Ź Ivacevickaj kałonii vyzvaliŭsia viadomy biełaruski «złodziej u zakonie»

Jak paviedamlaje rasijskaje infarmacyjnaje ahienctva «Prajm Krajm», jakoje śpiecyjalizujecca na kryminalnaj tematycy, z kałonii Halejeŭ źjechaŭ u Mahiloŭskuju vobłaść da miesca pražyvańnia svajoj žonki.

Raniej pra jaho siamiejnaje stanovišča ničoha nie było viadoma, mahčyma, šlubam jon pabraŭsia ŭ miescach pazbaŭleńnia voli.

Dźmitryj Halejeŭ — uradženiec vioski Stańkava Minskaj vobłaści, raniej nieadnarazova sudzimy.

Da niadaŭniaha času Halejeva nazyvali adzinym «zakońnikam»-doŭhažycharom biełaruskaha pachodžańnia: jaho «karanavali» ŭ 23 hady ŭ 1998 hodzie.

Biełaruskaja milicyja źbirałasia aryštavać Halejeva z 2005 hoda, kab pryciahnuć jaho da kryminalnaj adkaznaści za vymahalnictva. Pavodle źviestak MUS, Halejeŭ sa zmoŭščykami ŭ 2003 hodzie vymahali ŭ pradprymalnika z Žodzina 18 tysiač dalaraŭ. Ale doŭhi čas ničoha ź im zrabić nie ŭdavałasia, bo jon znachodziŭsia za miežami Biełarusi — spačatku ŭ Rasii, a paśla ŭ Šviecyi. 

U Šviecyi Halejeŭ całkam paśpiachova zajmaŭsia biznesam — byŭ bienieficyjaram sietki restaranaŭ, ale i z kryminalnym žyćciom nie zaviazvaŭ. Urešcie ŭ sakaviku 2013 hoda jon byŭ zatrymany palicyjaj i ŭ toj ža dzień departavany sa Šviecyi za parušeńnie mihracyjnaha zakanadaŭstva. Adrazu kala trapa samalota ŭ Minskim aeraporcie jaho i aryštavali.

Praces pa spravie Halejeva prachodziŭ u sudzie Zavodskaha rajona Minska pad uzmocnienaj achovaj i ŭ zakrytym režymie. Na im Halejeŭ admaŭlaŭsia pryznavać siabie hramadzianinam Biełarusi i śćviardžaŭ, što maje budyjskaje imia, jakoje daŭ jamu ŭ 2010 hodzie «pradstaŭnik tavarystva «Ruch žyvoha Budy».

Pavialičyć

13 sakavika 2014 hoda sud pryznaŭ Dźmitryja Halejeva vinavatym u vymahalnictvie pa spravie 10-hadovaj daŭniny i prysudziŭ jaho da pazbaŭleńnia voli na 11 hadoŭ u kałonii strohaha režymu z kanfiskacyjaj majomaści. Paśla pa amnistyi termin pakarańnia jamu pamienšyli na hod.

Častku pakarańnia «złodziej u zakonie» adbyvaŭ u PK-9 u Horkach, paśla dasiedžvaŭ u PK-11 u Vaŭkavysku i narešcie ŭ Ivacevičach. U 2017 hodzie jamu dadali 1 hod i 11 miesiacaŭ za złosnaje niepadparadkavańnie patrabavańniam administracyi papraŭčaj ustanovy. Dla Halejeva heta była ŭžo piataja sudzimaść.

Uvieś pryznačany termin «złodziej u zakonie» nie dasiadzieŭ, pa źviestkach «Prajm Krajm», hod jamu «skaścili» pa čarhovaj amnistyi.

• 3
• 0
• 6
• 13
• 8
• 6
• 8
• 0