Punkt dla mihrantaŭ u «Bruzhach» spyniŭ pracu. Ich tam bolš niama
U transpartna-łahistyčnym centry «Bruzhi» spyniŭ pracu punkt raźmiaščeńnia mihrantaŭ. Usie zamiežniki, jakija časova znachodzilisia ŭ centry, pakinuli jaho.
Pra heta paviedamiła pres-słužba Dziaržpahrankamiteta Biełarusi.
22 sakavika 98 mihrantaŭ vylecieli evakuacyjnym rejsam ź Minska ŭ Irbil u 02.55. Viartańnie na radzimu było arhanizavanaje ŭ ramkach prahramy dapamohi mižnarodnaj arhanizacyi pa mihracyi.
«Astatnija zamiežniki pa ich prośbie časova raśsielenyja ŭ haścinicach i sanatoryjach dla čakańnia nastupnych vyvaznych rejsaŭ», — paviedamiŭ DPK.
Napiaredadni ŭ Nacyjanalny aeraport «Minsk» prylacieŭ samalot avijakampanii Fly Baghdad. Jaho nie było ŭ raskładzie, pryziamleńnie nie adlustroŭvałasia na tabło prylotaŭ.
Pavodle źviestak na 20 sakavika, u TŁC «Bruzhi» zastavalisia 409 mihrantaŭ.
***
Paśla ŭviadzieńnia ŭletku sankcyj Łukašenka paabiacaŭ, što Biełaruś bolš nie budzie strymlivać mihrantaŭ, jakija sprabujuć trapić praź jaje terytoryju ŭ Jeŭrasajuz. Spačatku cisk išoŭ na litoŭskuju miažu, potym na polskuju. Z kožnym dniom kolkaść mihrantaŭ na miažy rasła.
Situacyja na biełaruska-polskaj miažy abvastryłasia 8 listapada. Vialikaja kałona mihrantaŭ pryjšła na niejtralnuju terytoryju pobač z punktam propusku «Bruzhi». Adnak kala pamiežnaha pierachoda mihranty zbočyli ŭ les, raźbiŭšy tam łahier. Kolkaść ludziej tam aceńvałasia ŭ niekalki tysiač čałaviek, pryčym bolšaść składali irakskija kurdy.
Ludzi siekli drevy, palili vohniščy, parušajučy tym samym zakanadaŭstva, ale biełaruskija siłaviki nijak nie reahavali na dziejańni mihrantaŭ.
15 listapada zamiežniki pakinuli stychijny łahier i sabralisia ŭ punkcie propusku «Bruzhi». 16 listapada mihranty pasprabavali prarvacca praź biełaruska-polskuju miažu. Jany kidali ŭ polskich siłavikoŭ kamiani. Tyja ŭžyli ŭ adkaz vadamioty i ślozaciečny haz.
Uviečary 16 listapada, paśla šturmu miažy i pahromu ŭ Bruzhach, mihrantaŭ zaprasili ŭ pamiaškańnie transpartna-łahistyčnaha centra «Bruzhi». Tam im vydali matrasy, paviedamili, što možna zastavacca kolki patrebna. Častka ludziej «pierajechała» ŭ pamiaškańnie, častka zastałasia ŭ namiotach la miažy.
Pastupova vakoł TŁC pačała vyrastać infrastruktura. Zapracavali palavyja kuchni, viałosia miedabsłuhoŭvańnie. Da mihrantaŭ pryjazdžali čynoŭniki, deputaty, pryjechaŭ i Łukašenka.
Paralelna mihrantaŭ evakuacyjnymi rejsami vyvozili na radzimu. Łahier u «Bruzhach» praisnavaŭ bolš za čatyry miesiacy.
Na abiedzie Łukašenki i Si Czińpina prysutničała i adzinaja dačka kitajskaha lidara11
Kamientary