U Biełarusi pierastali pracavać sajty, jakija kansultavali pryzyŭnikoŭ
Ranicaj 18 lipienia błohier Anton Matolka zaŭvažyŭ, što pierastali adkryvacca sajty, jakija dapamahajuć pryzyŭnikam atrymać vajenny bilet biez słužby ŭ armii. Praŭładnyja telehram-kanały pišuć, što «kantorki dla ŭchilistaŭ prychłopnutyja», a ich uładalniki «dobraachvotna» i «ŭłasnaručna» napisali zajavy ab likvidacyi kampanij. «Miedyjazona» vyvučyła hetyja sajty i pahutaryła ź ich pradstaŭnikami. Adzin ź ich znachodzicca pad padpiskaj ab nierazhałošvańni.
Havorka idzie pra sajty prizivnik.by, povestka.by i armyhelp.by, jakija śpiecyjalizujucca na kansultacyjach dla pryzyŭnikoŭ pa jurydyčnych i miedycynskich pytańniach. Pry sprobie zajści na «Pryzyŭnik» sajt prosić uvieści łohin i parol pry ŭvachodzie, da sajta «Paviestka» nie ŭdajecca atrymać dostup, a pry sprobie zajści na «Armichełp» źjaŭlajecca zahłuška, jakaja infarmuje pra toje, što na sajcie pravodziacca «techničnyja raboty».
U «veb-archivie» zachavalisia kopii sajtaŭ: «Pryzyŭnik» — za 17 maja hetaha hoda, «Paviestka» pracavała 25 červienia, a ŭžo 11 lipienia vydavała pamyłku 502 Bad Gateway; sajt «Armichełp» apošni raz byŭ zachavany 31 sakavika. Apošnija vodhuki pra kampanii klijenty pakinuli ŭ «Jandeksie» ŭ kancy červienia.
Čym zajmalisia sajty?
«Usie rašeńni ab atrymańni vajennaha bileta i adterminoŭki ad pryzyvu prymajucca vyklučna pryzyŭnoj kamisijaj», nahadvaje sajt «Pryzyŭnik». Pradstaŭniki kampanii tłumačać, što «Pryzyŭnik» nie źjaŭlajecca» miedycynskaj ustanovaj i nie pravodzić miedycynskich abśledavańniaŭ», a zajmajecca «arhanizacyjaj vizitaŭ u akredytavanyja dziaržavaj miedycynskija ŭstanovy».
Sajt «Paviestka» pazicyjanuje siabie jak «servis pytańniaŭ i adkazaŭ, pryznačany dla pryzyŭnikoŭ, dapryzyŭnikoŭ, vajennaabaviazanych, vajskoŭcaŭ, alternatyŭščykaŭ i ich blizkich».
Na sajcie «Armichełp» paznačana, što jon «nie pradaje vajennyja bilety, nie sadziejničaje ŭchileńniu ad pryzyvu, nie zajmajecca podkupam słužbovych asob miedustanoŭ i vajenkamata», a infarmacyja, «atrymanaja padčas akazańnia pasłuh, niasie rekamiendacyjny charaktar».
Košt pasłuh na «Armichełp» varjirujecca ad 460 rubloŭ da 1340 rubloŭ.
«Pryzyŭnik» prapanuje pasłuhi ad 590 da 1990 rubloŭ z dadatkovymi pakietami ad 790 da 890 rubloŭ. Jaho pradstaŭniki pryvodziać kolkaść paśpiachovych kiejsaŭ: «Bolš za 3000 pryzyŭnikoŭ atrymali vajenny bilet» i «8 z 10 klijentaŭ atrymlivajuć vajenny bilet z nami».
Pryzyŭnik Mikita, jaki źviarnuŭsia pa dapamohu na adzin z sajtaŭ, zapłaciŭ za pasłuhi prykładna 1000 rubloŭ. «Pasłuhi byli pa typu «asabistaha sakratara». Zapisvali na miedahlady, zdaču analizaŭ u zručny čas. Kansultavali pa ŭsich pytańniach», — raspaviadaje jon «Miedyjazonie».
Pa jaho słovach, pradstaŭniki sajta skłali dla jaho płan abśledavańniaŭ, jaki karekciravaŭsia pa miery prachodžańnia: «Takim čynam adsiavajucca varyjanty, pa jakich možna ci nielha atrymać niepryhodnaść, — kaža Mikita. — Nu i taksama pierad kožnaj pajezdkaj u vajenkamat kansultavali, što i jak kazać».
Pa śćviardžeńni Mikity, niahledziačy na toje, što jon «nie zaŭsiody i nie adrazu atrymlivaŭ nieabchodnuju infarmacyju», sajt dapamoh jamu atrymać vajenny bilet, nie prachodziačy słužbu ŭ vojsku.
«Zmaharyki, adkasić nie atrymajecca»
«Mutnyja firmački prapanujuć pasłuhi pa adkosie ad vojska — i isnujuć čamuści», — napisała 29 maja praŭładnaja aktyvistka Volha Bondarava. Jaje ździviła, što «antydziaržaŭnaja rekłama, jakaja pahražaje nacyjanalnaj biaśpiecy Biełarusi, nie błakujecca».
«Kantorki dla ŭchilistaŭ prychłopnutyja. Pryčym, što charakterna, sami ŭładalniki dobraachvotna, ułasnaručna napisali zajavy ab likvidacyi. Ale samy cymies u tym, što ŭsia klijentura za hady pracy hetych kantor ŭstanoŭlenaja i składziravanaja ŭ šerych tečkach. I ŭ hetaj historyi jašče budzie praciah», — takimi słovami prakamientavaŭ znachodku Antona Matolki praŭładny kanał «ŽS Premium».
«Usio, zmaharyki, adkasić nie atrymajecca. U pieršych šerahach, tak by mović», — padchapiŭ radaść telehram-kanała supracoŭnik kanała STB Ryhor Azaronak.
«Miedyjaazona» patelefanavała pa pakazanym na sajtach kampanij numarach. Pradstaŭnik sajta «Pryzyŭnik» admoviŭsia kamientavać situacyju, bo znachodzicca pad padpiskaj ab nierazhałošvańni. Ci idzie havorka pra kryminalnuju spravu, nieviadoma. U «Armichełpie» na pytańnie karespandenta pra toje, ci tudy jon datelefanavaŭsia, surazmoŭca adkazaŭ: «Nie ŭžo», i paprasiŭ ničoha nie pisać. Pa telefonie z sajta «Centr pravoŭ pryzyŭnika» mužčyna paćvierdziŭ, što kaliści numar naležaŭ kampanii. Jon admoviŭsia raspaviadać što-niebudź pra toje, što adbyvajecca i dadaŭ što, bolš sajt pracavać nie budzie.
Karespandent «Miedyazony» zapytaŭsia ŭ surazmoŭcy, nakolki praŭdzivyja śćviardžeńni praŭładnaha telehram-kanała ab tym, što «ŭładalniki [kampanij] ŭłasnaručna, dobraachvotna napisali zajavy ab likvidacyi». Mužčyna raspavioŭ, što sajt zarehistravany na indyvidualnaha pradprymalnika: «IP pakul nie likvidujecca, nakolki ja viedaju. Prosta sajt vyklučany», — skazaŭ jon.
Pavodle atrymanaj «Miedyjazonaj» vypiski z Adzinaha dziaržaŭnaha rejestra, usie kampanii, jakija byli paznačanyja na sajtach pa dapamozie pryzyŭnikam, na momant napisańnia tekstu isnujuć i nie znachodziacca ŭ stadyi likvidacyi.
Capkała i Bałkuniec atakavali litoŭskaha palityka, jaki dapamahaŭ biełarusam paśla 2020‑ha i spryčyniŭsia da spravy, jakuju zavioŭ prakuror u Haazie28
Kamientary