U Biełarusi pradajuć jašče adzin pomnik architektury — siadzibny dom hrafaŭ Patockich u Bierazinie. Pra toje, što budynak moža nieŭzabavie syści z małatka, śviedčyć sajt Biełaruskaj univiersalnaj tavarnaj biržy.
Pieršapačatkovaja cana siadziby — 28 400 rubloŭ, tarhi pačnucca 21 listapada. Ale pakul što nie zarehistravana anivodnaj zajavy na ŭdzieł u aŭkcyjonie.
Budynak byŭ pabudavany ŭ 1858 hodzie, jaho płošča — 444,5 «kvadrataŭ». «Padmurak — kamiani, butabieton, ścieny — cehła kieramičnaja, abtynkavanaja i afarbavanaja, pieraharodki —— cehła kieramičnaja, pierakryćci — dreva, dach — mietał», — paznačana ŭ charaktarystykach siadziby.
U dadatak da siadziby pieramožca tarhoŭ atrymaje prava arendy ŭčastka — ale tolki na 50 hadoŭ.
Vykarystoŭvać budynak možna tolki dla zahadzia ahavoranych metaŭ. Tak, siadzibu dazvolena transfarmavać u turystyčny abo spartyŭny abjekt, a taksama ŭ žyły budynak.
Paśla taho, jak zavieršacca tarhi i budzie zaklučanaja damova kupli-prodažu, novy ŭładalnik siadziby pavinien budzie na praciahu 30 dzion padpisać achoŭnaje abaviazacielstva na materyjalnuju historyka-kulturnuju kaštoŭnaść u Minkultury Biełarusi. Zatym treba ŭzhadnić z Kamitetam pa architektury i budaŭnictvie Minabłvykankama papiaredni prajekt na rekanstrukcyju z abaviazkam jaho realizacyi. Paśla hetaha treba raspracavać prajektnuju dakumientacyju, pravieści prajektna-vyšukovyja raboty — i ŭsio heta ŭ praciahu 16 miesiacaŭ z daty padpisańnia akta ab pryjomie-pieradačy. Finalny (i samy składany) krok — restaŭracyja va ŭstanoŭlenyja terminy.
Budynak u styli poźniaha kłasicyzmu źjaviŭsia na pravym bierazie Biareziny ŭ 1858 hodzie. Haspadyniaj budynka była Hanna Patockaja — u hetaj siadzibie jana płanavała pravodzić letni siezon. U rezidencyju časta pryjazdžali znakamityja hości, tut ładzilisia bali.
Paśla 1917 hoda kanfiskavany budynak stali vykarystoŭvać spačatku jak škołu, zatym jak skład. Z-za lehiendy ab zakapanym na terytoryi siadziby skarbie budynak i prylehłaja terytoryja niamała naciarpielisia ad palaŭničych za skarbami.
Ciapier byłaja rezidencyja Patockich maje vielmi kiepski vyhlad: vokny zabityja, skroź ścieny prabivajucca raśliny, a doŭhaja kamiennaja leśvica, viadučaja da raki, razburanaja.
Ciapier čytajuć
Łukašenka pra vyzvaleńnie palitviaźniaŭ: Chočuć zastacca ŭ Biełarusi — kali łaska1
Kamientary