Biełaruski prahramist z Google achviaruje Ukrainie miesiačny zarobak — $20 tysiač: «Ja raniej nie vieryŭ, što Rasija nienavidzić usio nierasijskaje»
Mikita Biełahłazaŭ — biełarus, jaki z 2015 hoda žyvie ŭ Kalifornii, pracujučy na kampaniju Google. Uzrušany zachopnickaj vajnoj Rasii suprać Ukrainy, jon vyrašyŭ adrazu ž achviaravać svoj miesiačny zarobak na patreby susiedniaj krainy. Mikita tłumačyć «Našaj Nivie», čamu jon heta robić.
«Sam ja naradziŭsia i vyras u Minsku. Chadziŭ u Licej BDU, a potym na FPMI BDU. Achviaravać vyrašyŭ pa šerahu pryčyn.
Pa-pieršaje, kab choć jak niebudź dapamahčy Ukrainie ŭ hetaj biessensoŭnaj vajnie.
Nam, biełarusam, niahledziačy na toje, što nas nichto nie pytaŭ pra vajnu, budzie treba adnaŭlać adnosiny z ukraincami. I heta moj taki asabisty ŭkład u hetuju spravu», — kaža jon.
«Ja piersanalna raniej nie vieryŭ, što Rasija ahresar i nienavidzić usio nierasijskaje. Kali ŭ nas u 2020 kazali, što Pucin uviadzie vojski ŭ vypadku ŭzbrojenaha supracivu — ja byŭ skieptyčny.
Ale ciapier razumieju, što kali na Ukrainu napali prosta tak, faktyčna, za toje, što jany ŭkraincy i chočuć žyć u svajoj krainie, to dla mianie tut užo niama iluzij, čaho Rasija choča ad Biełarusi. Nam budzie ciažka adstajać svaju krainu i kulturu, kali Ukraina prajhraje», — tłumačyć jon.
«Situacyja va Ukrainie vyklikaje ŭ mianie emocyi prykładna jak naš žnivień 2020-ha, ale situacyja, kaniečnie, kudy horšaja, choć jana i «tam», a nie ŭ Biełarusi.
Ale ž my vučyłysia być nie chataskrajnikami u 2020-m… Tamu robim mahčymyja ŭčynki dla padtrymki z zamiežža: padtrymlivać finansava, dabivacca ad krainy, dzie my žyviom, bolšaj padtrymki Ukrainy, chadzić na łakalnyja mitynhi.
I, kaniečnie, spadziajusia, što moj prykład natchnić jašče kaho-niebudź achviaravać. Kali vakoł ciabie ludzi publična niešta robiać, to i samomu lahčej pačać heta rabić. U maim kankretnym vypadku heta budzie trochu mienš za 20 tysiač dołaraŭ», — kaža Mikita.
«Letaś ja pierajšoŭ na biełaruskuju movu ŭ pierapiscy. A sioleta płanuju pačać razmaŭlać, i ciapier, naturalna, pierachod adbyvajecca chutčej, čym płanavałasia», — reziumuje prahramist.
Ciapier čytajuć
Stalinista-jabaćku z Homiela zatrymali paśla taho, jak jon zaprasiŭ Łukašenku na hvałtoŭnaje zakryćcio svajho treciaha kafe26
Kamientary