Mitrapalit RPC Iłaryjon (Ałfiejeŭ), jaki ličyŭsia adnym z samych upłyvovych ijerarchaŭ, raniej byŭ vyzvaleny Sinodam carkvy ad abaviazkaŭ kiraŭnika adździeła zamiežnych carkoŭnych suviaziaŭ. Svajo zvalnieńnie mitrapalit źviazaŭ z «patrabavańniami ciapierašniaj hramadska-palityčnaj situacyi». Mahčyma, Iłaryjon, jakoha raniej ličyli adnym z hałoŭnych paplečnikaŭ patryjarcha, trapiŭ u niałasku z-za ŭkrainskaha pytańnia.
Na niadaŭnim pasiadžeńni Sinoda Iłaryjon, jaki ličyŭsia adnym z samych upłyvovych ijerarchaŭ RPC, byŭ vyviedzieny sa składu Sinoda, členam jakoha jon byŭ bolš za 10 hadoŭ. Taksama mitrapalita źniali z pasady kiraŭnika adździeła źniešnich carkoŭnych suviaziaŭ (heta anałah Ministerstva zamiežnych spraŭ u RPC) i pryznačyli kiraŭnikom małaznačnaj Budapiešckaj i Vienhierskaj jeparchii.
Adździeł zamiežnych carkoŭnych suviaziaŭ Iłaryjon, vypusknik Oksfarda, jaki havaryŭ na niekalkich zamiežnych movach, uznačalvaŭ 13 hadoŭ i byŭ adnym z asnoŭnych śpikieraŭ RPC pa samych raznastajnych pytańniach.
Na aficyjnych zdymkach pasiadžeńnia Sinoda RPC u Maskvie Iłaryjona taksama nie było. I heta pry tym, što mitrapalit pa paznavalnaści i cytavanaści byŭ u RPC druhoj fihuraj paśla patryjarcha. Iłaryjon rehularna źjaŭlaŭsia na telebačańni i jutub-kanałach, jon aktyŭna viadzie sacyjalnyja sietki, jaho tvorčaja aktyŭnaść (u vyhladzie muzyki, knih i filmaŭ) — zaškalvaje.
Vienhryja vyhladaje jak ssyłka dla adnaho z samych upłyvovych ijerejaŭ RPC chacia b tamu, što tam vielmi małaja pravasłaŭnaja hramada.
Iłaryjon u niadzielu paśla liturhii ŭ maskoŭskim chramie, nastajacielem jakoha jon byŭ, raźvitaŭsia z parafijanami i vykazaŭsia pra svaju adstaŭku. Pa słovach mitrapalita, jon sam «nie viedaje mnohich detalaŭ». Iłaryjon padkreśliŭ, što jamu «było skazana», što adstaŭka źviazanaja nie z pracaj u adździele zamiežnych carkoŭnych suviaziaŭ, a z patrabavańniami hramadska-palityčnaj situacyi.
«Možacie ličyć, što daroha zrabiła vielmi kruty pavarot, ja ŭ jaho nie ŭpisaŭsia i apynuŭsia na abočynie. Ale heta lepš, čym kali b ja źjechaŭ u kiuviet, mašyna b maja pierakuliłasia i vybuchnuła», — skazaŭ Iłaryjon. I adznačyŭ, što nie honicca za karjeraj.
Relihijaznaŭcy pišuć, što pryznačeńnie Iłaryjona adpaviadała jaho ŭłasnamu žadańniu. Ijerarch ni razu nie vykazvaŭsia ŭ padtrymku vajny va Ukrainie publična, zaŭsiody abychodziŭ hetuju temu, nakolki heta ŭvohule mahčyma ŭ rasijskich umovach dla pasadoŭca jaho ŭzroŭniu. Iłaryjon nikoli nie byŭ prapahandystam idei «ruskaha śvietu», jon, chutčej, byŭ zmaharom za tradycyjnyja kansiervatyŭnyja kaštoŭnaści.
U kancy maja, paśla taho, jak UPC pryniała ŭ suviazi z vajnoj va Ukrainie pastanovu ab poŭnaj niezaležnaści ad Maskvy, Iłaryjon aficyjna zajaŭlaŭ, što papraŭki, uniesienyja ŭ statut UPC, nijak nie mianiajuć jaje status samakiravanaj carkvy ŭ składzie Maskoŭskaha patryjarchatu. Sinod RPC, adnak, nie pahadziŭsia z takoj acenkaj, faktyčna nazvaŭšy hetyja źmieny nielehitymnymi. Akramia taho, jon pierapadparadkavaŭ Krymskuju jeparchiju UPC niepasredna Maskoŭskamu patryjarchatu.
Pa adnoj ź inšych viersij, Iłaryjona sasłali ŭ Vienhryju, kab jon tam staŭ asabistym pasłańnikam patryjarcha Kiryła ŭ Jeŭrasajuzie dla vykanańnia dalikatnych niepubličnych palityčnych misij. Hetuju viersiju ŭskosna paćviardžaje toj fakt, što jašče da Sinoda Iłaryjon pajechaŭ ź vizitam u Vienhryju, dzie sustreŭsia ź miascovym vice-priemjeram i padziakavaŭ «Vienhryi za ćviorduju pazicyju ŭ dačynieńni da niedapuščalnaści ŭklučeńnia Najśviaciejšaha Patryjarcha Maskoŭskaha i ŭsiaje Rusi Kiryła ŭ sankcyjny śpis ES». Ź inšaha boku, takaja viersija supiarečyć raźvitalnym słovam mitrapalita.
U časopisie Maskoŭskaj patryjarchii ŭ zahadzie ab vyzvaleńni Iłaryjona ad pasady nie ŭžyvajecca zvyčajnaja farmuloŭka «z udziačnaściu za vykananyja pracy», što taksama moža być prykmietaj apały.
Radykalnyja ŭltrakansiervatary ŭ pravasłaŭnym asiarodździ, jakija zaŭsiody ličyli Iłaryjona «zachodnikam» i «libierałam», tryumfujuć.
Iłaryjon ličyŭsia vielmi blizkim da patryjarcha Kiryła i navat pisaŭ jaho bijahrafiju, zaŭsiody karystaŭsia vysokaj padtrymkaj nie tolki najvyšejšaj carkoŭnaj ułady, ale i śvieckaj. Jon zaŭsiody paśladoŭna krytykavaŭ SSSR, stalinskija represii i vykazvaŭsia ab nieabchodnaści pachavańnia Lenina.
Pa ŭłaśniku «Softkłuba» Sirotku, jaki siadzić u SIZA KDB, prylacieła i ad Polščy — na jaho kryptabiržu Bynex nakłali sankcyi2
Kamientary