Biełyja ci karyčnievyja plamy na zubach — kaśmietyčny defiekt, jaki moža pazbaŭlać upeŭnienaści ŭ siabie, a časam i śviedčyć pra surjoznyja chvaroby. Raskazvajem, jak pabiehnuć takich plamaŭ i jak pazbavicca ich, kali jany ŭ vas źjavilisia.
Na koler zuboŭ moža ŭpłyvać hienietyka i kureńnie, ale rolu ježy taksama nielha niedaaceńvać. Pradukty i napoi ciomnaha koleru nakštałt čyrvonaha vina, jahad, burakoŭ, sojevaha sousu, kary i kietčupu mohuć pryvieści da źjaŭleńnia plamaŭ, piša The Times.
Kali vy lubicie pić šmat harbaty ci kavy, heta taksama nie budzie spryjać biełaśniežnaj uśmiešcy. U abodvuch napojach źmiaščajucca taniny — rečyvy, jakija adkładajucca na zubnoj emali i źmianiajuć jaje koler. Zialonaja harbata, naprykład, robić zuby krychu šerymi, čornaja harbata i kava pakidajuć žoŭtyja plamy, ale ŭsie hetyja rečyvy drenna ŭpłyvajuć na koler zuboŭ.
Jašče adzin krok — vydaleńnie zubnoha nalotu. Rehularna čyścicie zuby i mižzubnyja pramiežki ščotkaj abo zubnoj nitkaj, bo inakš zubny nalot zaćviardzieje i pieratvorycca ŭ zubny kamień, jaki moža prydać zubam žaŭtavaty koler. Pry hetym važna, kab čystka zuboŭ nie była zanadta enierhičnaja: vykarystoŭvajcie zubnuju ščotku siaredniaj miakkaści i rabicie joj padčas čystki miakkija kruhavyja ruchi.
Našaj zubnoj emali pastajanna škodziać kisłyja pradukty (sadavina, cytrusavyja, haziroŭka dy pamidory) i napoi, a taksama zvyčka skrahatać zubami i zanadta mocna ich čyścić. Praź ich upłyŭ abo praz stareńnie emal moža paškodzicca, i praź jaje stanie bačny nastupny słoj zuba — dencin, jaki maje žoŭty koler. Kali heta adbyvajecca, ludzi pamyłkova miarkujuć, što im treba čyścić zuby macniej, i praz heta jašče bolš škodziać situacyi. Adbielvalnyja zubnyja pasty mohuć krychu dapamahčy, ale nie čakajcie vialikich palapšeńniaŭ.
Kali vy karystajeciesia śpiecyjalnaj vadkaściu dla pałaskańnia rota, źviarnicie ŭvahu na jaje skład. Takija vadkaści časam źmiaščajuć chłorhieksidyn, jaki pamianšaje kolkaść bakteryj u rocie i palapšaje stan pry chvarobach dziasien, ale pry hetym moža vyklikać karyčnievyja plamy na zubach.
Vadkaści z chłorhieksidynam možna vykarystoŭvać, ale rabicie heta tolki pa rekamiendacyi stamatołaha i nie daŭžej čym niekalki dzion. Kali ž chočacie karystacca vadkaściu bolš doŭha, vybirajcie varyjanty, u skład jakich uvachodziać efirnyja alei ci cetyłpirydynij chłaryd. Jany dapamohuć kantralavać adkładańnie zubnoha nalotu, jaki moža zrabić zuby bolš žoŭtymi.
Kamientary