U Brytanii źmianili rekamiendacyi chvorym na artryt

Nacyjanalny instytut achovy zdaroŭja i palapšeńnia jakaści miedycynskaj dapamohi ŭ Brytanii, ličyć, što fizičnaja aktyŭnaść lepiej, čym bolesucišalnyja nakštałt paracetamołu, daść rady bolu ad artrytu, piša Times.

Nacyjanalnaja słužba achovy zdaroŭja tracić na lačeńnie artrytu 10 miljardaŭ funtaŭ u hod. Jon taksama źjaŭlajecca asnoŭnaj pryčynaj 98% vypadkaŭ zamieny kalennaha sustava, a kožnaja z takich apieracyj kaštuje 10 tysiač funtaŭ.

Ciapier miedykam parekamiendujuć prapanoŭvajuć chvorym na artryt indyvidualnuju prahramu fizičnych zaniatkaŭ — naprykład, stretčynh, johu ci taj-čy.

Ludzi z artrytam časam admaŭlajucca ad fizičnaj nahruzki, bo ruchi mohuć vyklikać časovaje ŭzmacnieńnie ich bolu. Ale jość šmat śviedčańniaŭ, što rehularnyja praktykavańni, naadvarot, dapamahajuć zrabić sustavy bolš ruchavymi i źnizić bol.

Brytanskija miedyki taksama rajać chvorym na artryt źnizić vahu cieła, bo heta, u svaju čarhu, źnižaje cisk na sustavy i ŭzrovień zapaleńnia.

I tolki kali ŭsie hetyja miery nie dapamohuć, kali artryt značna paharšaje jakaść žyćcia pacyjenta, jaho nakirujuć na zamienu sustava.

Taksama ekśpierty paraili nie ŭžyvać pry artrycie paracetamoł i hlukazamin, bo jany mała dapamahajuć sucišyć bol. Varta paźbiahać i apijoidaŭ nakštałt marfinu ci tramadołu, bo da ich moža raźvicca pryvykańnie. Zamiest hetych lekaŭ možna ŭžyvać ibuprafien — ci prymać jaho ŭ tabletkach, ci nakładvać na skuru nad sustavam maź ź ibuprafienam.

Jakaja fizičnaja nahruzka dapamoža čałavieku z artrytam

Važna, što novyja parady ad brytancaŭ — nie prosta miera ekanomii, jany nasamreč pavinny palehčyć stan pacyjentaŭ. Pra jakuju ž dakładna nahruzku idzie razmova?

Pacyjentam z artrytam rajać pryśviačać kala 150 chvilin na tydzień aerobnaj nahruzcy siaredniaj intensiŭnaści, a taksama dvojčy na tydzień rabić siłavyja praktykavańni. Lepiej vybrać nahruzku nakštałt płavańnia ci katańnia na viełasipiedzie zamiest čahości, što bolš nahružaje sustavy, naprykład, zamiest biehu.

Dobry efiekt pakažuć praktykavańni, źviazanyja z raściažkaj dla ŭsiaho cieła — takuju nahruzku možna atrymać na jozie ci taj-čy. Miedyki tłumačać, što kali zhinać i vyprostvać sustavy, možna daŭžej zachavać ich ruchavaść.

Nie treba admaŭlacca i ad nahruzki, źviazanaj z našeńniem čahości ciažkaha — naprykład, ad našeńnia torb z praduktami z kramy. Takija rečy dapamahajuć zachoŭvać moc u muskułach, što taksama dobra ŭpłyvaje na sustavy.

I navat kali pacyjentam z artrytam zusim ciažka ruchacca, jany mohuć vykonvać samyja prostyja praktykavańni, prosta siedziačy na kreśle.

Zhodna ź niadaŭnim daśledavańniem, apublikavanym u časopisie Arthritis Research & Therapy, starejšyja za 60 hadoŭ ludzi, jakija majuć rehularnuju fizičnuju nahruzku, na 25% mienš pakutujuć na bol u muskułach i sustavach, čym tyja, chto ruchajecca mała.

«Našu Nivu» finansujuć jaje čytačy — padtrymać prosta

Čytajcie taksama:

Nazvany lohki i efiektyŭny sposab padoŭžyć žyćcio

Našto paryć nohi ŭ vocacie? Prosty srodak ad prablem, pra jakija nie pryniata havaryć

• 6
• 0
• 0
• 4
• 0
• 3
• 0
• 0