Vyrasła kolkaść vypadkaŭ chvaroby Łajma paśla ŭkusu klaščoŭ. U jakich rajonach lutujuć klaščy

Stanam na 1 žniŭnia zarehistravana kala 100 vypadkaŭ kleščavoha encefalitu i bolš za 950 vypadkaŭ chvaroby Łajma. Sioleta pakazčyki zachvorvańnia kleščavym encefalitam zastalisia na ŭzroŭni minułaha hoda, a zachvorvańniaŭ chvarobaj Łajma stała bolej u 1,4 razu, paviedamlaje Respublikanski centr hihijeny, epidemijałohii i hramadskaha zdaroŭja.

Vypadki kleščavoha encefalitu zafiksavali ŭ 31 rajonie. U Smarhonskim i Vałožynskim rajonach było pa 2 vypadki ŭ kožnym, dzie infiekcyja trapiła charčovym šlacham paśla ŭžyvańnia kazinaha małaka. U niekalkich rajonach Bresckaj (4) i Hrodzienskaj (3) vobłaści, na jakich raźmiaščajecca nacyjanalny park «Biełaviežskaja pušča», kolkaść vypadkaŭ kleščavoha encefalitu tradycyjna vyšejšaja za siarednierespublikanski ŭzrovień.

Vypadki chvaroby Łajma naziralisia ŭ 79 rajonach.

Stanam na 1 žniŭnia ŭ arhanizacyi achovy zdaroŭja z nahody ŭkusu klašča źviarnułasia kala 18 tysiač čałaviek, u tym liku bolš za 5,5 tysiačy dziaciej. Heta na 6% nižej, čym za anałahičny pieryjad 2022 hoda. Bolš za ŭsio zvarotaŭ adznačana siarod žycharoŭ stalicy i Hrodzienskaj vobłaści, a najmienšaja kolkaść tych, chto źviarnuŭsia — u Minskaj i Homielskaj vobłaści. Čaściej klaščoŭ «padbirali» na dačnych učastkach i ŭ sielskaj miascovaści (40,6%), a taksama pry naviedvańni terytoryi lesu (34,4%), radziej — na terytoryi žyłoj zabudovy haradoŭ (11,5%).

U cełym kolkaść klaščoŭ zastałasia na ŭzroŭni minułaha hoda.

Samaj efiektyŭnaj mieraj prafiłaktyki «kleščavych infiekcyj» źjaŭlajecca praduchileńnie kantaktu z klaščom, a ŭ vypadku ŭkusu — chutkaje i pravilnaje jaho vydaleńnie sa skury, z apracoŭkaj miesca ŭkusu śpirtaźmiaščalnym srodkam.

Vykarystoŭvajcie repielenty i kožnuju hadzinu, pry znachodžańni ŭ lesie, ahladajcie svaju vopratku i adkrytyja ŭčastki cieła dla vyjaŭleńnia i źniaćcia klaščoŭ.

Užyvajcie ŭ ježu kazinaje małako tolki paśla 2-3 chvilin kipiačeńnia.

Pry vyjaŭleńni klašča, jaki prysmaktaŭsia, jaho nieabchodna źniać sa skury i jak maha chutčej źviarnucca da ŭčastkovaha doktara (terapieŭta, piedyjatra) abo doktara-infiekcyjanista ŭ palikliniku pa miescy žycharstva, jaki pryznačyć prafiłaktyčnaje lačeńnie i, pry nieabchodnaści, miedycynskaje nazirańnie. Źviarnucca da doktara varta ŭ pieršyja 72 hadziny paśla ŭkusu.

Kali vy chočacie adnieści klašča na daśledavańnie, to źmiaścicie jaho ŭ kantejnier, jaki ščylna zakryvajecca; možna pakłaści kavałačak vaty (tkaniny), zmočanaj vadoj, abo 1-2 travinki. Zachoŭvać kantejnier da adpraŭki ŭ łabaratoryju nieabchodna ŭ chaładzilniku.

• 5
• 0
• 1
• 6
• 10
• 6
• 11
• 0