Minski ofis hihanta telemiedycyny całkam pieravieźli ŭ Varšavu
Amierykanskaja Teladoc Health skaraciła častku kamandy ŭ ZŠA i inšych łakacyjach. Pad zvalnieńnie trapili i biełaruskija śpiecyjalisty, jakija letaś pierajechali ŭ polski ofis Teladoc Health.
Pavodle infarmacyi devby, pad skaračeńnie trapili kala 100 čałaviek u ZŠA i jašče kala 50 u inšych łakacyjach, u Polščy taksama.
«Zvalniali vypadkovym čynam, u tym liku i niekatorych biełarusaŭ, jakija letaś pierajechali ŭ ofis u Varšavie. Zvalnieńniaŭ kampanija nijak nie kamientavała, ale, mabyć, heta było źviazana z aptymizacyjaj vydatkaŭ», — raspaviała devby krynica ŭ kampanii.
U studzieni 2023 u Teladoc Health taksama prajšła chvala skaračeńniaŭ. Vykanaŭčy dyrektar Džejsan Harevič u liście supracoŭnikam tady patłumačyŭ, što heta źviazana ź nieabchodnaściu pamienšyć vydatki. Pracy pazbavilisia kala 300 čałaviek. U toj raz zvalnieńni nie zakranuli tady jašče minski ofis, jaki na toj momant pracavaŭ, raspaviała krynica.
— U Polščy nievialiki ofis, na pačatak hoda ŭ štacie naličvałasia blizu 50 supracoŭnikaŭ. Skaračeńni zakranuli kala 10% śpiecyjalistaŭ, usie ź Biełarusi. Zvalniali adnym zvankom (pa amierykanskim scenary), ź niekatorymi navat nie źviazvalisia, prosta zakryli dostup, — raspaviadaje eks-supracoŭnik.
Pa słovach surazmoŭcaŭ, usim, jakija trapili pad skaračeńnie, prapanavali zvolnicca pa pahadnieńni bakoŭ. Kali supracoŭnik admaŭlaŭsia ad prapanavanych umoŭ, jaho zvalniali pa skaračeńni štata.
— Druhi varyjant lepš, bo niejki čas ty praciahvaješ ličycca supracoŭnikam kampanii, a ŭ hety čas možna šukać novuju pracu. Z punktu hledžańnia polskaha prava ty jašče pracuješ, što vielmi darečy, kali, naprykład, atrymlivaješ DNŽ abo inšyja nieabchodnyja dakumienty, — adznačyŭ adzin z surazmoŭcaŭ.
Teladoc Health — adna z najbujniejšych u śviecie kampanij u halinie telemiedycyny i pasłuh dystancyjnaj achovy zdaroŭja. Hłabalny štat naličvaje bolš za 4,5 tysiač supracoŭnikaŭ. U minskim ofisie na piku pracavała 60 supracoŭnikaŭ.
Pieršapačatkova biełaruski ofis naležaŭ inšaj kampanii — padraździaleńniu InTouch Health — raspracoŭniku IT-rašeńniaŭ dla balnic i sistem achovy zdaroŭja. Ale ŭ studzieni 2020 hoda kampaniju za 600 młn dalaraŭ kupiła Teladoc Health (uhodu zakryli ŭ lipieni). Uletku taho ž hoda Teladoc Health kupiła svajho kankurenta Livongo za 18,5 miljarda dalaraŭ. Livongo śpiecyjalizujecca na raspracoŭcy anłajn-servisaŭ dla pacyjentaŭ z chraničnymi zachvorvańniami.
U Biełarusi ŭ Teladoc Health było jurydyčnaja asoba TAA «Ajciejč Deviełapmient». Kampanija była zarehistravanaja ŭ sakaviku 2019 hoda, a vosieńniu 2020 hoda stała rezidentam PVT. Minski ofis zajmaŭsia raspracoŭkaj i ŭdaskanaleńniem płatformy SOLO-rašeńni ŭ śfiery telemiedycyny.
Jak raspaviali devby eks-supracoŭniki Teladoc Health, paśla padziej 2020 hoda častka kamandy źjechała z krainy i praciahvała pracavać dystancyjna ź inšych łakacyj. Uletku 2021 hoda Teladoc Health zarehistravała kampaniju ŭ Polščy — TDH Development.
U 2022 hodzie paśla pačatku vajny va Ukrainie častka supracoŭnikaŭ źjechała ŭ inšyja łakacyi, u pryvatnaści, u Hruziju i Polšču. Kampanija finansava dapamahała ź pierajezdam.
A ŭžo letam minułaha hoda prapanavała pierajechać u Polšču ŭsim supracoŭnikam minskaj kamandy. Na toj momant u minskim ofisie pracavała kala 40 čałaviek. Častka supracoŭnikaŭ ad pierajezdu admoviłasia.
— Byŭ vybar — zastacca ŭ Biełarusi i znajści pracu abo kidać usio tut i jechać u Polšču. I mnohija vyrašyli zastacca, — raspavioŭ adzin z eks-supracoŭnikaŭ kampanii.
Usim, chto pahadziŭsia na pierajezd, kampanija vypłaciła adnarazovuju finansavuju dapamohu 2500 dalaraŭ i dapamahła ź vizami. Taksama supracoŭnikam pierahledzieli zarobak, kab kampiensavać rost padatkaŭ u Polščy.
Z kanca lipienia 2023 hoda jurydyčnaja asoba Teladoc Health u Biełarusi znachodzicca ŭ likvidacyi.
***
Teladoc Health — transnacyjanalnaja kampanija, śpiecyjalizujecca na telemiedycynie i virtualnaj achovie zdaroŭja, zasnavana ŭ ZŠA.
Asnoŭnym praduktam źjaŭlajucca pasłuhi dystancyjnaj achovy zdaroŭja, miedycynskija zaklučeńni, analityka, a taksama pasłuhi licenzavanaj płatformy. U pryvatnaści, Teladoc Health vykarystoŭvaje prahramnaje zabieśpiačeńnie dla telefonnych i videakanfierencyj, a taksama mabilnyja dadatki dla pradastaŭleńnia dystancyjnaj miedycynskaj dapamohi. Akcyi Teladoc Health kacirujucca na biržy.
Kamientary