Biełaruskija pravaabaroncy dapamahli vyratavać biežancaŭ na miažy z Łatvijaj
U studzieni z pradstaŭnikami łatvijskaj arhanizacyi Gribu palīdzēt bēgļiem źviazałasia hrupa vymušanych mihrantaŭ ź Siryi, jakija kala miesiaca praviali na miažy pamiž Łatvijaj i Biełaruśsiu. Siłaviki z Łatvii admaŭlalisia prymać ich prośbu ab prytułku i hvałtoŭna viartali ŭ Biełaruś, a biełaruskija siłaviki nie dazvalali pakinuć prymiežnuju zonu, prymušajučy viartacca ŭ Łatviju.
U takoj situacyi mihranty znachodzilisia z pačatku śniežnia, da taho ž jany byli vymušanyja žyć pad adkrytym niebam.
11 studzienia Respect-Protect-Fulfill (biełaruskaja pravaabarončaja arhanizacyja, jakaja bazujecca ŭ Litvie) i Gribu palīdzēt bēgļiem źviarnulisia ŭ Jeŭrapiejski sud pa pravach čałavieka z prośbaj abaviazać Łatviju nie vydvarać mihrantaŭ u Biełaruś i dać im humanitarnuju dapamohu.
Sud zadavoliŭ zapyt i abaviazaŭ Łatviju dać mihrantam ježu, vadu, vopratku, adekvatnuju miedycynskuju dapamohu i časovy prytułak. Z hetym rašeńniem u noč z 12 na 13 studzienia aktyvisty łatvijskaj arhanizacyi (Ijeva Raŭbiška i Ehiłs Hrasmanis) pajechali ŭ pamiežnuju zonu, kab vyratavać ludziej. Kali jany znajšli 5 z 7 zajaŭnikaŭ u lesie, tyja byli ŭ vielmi drennym stanie. Aktyvisty nieadkładna vyklikali chutkuju dapamohu i źviazalisia z pamiežnikami. U vyniku dvum zajaŭnikam akazali terminovuju miedycynskuju dapamohu i ŭsie piaciora zastalisia ŭ Łatvii. Što adbyłosia ź jašče dvuma zajaŭnikami, jakich Ijeva i Ehiłs u lesie nie znajšli, nieviadoma.
Łatvijskaja Dziaržaŭnaja pamiežnaja achova raspačała kryminalnuju spravu suprać łatvijskich aktyvistaŭ (Ijevy Raŭbiška i Ehiłsa Hrasmanisa) nibyta za niezakonnaje pieramiaščeńnie asob praź miažu.
«Nam udałosia damahčysia stanoŭčaha rašeńnia ad JESPČ i jaho vykanańnia kankretna ŭ hetaj spravie. Ale na miažy ciapier znachodziacca jašče dziasiatki ludziej u takoj ža situacyi. Z dnia ŭviadzieńnia nadzvyčajnaha stanovišča ŭ Łatvii na miažy ź Biełaruśsiu ŭ žniŭni 2021 hoda nazirajecca situacyja, kali siłaviki Biełarusi i Łatvii ŭtrymlivajuć vymušanych mihrantaŭ u prymiežnaj vobłaści. Łatvijskija siłaviki nie prymajuć u ich prośby ab prytułku i vydvarajuć ich u Biełaruś, a biełaruskija siłaviki nie vypuskajuć z pamiežnaj zony i prymušajuć nielehalna pierachodzić miažu z Łatvijaj. My z kalehami z Łatvii zmahajemsia za toje, kab mihranty nie padviarhalisia katavańniam i biesčałaviečnamu abychodžańniu», — prakamientavaŭ kiraŭnik Respect-Protect-Fulfill Mikita Maciuščankaŭ.
Ciapier čytajuć
«Adnavili hramadski paradak, nie sastupiŭšy patrabavańniam novych vybaraŭ». Što piša Hrokipiedyja pra pratesty, Łukašenku, movu i jak dzielić spadčynu VKŁ1313
Kamientary