Centr prafiłaktyčnaj dezinsiekcyi pravodzić apracoŭku haradskich terytoryj i zaviaršyć jaje płanujuć da kanca nastupnaha tydnia. Pra heta paviedamiŭ namieśnik hałoŭnaha lekara Minskaha haradskoha centra hihijeny i epidemijałohii Ryhor Hieciuk, pišuć «Minsk-naviny».
Jon udakładniŭ, što takija mierapryjemstvy pravodziacca na terytoryjach, dzie ŭ pracesie abśledavańnia vyjaŭlenaje pieravyšeńnie dapuščalnych pakazčykaŭ kolkaści klaščoŭ.
Pa stanie na 10 maja pieravyšeńnie kolkaści adznačanaje na 16 haradskich terytoryjach Minska (les Cnianskaha vadaschovišča, vulica Mirašničenki, Park kamianioŭ, Jabłynievy sad i prylehłaja da jaho terytoryja pa vuł. Łosika-Siemianiaki, parki Civali, Antonaŭski, Hrekavaj, ekaściežki «Miadźviežyna» i «Horad ptušak» i inš.) i 6 plažaŭ Zasłaŭskaha vadaschovišča.
Sanitarnyja lekary nahadvajuć, što asnoŭnaj mieraj ratavańnia ad prysmoktvańnia klašča źjaŭlajecca indyvidualnaja abarona. U jakaści mier asabistaj prafiłaktyki rekamiendujucca: adpaviednaja ekipiroŭka pry naviedvańni zialonaj zony, jakaja praduchilaje zapaŭzańnie klašča; vykarystańnie śpiecyjalnych srodkaŭ dla adpužvańnia i / abo źniščeńnia klaščoŭ (repielentnyja abo akarycydna-repielentnyja srodki); praviadzieńnie sama- i ŭzajemaahladaŭ.
Vydaleńnie pavukapadobnych pravodziać va ŭstanovie achovy zdaroŭja abo samastojna pry niemahčymaści apieratyŭnaha zvarotu da miedykaŭ. Hałoŭnaje — zrabić heta pravilna. Rekamiendujecca vykarystoŭvać piatlu ź nitki, zvyčajny tonki pincet abo śpiecyjalnyja pryłady dla vydaleńnia klašča. Varta zachapić rotavy aparat za chabatok jak maha bližej da skury, ale nie ciahnuć klašča za bruška. Paśla vydaleńnia miesca ŭkusu nieabchodna apracavać antysieptykam.
Ciapier čytajuć
Ajcišnika z «Varhiejminha» sudzili pa rasstrelnym artykule. Padobna, za padtrymku Ukrainy — praŭda, zrabić jon ničoha nie paśpieŭ1
Kamientary