I na dośvitku budu
Vyhladać Ciabie ja, 
Chrysta rankam prasłavić
Usia naša siamja.

Źmitra Daškieviča zatrymali ŭ krasaviku 2022 hoda. Razam z žonkaj Nastaj jaho abvinavacili va ŭdziele ŭ akcyi pratestu 23 žniŭnia 2020 hoda. 14 lipienia 2022 hoda Źmitru pryznačyli 1,5 hoda kałonii, a Naście — 3 hady «chatniaj chimii».

Adnak u lipieni 2023 hoda Źmicier na volu nie vyjšaŭ. Jaho pakinuli za kratami nibyta za złosnaje niepadparadkavańnie patrabavańniam administracyi kałonii. U vieraśni Źmitru Daškieviču dadali hod strohaha režymu. 

• 5
• 0
• 2
• 3
• 3
• 56
• 111
• 0