Na łatvijskaj miažy z boku Biełarusi adbyŭsia pažar, padazrajuć mihrantaŭ
U aŭtorak, 9 maja, kala łatvijskaj miažy na biełaruskim baku adbyłosia ŭzharańnie na terytoryi niekalki hiektaraŭ, paviedamiŭ 10 maja na pasiadžeńni kamisii łatvijskaha Siejma pa abaronie, unutranych spravach i praduchileńni karupcyi namieśnik načalnika Dziaržaŭnaj pamiežnaj achovy Ivar Ruskulis. I vykazaŭ mierkavańnie, što heta moža mieć dačynieńnie da prablemy nielehalnaj mihracyi ŭ ES praź Biełaruś.
Tak jak taja terytoryja, na jakoj zafiksavany pažar, faktyčna nie zasielena, to łatvijskaja pamiežnaja achova miarkuje, što pryčynaj pažaru mahli stać nielehalnyja mihranty z krain Azii i Afryki, jakija štodnia masava sprabujuć trapić u Łatviju, ale ich adpraŭlajuć nazad u Biełaruś.
Zaŭvažyŭšy ŭzharańnie, łatvijskaja pamiežnaja achova vyklikała dziaržaŭnuju pažarna-vyratavalnuju słužbu, jakaja z łatvijskaha boku zabiaśpiečyła aŭtacysternu dla tušeńnia pažaru na vypadak, kali b połymia pierakinułasia ŭ Łatviju.
«Jość vysokaja ryzyka, što takija dziejańni mohuć być zroblenyja i na našym baku. Naŭmysna ci nie — heta inšaje pytańnie», — padkreśliŭ Ruskulis.
Paviedamlajecca, što sioleta łatvijskimi pamiežnikami papiaredžana ŭžo 2623 sproby niezakonnaha pierasiačeńnia miažy, tolki 177 čałaviek byli prapuščanyja ŭ Łatviju z humanitarnych mierkavańniaŭ. Učora, 9 maja, sprobaŭ parušeńnia biełaruska-łatvijskaj dziaržaŭnaj miažy było zafiksavana 35.
Ciapier čytajuć
Łukašenka: Chutka 4 miljony pracoŭnych sahnucca, na karački stanuć, i my nie zmožam im narmalny zarobak płacić26
Kamientary