Režysior Andrej Kurejčyk zdymaje mastacki sieryjał pra Akreścina. Zdymki prachodziać u Litvie ŭ Łukišskaj turmie. Dniami apublikavali anons. Mnohija ŭbačyli ŭ im zusim nie toje, što čakali.
Na kadrach — sceny rasstrełu źniavolenych. Mienavita heta najbolš aburyła ludziej. Pad videa u Fejsbuku źjavilisia hnieŭnyja vodhuki.
«Navošta zdymać pra toje, čaho nie było (rasstreły)? Kab paśla łukašenkaŭcy kazali, što naohuł ničoha nie było i ŭsio mastackaja vydumka», — napisaŭ ekanamist Leŭ Lvoŭski.
«Toje, što ja baču ŭ kadrach hetaha rekłamnaha videa, amaralnaje i antymastackaje vidovišča. Zdymać takija komiksy ŭ čas, kali ludzi realna, a nie pa-kinošnamu, pakutujuć na Akreścina, heta horš za Azaronka, bo toj chacia b ščyra vieryć u toje, što robić, a tut hoły chajp na kryvi. Za scenu rasstrełaŭ stvaralnikam filma asobny pryviet. Vy chacia b čytali, jak rasstrelvajuć u turmach? Pačytajcie. Moža, stanie soramna pierad pamiaćciu tych, kaho stralali», — vykazałasia ŭ kamientaryjach Hanna Sieviaryniec.
«Što vy z nami robicie? Navošta zdymać chłuśniu i ŭvohule ździekavacca z taho, što pa-siońniašni dzień balić…» — pakinuła vodhuk minčanka, jakaja sama była ŭ izalatary.
«Škada, što instytut reputacyi nie pracuje takim čynam, kab u Andreja Kurejčyka nie źjaŭlalisia hrošy na čarhovaje nizkasortnaje kino, tym bolš pra rvanuju ranu Akreścina», — žorstka vykazałasia kinakrytyk Irena Kaciałovič.
Uźniałasia dyskusija pra toje, jak naohuł ekranizavać hetuju temu i ci varta jaje ciapier čapać.
«Ja ŭ šoku. Dumała, što heta zastaniecca na stadyi «idei», ale nie. Andrej Kurejčyk zdymaje mastacki sieryjał «Akreścina». Kamu vajna, kamu maci rodnaja», — emacyjna napisała pravaabaronca Taćciana Hacura-Javorskaja.
Razam z tym mnohija kamientatary miarkujuć, što balučaja i składanaja tema pavinna adlustroŭvacca ŭ kino — i dakumientalnym, i mastackim. Hałoŭnaje, kab heta było zroblena jakasna.
Sieryjał pra Akreścina zdymajecca sumiesna ź miedyja «Małanka». Pradziusieram staŭ kiraŭnik «Małanki» Pavieł Marynič, kampazitaram — Dźmitryj Fryha.
«Časam ja sam sabie zadaju pytańnie: čamu mienavita ciapier, u samy zmročny pieryjad reakcyi, u samy ciomny, djabalski, ciemrašalski čas, kali kožny čych — heta nahoda dla raspravy, zdymaju prajekt «Akreścina» — pieršaje biełaruskaje hulniavoje mastackaje kino pra padziei 2020 hoda? — pisaŭ raniej u fejsbuku Andrej Kurejčyk. — Adkazvaju sabie tak: ja biełarus. Ja dramaturh i režysior. Ja mastak. Ale pierš za ŭsio ja čałaviek. Ja adčuvaju bol, a mastactva dramy jašče ad Eschiła — heta pra bol, pra supieražyvańnie, spačuvańnie i spahadu.
Kali cełyja pakaleńni mastakoŭ, piśmieńnikaŭ, kiniematahrafistaŭ pisali i zdymali pra svoj bol ad žachaŭ Druhoj suśvietnaja vajny — heta było ščyra. Vasil Bykaŭ, Adamovič, Šapićka, Vozieraŭ, Kałatozaŭ, Śmirnoŭ, Klimaŭ, Hierman, Rom. Jany nie mahli pramaŭčać pra toje, što bačyli na svaje vočy. Kožny ź ich zrabiŭ svajo vykazvańnie. Asabistaje i ščyraje.
Ja taksama nie mahu maŭčać pra toje, što adbyvajecca ciapier. Vializnaja kolkaść hvałtu, bolu, nianaviści, žorstkaści, jakaja natykajecca na ašałamlalnyja prykłady advahi, pryncypovaści, siły, čałaviekalubstva…
Biełaruskaja nacyja vypłaŭlajecca i kujecca na Akreścina, u turmach, CIPach, IČU, izalatarach. U vializnym łukašenkaŭskim «hułahu» prosta ciapier… Heta patrabuje mastackaha adlustravańnia. Mnie niama sensu nikoha pierakonvać, dzie dabro, a dzie zło. Chto robić čerń. Chto łamaje losy nievinavatych ludziej. Adkul u maleńkaj krainie ŭziałasia samaja vialikaja kolkaść palityčnych źniavolenych za ŭsiu paślavajennuju historyju ŭ Jeŭropie. Čamu ŭ 21 stahodździ luboje inšadumstva — heta kryminalnaje złačynstva. Pra heta ŭsie ŭsio viedajuć i ŭsio razumiejuć. I ŭ Biełarusi, i pa-za joj. Maja zadača — pakinuć mastackaje adlustravańnie hetaj važnaj historyi dla ciapierašnich i budučych pakaleńniaŭ biełarusaŭ».
Kamientary