Prezidenty Polščy i Litvy Andžej Duda i Hitanas Naŭsieda zapeŭnili ŭ biaśpiecy Suvałkaŭskaha kalidora — učastka terytoryi dźviuch krain, raźmieščanaha pamiž Biełaruśsiu i Kalininhradskaj vobłaściu Rasii. Siońnia kiraŭniki dziaržaŭ naviedali raźmieščanyja tut vajennyja padraździaleńni, paviedamlaje Reform.by.
Duda adznačyŭ vialikaje značeńnie Suvałkaŭskaha kalidora dla abiedźviuch krain i ŭsiaho NATA, bo jon złučaje nie tolki Polšču i Litvu, ale i krainy Bałtyi ź Jeŭrasajuzam. Pavodle jaho słoŭ, mnohija ludzi zadajucca pytańniem, nakolki biaśpiečnaje heta miesca.
«My pryjechali siudy sa spadarom prezidentam Litvy, kab pakazać, što i z polskaha boku, i ź litoŭskaha — hetaje miesca biaśpiečnaje. Biaśpiečnaje dziakujučy tamu, što vy ciapier tut razam z nami nazirajecie, a nazirajecie spakojnuju, štodzionnuju, ale poŭnuju ŭvahi słužbu polskich, litoŭskich žaŭnieraŭ, a taksama žaŭnieraŭ NATA», — skazaŭ Duda.
Jon nazvaŭ bataljonnyja taktyčnyja hrupy, jakija raźmiaščajucca ŭ Suvałkaŭskim kalidory z polskaha i litoŭskaha bakoŭ, harantyjaj biaśpieki rehijona. Prezident Polščy taksama spasłaŭsia na pavieličeńnie kolkaści sił reahavańnia NATA, rašeńnie pra jakoje było pryniataje na samicie aljansu.
Hitanas Naŭsieda adznačyŭ adzinstva pamiž Litvoj i Polščaj u mnohich pytańniach, u tym liku ŭ častcy padtrymki Ukrainy, sankcyj suprać Rasii.
«Dla nas vielmi važnaje ŭzmacnieńnie bataljonnych hrup NATA, asabliva ŭ hetym miescy, a taksama toje, što NATA adhuknuŭsia na našy prośby z nahody sił reahavańnia», — skazaŭ Naŭsieda.
Jon pryvitaŭ naroščvańnie patencyjału NATA na ŭschodnim fłanhu. Adnak, na dumku Naŭsiedy, Polšča i Litva taksama mohuć zrabić mnohaje razam. Jon adznačyŭ, što prezidenty sustrelisia ŭ tym liku, kab abmierkavać sumiesnyja dziejańni ŭ vypadku ŭźniknieńnia pahroz.
Prezidenty naviedali kamandny punkt Šmatnacyjanalnaj dyvizii Paŭnočny Uschod, zadača jakoha — kaardynavać dziejańni čatyroch šmatnacyjanalnych bataljonaŭ NATA, razhornutych u ramkach «uzmocnienaj pieradavoj prysutnaści» ŭ Polščy, Litvie, Łatvii i Estonii.
Čytajcie taksama:
Usie znoŭ zahavaryli pra Suvałkski kalidor. U čym jahonaje značeńnie i niebiaśpieka?
Aryštavany dyrektar Pałaca Respubliki, adzin z arhanizataraŭ Marafona adzinstva9
Kamientary