Homielskamu žurnalistu Andreju Tołčynu staviać u vinu ŭdzieł u ekstremisckim farmavańni

Homielskaha žurnalista vinavaciać nie ŭ naniasieńni škody nacyjanalnaj biaśpiecy, jak mierkavałasia raniej, a ŭ ekstremiźmie pavodle artykuła 361-1 Kryminalnaha kodeksa RB. Heta — «Stvareńnie ekstremisckaha farmavańnia albo ŭdzieł u im», piša BAŽ.

Jakija kankretna fakty staviacca ŭ vinu Andreju Tołčynu, dahetul nieviadoma, pakolki abvinavačańnie trymajecca ŭ tajamnicy. U listach na volu z pryčyny turemnaj cenzury napisać pra heta adkryta viazień nie moža.

U Tołčyna źjaviłasia advakatka, ale jana taksama abmiežavanaja padpiskaj pra nierazhałošvańnie tajamnicy śledstva.

Siabry i svajaki ŭžo pieradali jamu ŭ śledčy izalatar charčovyja pieradačy, srodki hihijeny i ciopłyja rečy.

64-hadovy žurnalist pakutuje na hipiertaniju, maje prablemy z nahami.

Biełaruskaja pravaabarončaja supolnaść pryznała videaapieratara Andreja Tołčyna palityčnym viaźniem.

Tołčyna zatrymali siłaviki sioleta 23 vieraśnia. Na nastupny dzień paśla zatrymańnia ŭ kvatery, dzie jon žyŭ z žonkaj, praviali pieratrus. Śledčyja zabrali kampjutarnuju techniku dy inšyja ličbavyja nośbity.

Andrej Tołčyn u demakratyčnym asiarodku Homiela staŭ zaŭvažnaj asobaj jašče ŭ 90-ch hadach, kali Biełaruś zdabyvała svaju niezaležnaść. Pracavaŭ tady naładčykam aparatury na radyjozavodzie «Pramień». Udzielničaŭ u niezaležnym prafsajuznym ruchu, jaki vystupaŭ za abaronu pravoŭ rabočych. Na demakratyčnaj asnovie abiraŭsia deputatam Homielskaha haradskoha savieta 21-ha sklikańnia — heta akurat toj saviet, adzin z dvuch u Biełarusi, jaki ŭ žniŭni 1991 hoda adkryta vystupiŭ suprać kamunistyčnaha dziaržaŭnaha pieravarotu ŭ Maskvie i vitaŭ abviaščeńnie niezaležnaści Respubliki Biełaruś.

U harsaviecie Andrej uvachodziŭ u kamisiju pa suviaziach z hramadskaściu i ŚMI. Byŭ siabram źlikvidavanaj ciapier uładami Abjadnanaj hramadzianskaj partyi, praciahły čas ačolvaŭ haradskuju arhanizacyju hetaj partyi. Apiekavaŭsia dziejnaściu demakratyčnych dabračynnych fondaŭ. Źviedaŭ taksama i biespracoŭje.

Paśla vybaraŭ 2010 hoda Tołčyn u jakaści videaapieratara-fryłansiera supracoŭničaŭ ź niezaležnymi miedyjaresursami. Za žurnalisckuju pracu Andreja Tołčyna šmat razoŭ štrafavali i navat adpraŭlali «na sutki» za kraty na padstavie administracyjnych pratakołaŭ, jakija składała milicyja, bo ŭ videaapieratara-fryłansiera nie było akredytacyi ŭ biełaruskim Ministerstvie zamiežnych spraŭ.

U 2020 hodzie Tołčyna zatrymlivali razam z žurnalistkaj Łarysaj Ščyrakovaj za aśviatleńnie pratestaŭ, aficyjna — nibyta za ŭdzieł u masavych biesparadkach. Taksama žurnalista zatrymlivali ŭ 2021 hodzie kala homielskaha SIZA-3, dzie jon zdymaŭ svajakoŭ palitviaźniaŭ Mikałaja Statkieviča i Ihara Łosika, jakich razam ź inšymi abvinavačanymi 24 červienia pačali sudzić u pamiaškańni izalatara. Sud prachodziŭ u zakrytym režymie, palitviaźniaŭ abvinavačvali ŭ arhanizacyi masavych biesparadkaŭ, raspalvańni varažniečy i pieraškodzie dziejnaści CVK. Tady spadar Tołčyn zapisvaŭ i kamientar adnaho z dypłamataŭ Jeŭrasajuza, jakija pryjechali ŭ Homiel na sud. Usie videazapisy ŭ fryłansiera zabrała milicyja.

***

Padtrymajcie źniavolenaha žurnalista listami, paštoŭkami ci telehramaj. Taksama možna zrabić hrašovy pieravod.

Pišycie na adras: SIZA № 3, 246003, h. Homiel, vuł. Knižnaja, 1. Tołčyn Andrej Mikałajevič.

• 0
• 0
• 0
• 2
• 0
• 1
• 2
• 0