«Niachaj apazicyjaniery bajacca». U Biełarusi stvaryli try novyja atrady śpiecnaza ŭnutranych vojskaŭ MUS
Pra novyja atrady śpiecnaza ŭnutranych vojskaŭ MUS raskazaŭ kamandujučy ŭnutranymi vojskami Mikałaj Karpiankoŭ.
Pavodle Karpiankova, stvoranyja try atrady: «Štorm» u Breście, «Tajfun» u Hrodnie i «Buran» u Homieli.
«Hetyja padraździaleńni pryznačanyja dla viadzieńnia bajavych dziejańniaŭ, baraćby z dyviersijna-raźviedvalnymi hrupami, niezakonnymi ŭzbrojenymi farmavańniami ŭ asablivy pieryjad. U paŭsiadzionnaj dziejnaści hetyja padraździaleńni ŭžo i niasuć słužbu ŭ pryhraniččy, i vykonvajuć zadačy pa zabieśpiačeńni siłavoha prykryćcia našaha apieratyŭnaha składu», — raskazaŭ Karpiankoŭ.
Stvaryli hetyja padraździaleńni ŭ pačatku maja.
«Užo ciapier jany bajazdolnyja, vykonvajuć bajavyja zadačy. Atrady ŭkamplektavanyja kantraktnikami, jakija prajšli słužbu ŭ orhanach unutranych spraŭ u padraździaleńniach unutranych vojskaŭ nie mienš jak 3-5 hadoŭ. Padraździaleńni ekipiravanyja, navučanyja z ulikam dośviedu praviadzieńnia vajennaj śpiecapieracyi va Ukrainie», — skazaŭ jon.
Pavodle jaho, vajskoŭcy ŭzbrojenyja sučasnaj zbrojaj, zabiaśpiečanyja śpiecyjalnaj technikaj, u tym liku ciepłavizijnymi pryborami i prycełami, bieśpiłotnikami.
«Apazicyjaniery, jakija znachodziacca za miažoj i pahražajuć jakim-niebudź uvarvańniem, jašče niečym na terytoryju Biełarusi, niachaj bačać heta i bajacca», — skazaŭ Karpiankoŭ.
Takim čynam, siłaviki paćviardžajuć žadańnie ŭtrymać uładu ŭ krainie «na štykach». Masavyja palityčnyja represii ŭ Biełarusi praciahvajucca z 2020 hoda, kali vybary supravadžalisia nierehistracyjaj i aryštami praciŭnikaŭ Łukašenki i naziralnikaŭ na vybarčych učastkach. Alaksandr Łukašenka, miarkujučy pa źviestkach z učastkaŭ, dzie vybarčyja kamisii dazvolili naziralnikam sačyć za padlikam hałasoŭ, prajhraŭ Śviatłanie Cichanoŭskaj, ale nie addaŭ ułady.
Z 2022 hoda, paśla napadu Rasii na Ukrainu, biełarusaŭ pačali pieraśledavać i za antyvajennyja vykazvańni abo simpatyi da Ukrainy.
Za hety čas u krainie adbyłosia nie mienš za 50 tysiač palityčna matyvavanych zatrymańniaŭ, zaviedziena nie mienš za 12 tysiač palityčna-kryminalnych spraŭ i adkinutyja bazavyja normy zakonnaści i marali.
Ciapier čytajuć
U Minsku masažyst Andrej tajemna zdymaŭ hołych klijentak24
Kamientary