Nad ZŠA zaŭvažyli raźviedvalny pavietrany šar. Ułady ŭpeŭnienyja, što jon z Kitaja
Ułady ZŠA zaŭvažyli nad paŭnočnaj častkaj krainy raźviedvalny pavietrany šar i ciapier uvažliva nazirajuć za im. Pientahon ličyć, što šar naležyć Kitaju, piša Bi-bi-si.
«Urad ZŠA zafiksavaŭ i adsočvaje vyšynny raźviedvalny pavietrany šar, jaki ciapier znachodzicca nad kantynientalnaj častkaj ZŠA», — zajavili ŭ vajskovym viedamstvie.
Pa danych amierykanskich ŚMI, u Pientahonie nie sumniavajucca, što šar — kitajski. Ułady ZŠA nakiravali zapyt u KNR z nahody abjekta, ale źbivać jaho nie stali z-za vialikich pamieraŭ.
«Ja nie budu nazyvać dakładnyja pamiery. Pavodle našych acenak, jon dosyć vialiki, kab abłomki nanieśli škodu, kali my jaho sabjom, — zajaviŭ pradstaŭnik Pientahona. — Byli paviedamleńni pra toje, što piłoty bačyli hetuju štuku, choć jana znachodzicca davoli vysoka ŭ niebie».
Paviedamlajecca, što šar nie ŭjaŭlaje pahrozy dla hramadzianskaj avijacyi, bo znachodzicca na vialikaj vyšyni.
«Šar ciapier pieramiaščajecca na vyšyni značna bolšaj, čym taja, na jakoj ažyćciaŭlajucca kamiercyjnyja avijapieravozki, i nie ŭjaŭlaje jakoj-niebudź pahrozy dla ludziej na ziamli, — zajaviŭ pres-sakratar Pientahona Patryk Rajder.
Pa jaho słovach, padobnaje ŭžo zdarałasia apošnija hady.
Jak paviedamlaje telekampanija NBC, u sieradu vajskovaje kamandavańnie ZŠA źbirałasia, kab abmierkavać incydent i mahčymyja miery ŭ adkaz. Pra vyjaŭleńnie šara prainfarmavali prezidenta ZŠA Džo Bajdena.
Krynicy NBC adznačajuć, što paśla vyjaŭleńnia abjekta ŭ pavietra padymałasia avijacyja, u tym liku źniščalniki piataha pakaleńnia F-22 Raptor, a taksama samalot radyjołakacyjnaha vyjaŭleńnia.
Kitaj incydent pakul nijak nie kamientavaŭ.
Pavietrany šar upieršyniu zaŭvažyli ŭ sieradu nad horadam Bilinhs u štacie Mantana. Da hetaha, jak miarkujecca, abjekt pralacieŭ nad terytoryjaj Kanady.
Ciapier čytajuć
Łukašenka pakazaŭsia ŭ Amanie tolki na čaćviorty dzień vizitu — doma ŭ sułtana. Ź im Viktar i Kola2
Kamientary