«Treba navučycca žyć raślinnym žyćciom». Fiłosaf Uładzimir Mackievič pieranios u turmie apieracyju
Paśla pieraniesienaj apieracyi palitviazień, viadomy fiłosaf i mietadołah Uładzimir Mackievič akryjaŭ i pačuvajecca lepiej.
«Šmat čytaje, karystajecca turemnaj biblijatekaj. Samaje hałoŭnaje, što viarnuŭsia da navukovaj dziejnaści — piša knihu pa fiłasofii. Značyć, u psichałahičnym sensie zachoŭvaje ŭstojlivaść», — paviedamiła «Radyjo Svaboda» pra stan Uładzimira Mackieviča daśviedčanaja krynica.
Vośmy miesiac stvaralnika navučalnaj arhanizacyi «Latučy ŭniviersitet» utrymlivajuć u turmie № 4 u Mahilovie.
Tudy jon trapiŭ pa rašeńni suda Škłoŭskaha rajona paśla niekalkich terminaŭ u ŠIZA i troch miesiacaŭ u PKT škłoŭskaj kałonii. U vyniku stan zdaroŭja palitviaźnia pahoršaŭ, i ŭ žniŭni ŭ Respublikanskim turemnym špitali ŭ Kałodziščach jamu zrabili połaścievuju apieracyju.
Turemny režym aznačaje dla źniavolenaha šerah dadatkovych abmiežavańniaŭ u paraŭnańni z kałonijaj, u tym liku pastajannaje ŭtrymańnie ŭ pamiaškańni.
«Siadzić nie ŭ adzinočcy. Niekalki razoŭ pamianiali kamieru. Ciapier apynuŭsia ŭ niejkaj małoj kamiery, dzie ruchacca składana. Prahułki jość, ale niama zvankoŭ», — padzialiłasia abaznanaja krynica i pracytavała słovy samoha Uładzimira Mackieviča pra ŭmovy, u jakich jon apynuŭsia.
«Jon žartaŭliva kazaŭ pra siabie: «Treba navučycca žyć raślinnym žyćciom». Ale na kolki jaho chopić? Intelektualna na šmat, a voś fizična? Ujavić ciažka», — prakamientavała situacyju sa zdaroŭjem Uładzimira Mackieviča krynica.
***
Uładzimiru Mackieviču 67 hadoŭ. Jaho aryštavali ŭ žniŭni 2021 hoda i źmiaścili ŭ SIZA na Vaładarskaha ŭ Minsku. U lutym nastupnaha hoda jon ciaham 13 dzion trymaŭ haładoŭku pratestu suprać niezakonnaha, jak jon ličyŭ, aryštu.
U červieni 2022 hoda fiłosaf byŭ asudžany na 5 hadoŭ źniavoleńnia ŭ kałonii ŭzmocnienaha režymu.
Mackieviča pryznali vinavatym pavodle artykułaŭ ab stvareńni ekstremisckaha farmavańnia, abrazie Łukašenki i hrupavych dziejańniach, jakija hruba parušajuć hramadski paradak.
Pravaabaroncy pryznali Uładzimira Mackieviča palitviaźniem.
Ciapier čytajuć
«Vajna ŭsio śpiša». Biełaruskim udzielnikam hiej-prajda ŭ Vilni pahražali raspravaj ad imia biełaruskich vajaroŭ za vykarystańnie bieła-čyrvona-biełaha ściaha122
Kamientary