Čamu Ukraina nie atakavała Biełaruś u adkaz na zapuski rakiet i navošta «addaje naležnaje» Łukašenku

Malar patłumačyła, čamu ŭ adkaz na zapuski rasijskich rakiet z terytoryi Biełarusi Ukraina nie atakavała našaj krainy.

«Z 2014 hoda Ukraina demanstruje prytrymlivańnie praviłaŭ i zvyčajaŭ vajny, u adroźnieńnie ad Rasii.

My nie celimsia na terytoryi inšych dziaržavaŭ. Ukraina ažyćciaŭlaje ŭdary pa našych časova akupavanych terytoryjach i vajskovych abjektach na terytoryi voraha.

Ciapier havorki pra heta nie idzie. Tut tonkaje pytańnie, u jakim statusie znachodzicca vaša kraina ŭ hetaj vajnie. Niepasredna vojski Biełarusi nie vajujuć. Ale ci ŭdzielnica jana taho, što adbyvajecca? Ja vykazvaju svoj asabisty prafiesijny punkt hledžańnia jak juryst. Ja liču, što Biełaruś stała datyčnaj da vajny z taho momantu, jak śviadoma dała svaju terytoryju dla zapusku rakiet. U kryminalnym pravie jość takoje paniaćcie, jak suŭdzieł. Ukraina jak dziaržava hetaha pytańnia nie stavić, my ciapier nie havorym pra aficyjnuju pazicyju, tolki pryvatnuju — ź jurydyčnaha punkta hledžańnia».

Byłaja namieśnica ministra abarony kaža, što ni razu nie čuła, kab ukrainskim vojskam abmiarkoŭvalisia varyjanty ataki pa terytoryi Biełarusi.

«Vy musicie razumieć, što vajennaja infarmacyja ŭ nas zakrytaja. Jość apieracyi, pra jakija moža viedać usiaho niekalki čałaviek. Ale ni razu navat žartaŭ takich nie było».

Malar prakamientavała taksama słovy kiraŭnika HUR Kiryły Budanava i kiraŭnika frakcyi «Słuha naroda» Davida Arachamii pra toje, što Łukašenka nie dapuściŭ uvarvańnia biełaruskaha vojska va Ukrainu, «trymaje słova» i «treba addać jamu naležnaje».

«Sapraŭdy, biełaruskija vojski nie ŭdzielničajuć ciapier u vajnie, vykarystoŭvajecca terytoryja Biełarusi. Nakolki mnie viadoma, biełarusy i sami nie chočuć udzielničać u hetym. My pavinnyja addać naležnaje narodu i my nie pavinny svaimi dziejańniami zrabić dla jaho horš, bo heta davoli śmiełaja pazicyja — biełarusy žyvuć u dyktatarskaj krainie.

Tamu zajavy nakont biełaruskaha naroda absalutna abjektyŭnyja. Što da biełaruskaj ułady, vy musicie razumieć, što farmujecca peŭnaja źniešniaja palityka Ukrainy ŭ dačynieńni da tych ci inšych dziaržavaŭ. Nie Minabarony hetuju palityku vyznačaje, a prezident, jaho Ofis i MZS. Jak jany vyrašajuć, tak hetaja palityka i viadziecca».

Jana miarkuje, što ŭkrainskija ŭłady sprabujuć pakinuć Biełarusi luft na vybar u svaich dziejańniach.

• 29
• 0
• 6
• 11
• 3
• 6
• 19
• 0