Narodny artyst Biełarusi pryjechaŭ u Biełaruś. Pra heta možna daviedacca z shorts z aficyjnaha jutub-kanała śpievaka.
Jarasłaŭ Jeŭdakimaŭ naradziŭsia ŭ 1946 hodzie va ŭkrainskim Roŭnie ŭ turmie: jaho maci była represavanaja jak ukrainskaja nacyjanalistka, a zatym vysłanaja ŭ Narylsk. Dziacinstva Jarasłaŭ pravioŭ u dzieda ŭ vioscy Koryść u Rovienskaj vobłaści. Muzyčnuju karjeru pačaŭ u Dnieprapiatroŭsku, śpiavajučy ŭ restaranie i paralelna pracujučy na zavodzie. Tam ža paznajomiŭsia z druhoj žonkaj (pieršuju kinuŭ, nie pražyŭšy i miesiaca), jakaja była biełaruska, i pierajechaŭ u Minsk.
U 1975 hodzie Jeŭdakimaŭ prajšoŭ prasłuchoŭvańnie ŭ Minskaj fiłarmonii. U Minsku i ŭzyšła jaho zorka.
U 1980 hodzie ŭziaŭ udzieł va ŭradavym kancercie, na jakim prysutničaŭ kiraŭnik BSSR Piatro Mašeraŭ. Byłoha partyzana Mašerava skaryła pieśnia «Pole pamiaci» aŭtarstva Leanida Zachleŭnaha i Uładzimira Niaklajeva. Mašeraŭ rasparadziŭsia ab prysvajeńni Jeŭdakimavu zvańnia zasłužanaha artysta BSSR. U 1987-m jon atrymaŭ zvańnie narodnaha artysta.
Paśla taho jak u 2001 hodzie jon padtrymaŭ pierad vybarami apazicyjnych Alaksandru Łukašenku kandydataŭ, ułady pačali jaho cisnuć, i jon vymušany byŭ pierajechać u Maskvu.
Ale i tam jon nie maŭčaŭ. U 2017 hodzie ŭ intervju Leninhradskamu abłasnomu internet-telebačańniu śpiavak abvinavaciŭ rasiejskija ŭłady ŭ raźviazvańni vajny na paŭdniovym uschodzie Ukrainy: «Ja liču, što heta trahiedyja strašnaja. Ja abvinavačvaju va ŭsim Kreml, Pucina, hop-kampaniju kramloŭskuju. Ukraincy im nikoli hetaha nie darujuć. Jany zahubili maładyja žyćci, kala 10 000 čałaviek. Za što? Za što? Za što? Što, im Danbas patrebny? Krym patrebny?»
Jeŭdakimaŭ taksama nie raz vykazvaŭ dumku, što prezidenty nie pavinny kiravać krainami bolš za dva terminy.
Na videa, jakoje Jeŭdakimaŭ apublikavaŭ čatyry dni tamu, jon chodzić pa Minsku kala nabiarežnaj Śvisłačy ŭ parku Horkaha.
Tam fonam hučyć pieśnia:
Žal, u moria nietu broda,
A u vietra niet śleda…
Potym jon sam źjaŭlajecca ŭ kadry i dadaje nastupnyja radki ź pieśni:
Žal, čto hody-skorochody
Bystrotiečny kak voda.
Ciapier čytajuć
Što robiać ź biełarusami, jakich aryštavali, ale nie paśpiavajuć asudzić za pratesty. Jość dva šlachi3
Kamientary