«Słava Ukrainie!» Hetyja słovy zavadčan padčas zastolla nazvali «nacysckimi». Raniej ich žorstka zatrymali
Mazyrskija prapahandysty źniali siužet ab zatrymańni pracaŭnikoŭ Mazyrskaha naftapierapracoŭčaha zavoda. Słovy ŭ padtrymku Ukrainy, znojdzienyja na telefonie adnaho z rabotnikaŭ, prapahandysty nazvali «nacysckimi vykazvańniami pravaha tołku», paviedamlaje «Fłahštok».
U siužecie bačna, jak siłaviki žorstka zatrymlivajuć pracaŭnikoŭ MNPZ. Kali heta adbyłosia, nie paviedamlajecca. Aficyjnaja padstava dla zatrymańnia — raspaŭsiud «ekstremisckich materyjałaŭ».
Dalej u siužecie paviedamlajecca, što ŭ adnaho z pracaŭnikoŭ na telefonie znajšli videa zastolla, na jakim prostyja rabotniki vykazvajucca ŭ padtrymku Ukrainy:
— Słava Ukrainie! Biełarusy za rodnuju brackuju Ukrainu.
— Hierojam Słava! Słava Ukrainie!
Prapahandystka za kadram paviedamiła, što hetyja słovy byccam by nacysckija. Na videa ŭ hety momant była pakazanaja kinachronika ź biełaruskim nacyjanalnym ściaham. Taksama ŭ siužecie ŭkazvajecca na toje, što łozunh «Słava Ukrainie!» hučaŭ na Majdanie ŭ 2013—2014 hadach ad ukrainskich nacyjanalistaŭ z Pravaha siektaru.
Prapahandyscki rolik skančajecca pahrozami kryminalnaha pieraśledu ŭ dačynieńni da pracaŭnikoŭ Mazyrskaha NPZ:
«Dziejańni hetych chłopcaŭ… jany mohuć utrymlivać skład dziejańnia kryminalnaha pakarańnia, praduhledžanaha jak artykułam 130 «raspalvańnie rasavaj mižnacyjanalnaj ci luboj sacyjalnaj roźni», tak i artykułam 130.1 — heta «reabilitacyja nacyzmu»», — dekłaruje namieśnik načalnika Mazyrskaha rajonnaha adździeła Śledčaha kamiteta Alaksandr Varabiej.
Naprykancy siužetu pakazana milicejskaje videa z pracaŭnikami. Padobnyja videa, jak praviła, zdymajucca siłavikami pad prymusam i pahrozami. U im rabočyja tłumačać, što padčas zastolla 22 maja 2022 hoda chacieli padtrymać Ukrainu i nie zadumvalisia pra značeńnie skazanych imi słovaŭ.
Prapahandysty z telekanału «Mozyŕ» vyrašyli nie paznačać aŭtaraŭ siužetu. Ale pa hołasu možna apaznać, što tekst čytaje redaktarka kanała — Śviatłana Hrudźko.
Chto tyja dva piersanažy, jakija nie pili ŭ mižvajennaj Vilni, jak Zośku Vieras abudzili ad letarhii i ci praŭdzivaja bajka pra Karatkieviča i restaran11
Kamientary
A łukašystka Hrudźko da skančeńnia svaich haniebnych dzion budzie pracavać na reparacyi na adbudavańnie Ŭkrainy.