Stryžak: Pryjeduć mianiać pašpart i zusim niečakana trapiać u SIZA
Pravaabaronca i suzasnavalnik Fondu BYSOL Andrej Stryžak — pra novy punkt ryzyki dla biełarusaŭ praz novy ŭkaz Łukašenki.
— Historyja z zabaronaj na zamienu pašparta za miažoj całkam čakanaja, — skazaŭ «Salidarnaści» Andrej Stryžak. — Biełaruski režym paśladoŭna z 2020 hoda abrazaje mahčymaści dla dyjaspar i emihrantaŭ.
Spačatku było zajaŭlena, što vybary za miažoj arhanizoŭvacca bolš nie buduć.
Druhi krok — heta pazbaŭleńnie hramadzianstva ludziej u suviazi z tym, što jany ŭdzielničajuć u «ekstremisckich farmavańniach» albo majuć sudzimaść pa «ekstremisckich» abo «terarystyčnych» artykułach.
I ciapier całkam čakanaja hetaja historyja z pašpartami.
Akramia pašpartoŭ, darečy, jość i jašče adzin važny momant — źmianilisia praviły praviadzieńnia niekatorych majomasnych uhod.
Častku ź ich, u pryvatnaści ŭhody ź nieruchomaściu i transpartam, u suviazi z novaŭviadzieńniami možna budzie aformić abo asabista, abo na padstavie davieranaści, aformlenaj u Biełarusi. Davieranaści, aformlenyja ŭ inšych dziaržavach, dla šerahu apieracyj bolš nie padyduć.
Heta jašče adzin niepryjemny momant i, dumaju, na hetym režym nie spynicca, budzie prydumlać inšyja miechanizmy, kab papaŭniać svoj biudžet i abmiažoŭvać našy pravy. U ich niama zakonaŭ i niama miažy fantazijam.
Novaŭviadzieńni z pašpartami, pavodle słovaŭ pravaabaroncy, mohuć paŭpłyvać na niekatoryja pracedury lehalizacyi biełarusaŭ u inšych krainach.
— Heta vielmi mahutny sihnał dla našych jeŭrapiejskich i amierykanskich partnioraŭ ab tym, što prablema z atrymańniem abo pradaŭžeńniem pašpartoŭ RB sapraŭdy isnuje.
Raniej byvali situacyi, kali mihracyjnyja słužby tych ci inšych krain admaŭlali biełarusam u atrymańni tak zvanaha pašparta zamiežnaha hramadzianina. Dapuścim, u Litvie i Polščy jaho vydajuć na padstavie DNŽ.
Rašeńnie ab admovie abhruntoŭvali tym, što spačatku nieabchodna sprabavać atrymlivać pašpart praź biełaruskuju ambasadu. U suviazi z hetym ukazam, razam z uskładnieńniem atrymańnia biełaruskaha pašparta, dumaju, pracedura atrymańnia pašparta zamiežnaha hramadzianina stanie lahčejšaj.
A pakolki pašpart zamiežnaha hramadzianina žorstka pryviazany da DNŽ, peŭna, adbuducca źmieny i ŭ hetym kirunku. Bo ciapier, naprykład, Litva vydaje DNŽ tolki na hod.
Stanovicca bolš adčuvalnaj i zrazumiełaj ideja stvareńnia pašparta novaj Biełarusi. Zrazumieła, navošta jon naohuł patrebny.
Suzasnavalnik Fondu BYSOL taksama źviartaje ŭvahu na ryzyki, źviazanyja z nastupstvami novaŭviadzieńniaŭ.
— U cełym, biezumoŭna, heta paharšeńnie situacyi biełarusaŭ zamiežža. Prasočvajecca vielmi vyraznaja i zrazumiełaja stratehija na toje, jak ich adrazajuć ad samoj Biełarusi, bo ličać, što tam, za miažoj, nikoha, akramia vorahaŭ, u ich nie zastałosia.
Nu i, viadoma, jość raźlik na toje, što tyja, chto nie baicca viartacca ŭ Biełaruś, viernucca, kab zrabić pašpart. I tut isnuje peŭnaja pastka.
Nie vyklučaju, što mnohija ludzi, jakija navat nie ŭ kursie taho, što suprać ich jość niejkija materyjały śledčych spraŭ, mohuć apynucca ŭ niebiaśpiečnaj situacyi, to-bok pryjeduć mianiać pašpart sabie abo dziciaci (a ŭ dziciačych pašpartoŭ termin karaciejšy), i zusim niečakana trapiać u SIZA KDB, abo na «Vaładarku», abo na Akreścina, abo jašče kudy-niebudź.
Heta čarhovy punkt ryzyki dla tych ludziej, jakija raniej, moža być, i nie pajechali b u Biełaruś, a ciapier na heta vyrašacca z-za pašpartoŭ.
Tamu, karystajučysia vypadkam, u čarhovy raz chaču papiaredzić pra toje, što lubaja pajezdka ŭ Biełaruś ujaŭlaje saboj pahrozu i ryzyku, asabliva dla tych ludziej, jakija hramadska aktyŭnyja. Usio roŭna, nakolki aktyŭnyja vy byli ŭ 2020 hodzie, ułada znojdzie, za što vas začapić, — papiaredžvaje pravaabaronca.
Čytajcie taksama:
«My pracujem, kab biełarusy nie zastalisia biez pašpartoŭ» — Cichanoŭskaja
Ciapier čytajuć
Za minuły hod nasielnictva Biełarusi skaraciłasia jašče na 53 tysiačy čałaviek6
Kamientary