U sud vyklikali ludziej, što paručylisia za žurnalistak Tut.by, jakija źjechali za miažu
10 krasavika Minski haradski sud pačaŭ razhlad spraŭ supracoŭnic partała Tut.by Aleny Taŭkačovaj i Volhi Łojka. Spravy tyčacca asabistaha paručalnictva dla vyzvaleńnia žurnalistak z-pad varty. Tak jak jany pakinuli Biełaruś i byli abvieščany ŭ mižnarodny vyšuk, padpisanty chadajnictvaŭ musiać kampiensavać dziaržavie sumu abhavoranaha zakładu, piša BAŽ.
Infarmacyja ab pasiadžeńniach źjaviłasia na sajcie Viarchoŭnaha Suda. Ź jaje vynikaje, što ciaham 10 krasavika ŭ Minski harsud na rozny čas vyklikajuć tych, chto ŭ svoj čas paručyŭsia za žurnalistak likvidavanaha partała Tut.by, kali jany jašče znachodzilisia za kratami.
Tak, siarod paručalnikaŭ Aleny Taŭkačovaj fihurujuć dypłamat, deputat Pałaty pradstaŭnikoŭ Valeryj Varaniecki, a taksama palitołah, eks-kiraŭnik Rady pa mižnarodnych adnosinach inicyjatyvy «Minski dyjałoh» Jaŭhien Prejhierman.
Za Volhu Łojka piersanalna chadajničaŭ staršynia Respublikanskaha sajuza pramysłoŭcaŭ i pradprymalnikaŭ Alaksandr Šviec.
U sudovym dakumiencie kankretna nie ŭkazvajecca, na padstavie jakoha artykuła vyklikajucca paručalniki, fihuruje tolki raspłyvistaja farmuloŭka «inšyja materyjały».
Adnak z papiaredniaj praktyki vynikaje, što ŭ pracesie papiarednich damoŭlenaściaŭ abhavorvajecca kankretnaja suma, jakuju ŭ vypadku fors-mažoru «apiakun» musić vypłacić za svajho padabaronnaha. Jak praviła, havorka pra istotnuju sumu hrošaj.
Z ulikam taho, što Volha Łojka i Alena Taŭkačova pakinuli Biełaruś nasupierak padpiskam ab niavyjeździe, za heta ciapier musiać panieści finansavuju adkaznaść ich paručalniki.
Nahadajem, sioleta 9 studzienia ŭ Minskim haradskim sudzie adbyŭsia zakryty praces nad šeraham supracoŭnikaŭ TAA «TUT BAJ MIEDYJA». Adnak zamiest abjaŭlenych piaci fihurantaŭ 180-tomnaj spravy na łaŭku padsudnych zdoleli pasadzić tolki dvuch.
Pobač z hienieralnaj dyrektarkaj Ludmiłaj Čekinaj i hałoŭnaj redaktarkaj Marynaj Zołatavaj, pavodle abvinavačańnia, musili być hałoŭnaja redaktarka palityka-ekanamičnaha błoka Volha Łojka, redaktarka adździeła nieruchomaści Alena Taŭkačova i jurydyčnaja kansultantka Kaciaryna Tkačenka. Ich vyzvalili letaś pad paručycielstvy z abaviazkam źjavicca ŭ sud, ale tyja nie stali vypraboŭvać los i źjechali ź Biełarusi, jak tolki była nazvana data sudovaha pracesu.
Paźniej źjaviłasia infarmacyja, što fihurantki, jakija źjechali, abvieščany ŭ mižnarodny vyšuk. Admietna, što proźvišča Kaciaryny Tkačenka i jaje paručalnikaŭ u hrafiku pasiadžeńniaŭ Minharsuda ni na 10 krasavika, ni na bolš poźnija daty nie fihuruje.
Sukupna tutbajeŭcaŭ vinavacili pa cełym šerahu «złačynstvaŭ»: niaspłata padatkaŭ, raspalvańnie varožaści, škoda nacbiaśpiecy i h. d. Akramia taho, Ludmiła Čekina, Maryna Zołatava, Volha Łojka i Alena Taŭkačova trapili ŭ śpis Kamiteta dziaržbiaśpieki jak asoby, «datyčnyja da terarystyčnaj dziejnaści».
U vyniku spravy Aleny Taŭkačovaj, Volhi Łojka i Kaciaryny Tkačenka vyłučyli ŭ asobnuju «śpiecvytvorčaść»; vyhladaje, što ich buduć sudzić zavočna, jak užo heta mieła miesca ź inšymi apanientami režymu.
Što da Ludmiły Čekinaj i Maryny Zołatavaj, dyk 17 sakavika sudździa Valancina Ziankievič pakarała žurnalistak 12 hadami źniavoleńnia kožnuju z adbyvańniem u kałonii ahulnaha režymu.
Abaroncy asudžanych nieadkładna padali skarhi na nieabhruntavana žorstki prysud i čakajuć pryznačeńnia daty razhladu apielacyj u Viarchoŭnym Sudzie.
Usich fihurantaŭ spravy Tut.by pravaabaroncy pryznali palityčnymi viaźniami.
Pamierła palitźniavolenaja Alena Pankova. Paŭhoda nazad jaje asudzili za ŭdzieł u pratestach7
Kamientary