Kampanija z rasiejskimi karaniami vykarystoŭvaje ChatGPT, kab špijonić za karystalnikami ŭ sacsietkach
Techničnaja kampanija, jakaja zajmajecca razrobkaj pryład sačeńnia ŭ internecie, pieratvaryła čat-bot u instrumient adsočvańnia nastrojaŭ. Meta — vyjavić uźnikajučyja pratestavyja ruchi i pryvieści ŭ hatoŭnaść adpaviednyja orhany.
Nikoli takoha nie było — i voś iznoŭ. Najnoŭšyja technałohii pačali vykarystoŭvacca dla sačeńnia za ludźmi. Hetym razam sprava dajšła da pryład na bazie ŠI. Tak, vydańnie Forbes niekalki dzion tamu paviedamiła, što kampanija pad nazvaj Social Links pačała vykarystoŭvać ChatGPT dla praviadzieńnia analizu nastrojaŭ, z dapamohaj jakoha tak zvanyja śpiecsłužby źbirajuć i analizujuć danyja z sacyjalnych sietak z metaj zrazumieć, jak karystalniki ŭ internecie staviacca da tych ci inšych rečaŭ i źjaŭ.
Kampanija Social Links užo nie pieršy raz apynajecca ŭ centry ŭvahi. Jak nahadvaje Gizmodo, Social Links (jakaja sama pazicyjanuje siabie jak «raźviedvalny biźnies z adkrytym zychodnym kodam») raniej była vyklučana z Facebook i Instagram paśla taho, jak Meta abvinavaciła jaje ŭ sačeńni za karystalnikami.
Adnym z zasnavalnikaŭ kampanii źjaŭlajecca rasiejski pradprymalnik Andrej Kulikoŭ, piša Heise. Kampanija siońnia maje kala 600 klijentaŭ tolki ŭ Jeŭropie i ZŠA, maje štab-kvateru ŭ Amsterdamie i filijał u Ńju-Jorku. Meta nazvała kampaniju pastaŭščykom špijonskaha prahramnaha zabieśpiačeńnia ŭ spravazdačy ŭ kancy 2022 hoda i zabłakavała 3700 ulikovych zapisaŭ Facebook i Instagram, jakija jana nibyta vykarystoŭvała nienaležnym čynam dla šmatrazovaha špijanažu za karystalnikami hetych dźviuch sacsietak. Social Links abviarhaje heta, jak i abvinavačańni ŭ suviaziach z rasiejskimi śpiecsłužbami.
Niadaŭna firma prademanstravała svajo nietradycyjnaje vykarystańnie ChatGPT na kanfierencyi pa biaśpiecy ŭ Paryžy. Padčas demanstracyi kampanija «skarmiła» ŭ ChatGPT danyja, sabranyja jaje ŭłasnym instrumientam. Hetyja danyja zatym byli praanalizavanyja čat-botam, jaki aceńvaŭ ich jak stanoŭčyja, admoŭnyja abo niejtralnyja, adlustroŭvajučy vyniki ŭ interaktyŭnaj dyjahramie.
Takim čynam novy instrumient moža raspaznavać nastroi ŭdzielnikaŭ sacsietak i vyłučać temy, jakija časta abmiarkoŭvajucca. Vidavočnaja meta — vyjavić uźnikajučyja pratestnyja ruchi i pryvieści ŭ hatoŭnaść adpaviednyja orhany. Abaroncy kanfidencyjnaści paličyli heta bolš čym tryvožnym — nie tolki z-za hetaha kankretnaha prykłada, ale i z-za taho, jak ŠI moža pavialičyć moc industryi sačeńnia ŭ cełym.
Palicyja, darečy, davoli časta vykarystoŭvaje fejkavyja profili, kab dałučacca da roznych internet-supolnaściaŭ. Štučny intelekt moža palehčyć pracu palicyjantam i zrabić analiz nieabchodnych danych bolš chutkim. Zhodna z pakazanym na paryžskaj prezientacyi, u pierśpiektyvie śledčyja zmohuć taksama vykarystoŭvać intehravanyja mahčymaści bijamietryčnaha raspaznańnia asob, kab identyfikavać ludziej, jakija pa mierkavańni śpiecsłužbaŭ pakidajuć niehatyŭnyja kamientary pa toj ci inšaj temie. Tym časam vytvorca ChatGPT OpenAI admoviŭsia ad kamientaroŭ.
Cikava, što sama kampanija Social Links u siabie na sajcie asudžaje vajennuju ahresiju RF suprać Ukrainy i zajaŭlaje, što misijaj kampanii źjaŭlajecca «adnaŭleńnie davieru da danych» dla «stvareńnia bolš biaśpiečnaha i adkrytaha śvietu».
Jak Jadźvihin Š. smažyŭ u redakcyi skvarki i čamu łožak Kupały nahadvaŭ dochłaha viarbluda. Ivulin i Astapienia źniali zachaplalny film pra «Našu Nivu»88
Kamientary