SBU: Uziaty ŭ pałon biełarus nasamreč pracavaŭ na biełaruski KDB i źbiraŭ infarmacyju jak pra Ukrainu, tak i pra rasijskija PVK
Słužba biaśpieki Ukrainy ličyć, što Maksim Ziaziulčyk, jaki vajavaŭ u rasijskaj PVK «Redut», byŭ supracoŭnikam biełaruskaha KDB.
Jak piša SBU, u šerahach akupacyjnaj hrupoŭki Zaziulčyk vajavaŭ na Charkaŭskim i Kramatorskim kirunkach.
Siarod jaho asnoŭnych zadač byŭ zbor raźvieddanych ab uzorach zamiežnaha ŭzbrajeńnia, jakija pastupajuć padraździaleńniam USU ad zachodnich partnioraŭ.
Akramia taho, jon sprabavaŭ vyviedać płany mahčymaha ŭdziełu rasijskich PVK u sprobach adchileńnia ad ułady Łukašenki.
Ziaziulčyka zachapili ŭ pałon padčas adnaho z bajoŭ u Danieckaj vobłaści ŭ vieraśni minułaha hoda.
Zatrymany adrazu sprabavaŭ vydać siabie za šarahovaha bajevika.
Pa materyjałach Słužby biaśpieki sud pryznačyŭ jamu 10 hadoŭ źniavoleńnia pa č. 4 art. 447 Kryminalnaha kodeksa Ukrainy (najomnictva).
U śniežni 2020 hoda chłopca zaličyli ŭ skład 2-ha antyterarystyčnaha adździeła KDB na pasadu «raźviedčyka».
«Pa lehiendzie, jon pavinien byŭ dziejničać pad vyhladam zamiežnaha najmita, a sabranuju raźviedinfarmacyju pieradavać u Minsk praz suviaznoha», — piša SBU.
Dla hetaha letam minułaha hoda chłopiec prybyŭ u trenirovačny łahier rasijskaj PVK, dzie prajšoŭ apieratyŭna-bajavuju padrychtoŭku pad kiraŭnictvam kadravych supracoŭnikaŭ rasijskich śpiecsłužbaŭ.
Zatym jaho pierakinuli na ŭschodni front.
Maksimu Ziaziulčyku 22 hady. Chłopiec paśpieŭ advučycca ŭ ahratechničnym kaledžy ŭ Marjinaj Horcy, a paśla adsłužyć u vojsku. Słužyŭ jon u adnoj z častak siłaŭ śpiecyjalnych apieracyj (mahčyma, navat u samoj Marjinaj Horcy).
Chłopiec paśpieŭ pavajavać niašmat — z 21 lipienia, kali jon prybyŭ u Izium Charkaŭskaj vobłaści i atrymaŭ zbroju na pasadzie kulamiotčyka, da 19 vieraśnia, kali jaho ŭziali ŭ pałon niedaloka ad Svatava Łuhanskaj vobłaści.
Jon słužyŭ u padraździaleńni «Vieterany» kulamiotčykam-retranślataram u PVK «Redut».
Ziaziulčyk udzielničaŭ u bajach kala Krasnapolla ŭ Danieckaj vobłaści. Padčas bajoŭ za pazicyi ŭ lesapałasie Duby 30 lipienia jon byŭ paranieny i da 25 žniŭnia lačyŭsia na bazie stałaj dysłakacyi «Reduta» ŭ Iziumie Charkaŭskaj vobłaści, pisała «Radyjo Svaboda».
25 žniŭnia ŭ składzie bataljona «Vieterany» jaho pierakinuli na pazicyi kala Svatava ŭ Łuhanskaj vobłaści, dzie išli najbolš žorstkija bai. Paźniej rasijanie pierakinuli hetaje padraździaleńnie ŭ Limanski rajon Danieckaj vobłaści.
Urešcie 19 vieraśnia Maksim Ziaziulčyk trapiŭ u pałon da ŭkrainskich vajskoŭcaŭ.
Ciapier čytajuć
Aryštavany čynoŭnik, jaki moh stać nastupnym ministram achovy zdaroŭja7
Kamientary