Raspačata 9 kryminalnych spraŭ, źviazanych z praviadzieńniem refierendumu: što viadoma pra zatrymanych?
KDB Biełarusi 20 lutaha paviedamiŭ ab zatrymańni ŭdzielnikaŭ hrup, jakija płanavali «zryŭ refierendumu pa źmienach i dapaŭnieńniach u Kanstytucyju». Supraćpraŭnyja dziejańni hetych ludziej zaklučalisia ŭ rassyłcy listoŭ z zaklikam da siabroŭ vybarčych kamisij «ličyć hałasy sumlenna».
Uviečary ŭ efiry prahramy «Kontury» na ANT byŭ pakazany siužet z zatrymanymi pa hetaj spravie. Usim im moža pahražać da piaci hadoŭ kałonii pa č. 2 art. 191 Kryminalnaha kodeksa (Pieraškoda ažyćciaŭleńniu vybarčych pravoŭ, prava na ŭdzieł u refierendumie, albo realizacyi prava zakanadaŭčaj inicyjatyvy hramadzian, albo rabocie CVK, vybarčych kamisij, kamisij pa refierendumie, kamisij pa praviadzieńni hałasavańnia ab adklikańni deputata).
A jašče raniej MUS paviedamiŭ ab tym, što ŭ Biełarusi raspačali dzieviać kryminalnych spraŭ, źviazanych z praviadzieńniem respublikanskaha refierendumu.
Načalnik Hałoŭnaha ŭpraŭleńnia achovy pravaparadku i prafiłaktyki milicyi hramadskaj biaśpieki MUS Alaksandr Kupčenia paviedamiŭ na pres-kanfierencyi, što ŭ Biełarusi raspačali dzieviać kryminalnych spraŭ, źviazanych z kanstytucyjnym refierendumam, pryznačanym na 27 lutaha.
Žurnalisty pasprabavali pravieści rasśledavańnie i znajści niejkuju dadatkovuju infarmacyju pra hetych ludziej.
A što viadoma pravaabaroncam pra tych, chto nibyta rassyłaŭ listy, u jakich zaklikali siabroŭ vybarčych kamisij «ličyć hałasy sumlenna»?
Praŭda, u videasiužecie hučać proźviščy nie ŭsich zatrymanych pa spravie, niekatoryja asoby nie nazyvajucca. Tym nie mienš…
Adzin z zatrymanych — Viačasłaŭ Daškievič, žychar Minska. Zatrymlivaŭsia jašče ŭ 2010 hodzie padčas hrubaha razhonu mirnaj akcyi ŭ stalicy. Byŭ aryštavany na 15 sutak, potym u 2013 hodzie jaho zatrymali kala Savieckaha RUUSa Minska, dzie jon manitoryŭ zatrymańni padčas «Čarnobylskaha Šlachu». Tady jamu prysudzili 5 sutak aryštu.
Nastupny — Michaił Chamicevič, nazvany uładalnikam firmy. Viadoma, što Michaiła zatrymlivali ŭ Minsku 8 listapada 2020 hoda. Jon atrymaŭ 15 sutak za parušeńnie paradku arhanizacyi i praviadzieńnia masavych mierapryjemstvaŭ pa č. 1 art 24.23 KaAP.
Ź videa vynikaje, što siarod zatrymanych — dvoje supracoŭnikaŭ jaho firmy. Adnaho ź ich pakazvajuć sa śpiny.
Pra Ramana Karpuka ŭ siužecie paviedamili, što jon źjaŭlajecca studentam 1-ha kursa z Bresta. Viadoma taksama, što junaka zatrymlivali 20 vieraśnia 2020 hoda. Niekalki sutak jon pravioŭ u Žodzinskim IČU i ŭ vyniku byŭ pakarany štrafam.
Pra jaho maci, pakazanuju ŭ siužecie, pakul ničoha nieviadoma.
Jašče pra adnaho ź piersanažaŭ siužeta dziaržaŭnych prapahandystaŭ, Taćcianu Zajac było paviedamlena, što jana nieadnarazova zatrymlivałasia za ŭdzieł u pratestnych akcyjach.
Pravaabaroncam viadoma pra zatrymańni Zajac ŭ Minsku 6 i 13 vieraśnia 2020 hoda. Jana atrymlivała štrafy pa artykule 24.23 KaAP (parušeńnie paradku arhanizacyi i praviadzieńnia masavych mierapryjemstvaŭ).
Pra Mikałaja Karabko, jakoha pa infarmacyi KDB zatrymali pry pierasiačeńni polskaj miažy, viadoma, što jon nibyta pracuje taksistam. Pa źviestkach pravaabaroncaŭ, zatrymlivaŭsia 9 žniŭnia 2020 hoda.
Kaciarynu Kupryjanavu nazyvajuć supracoŭnicaj banka, u jakoj znajšli listy, adrasavanyja sudździam. Pra jaje pakul ničoha nie viadoma.
Čytajcie taksama:
Pajšoŭ rehistravacca naziralnikam na refierendumie i… źnik
«Usie pad kaŭpakom, śpisy jość». Čamu pierad refierendumam da biełarusaŭ prychodziać siłaviki
«Nielicieprijatno» vykazaŭsia pra Usiebiełaruski narodny schod». Piensijanieru pahražaje da piaci hadoŭ turmy
Chrysta Hrozieŭ: Mielnikava jak minimum hod, a chutčej za ŭsio, paŭtara pieradavała infarmacyju biełaruskim śpiecsłužbam36
Kamientary