Daśledčy centr BEROC (Kijeŭ) praanalizavaŭ i acaniŭ situacyju na valutnym rynku Biełarusi ŭ mai hetaha hoda, a taksama raskazaŭ pra toje, čaho možna čakać u najbližejšyja miesiacy.
Valutny rynak u mai pavodziŭ siabie nietypova: nazirałasia zališniaja prapanova zamiežnaj valuty pry mocnym pasłableńni rubla da košyka valut. Košyk za maj padaražeŭ na 4,4%, a ŭ pačatku červienia abnaviŭ maksimum sakavika.
Pry hetym udzielniki valutnaha rynku (akramia Nacbanka i Minfina) u mai pradali na 73 młn dalaraŭ bolš valuty, čym kupili. Nasielnictva ŭ mai pradało na 17 młn dołaraŭ bolš valuty, čym kupiła. Adnačasova ŭsplosk prodažu adznačany ŭ nierezidentaŭ: prykładna 258 młn dołaraŭ na čystaj asnovie.
Ekśpierty BEROC miarkujuć, što nietypovaja situacyja na rynku ŭ mai, pry jakoj mocnaje pasłableńnie rubla da košyka spałučałasia z čystaj prapanovaj valuty, moža być źviazana z namieram Nacbanka nie dapuścić značnaha ŭmacavańnia rubla da dalara.
Dynamika hetaj pary šmat u čym vyznačajecca źmianieńniem kursu rasijskaj valuty da amierykanskaj. Za maj rasijski rubiel umacavaŭsia da dalara na 13%, a ź piku ŭ sakaviku pa 8 červienia — amal na 50%. Pry takim ruchu rasijskaj valuty ŭmacavańnie biełaruskaha rubla da dalara źjaŭlajecca nievialikim: kala 3% u traŭni i kala 22% ź piku ŭ sakaviku pa 8 červienia.
Pry hetym u kancy maja — pačatku červienia na valutnym rynku vidavočna abaznačyŭsia ŭzrovień supraciŭleńnia kala 2,50 pavodle kursa rubla da dalara.
Adnačasova mocna ŭzrasła vałacilnaść košyka valut, choć kursavaja palityka Nacbanka nakiravanaja na zhładžvańnie mienavita jaje vahańniaŭ. Miarkujučy pa ŭsim, kurs rubla da dalara nižej za 2,50 źjaŭlajecca toj miažoj, nižej za jakuju Nacbank pačynaje aktyŭnaje supraćdziejańnie ŭmacavańniu rubla, adznačajuć ekśpierty.
Prahnoz BEROC na najbližejšy čas zvodzicca da taho, što nas čakaje «paŭzučaje» pasłableńnie biełaruskaha rubla, pakolki ekspartnaja vyručka ŭ letnija miesiacy, chutčej za ŭsio, budzie nizkaj: dziejańnie sankcyj i padzieńnie popytu ŭnutry Rasiei cisnuć na ekspart, a vybudoŭvańnie novych vytvorča-łahistyčnych łancužkoŭ patrabuje času.
U toj ža čas skaračeńnie impartu ŭ Biełaruś i źnižeńnie abjomaŭ kupli valuty nasielnictvam pamianšajuć vierahodnaść realizacyi scenara rezkaj devalvacyi biełaruskaj valuty. Takoje raźvićcio padziej, na dumku ekśpiertaŭ, nielha całkam vyklučać, adnak dla jaho raźvićcia nieabchodna jašče bolš chutkaje i maštabnaje paharšeńnie situacyi z ekspartam u Biełarusi i Rasii pry adnačasovym zališnim stymulavańni ŭnutranaha popytu.
Ciapier čytajuć
«Ja bolš nie anarchist». Mikoła Dziadok — pra turmu, Boha i rasčaravańnie ŭ ideałohijach10
Kamientary