«Ambułatoryju adramantavali, a pracavać niama kamu». Jak žyviecca ŭ ahraharadku, dzie znachodzicca rezidencyja Łukašenki
Jak žyviecca pobač z rezidencyjaj Łukašenki? Na što skardziacca žychary Astrašyckaha haradka? Kolki tut kaštuje žyllo? Adkazy na pytańni pašukali žurnalisty realt.by.
Kolki tut kaštuje žyllo?
U novym žyłym kompleksie dva panelnyja piacipaviarchoviki i try damy ŭ try pavierchi. Tut za 86-mietrovuju trochpakajoŭku prosiać 68 tysiač dalaraŭ. A za 50 tysiač dalaraŭ možna nabyć 49-mietrovuju adnapakajoŭku z sučasnym ramontam.
Budavaŭ žyły kompleks UKB Minabłvykankama. U razhar prodažaŭ pieršych damoŭ u 2017 hodzie mietr u trochpaviarchovikach kaštavaŭ u rajonie $800.
Pobač znachodziacca amal usie nieabchodnyja abjekty infrastruktury: supiermarkiet, novy łaźnievy kompleks i ambułatoryja (niekalki hadoŭ tamu jaje taksama adramantavali).
U inšym piacipaviarchovym domie, pabudavanym u 2010 hodzie, taksama pradajecca niekalki kvater. Ciapier tut pradstaŭleny adrazu try dvuchpakajoŭki z ramontam: za 55, 56 i 60 tysiač dalaraŭ.
Za 250 tysiač dalaraŭ možna nabyć voś taki niedabudavany katedž ź cikavaj płaniroŭkaj.
A voś hety ścipły domik sa šłakobietonu pradajecca za 41,5 tysiačy dalaraŭ.
Kampramisny varyjant — całkam hatovy da pražyvańnia trochuzroŭnievy katedž z błokaŭ — za 150 tysiač dalaraŭ.
Kala darohi R40 try hady tamu pabudavali liniejku ź dziesiaci błakiravanych damoŭ. Usie dvuchpaviarchovyja taŭnchausy (kožny pa 150 «kvadrataŭ») adyšli minčanam ź liku šmatdzietnych siemjaŭ.
Siońnia damy ŭžo abžytyja, bačna, što mnohija navasielcy zrabili z adkrytych teras na druhim paviersie dadatkovyja pakoi.
Niezdalok ad katedžaŭ znachodziacca habrejskija mohiłki.
A voś tak vyhladaje škoła, dzie vučyŭsia Mikałaj Łukašenka — vialiki budynak na ŭzvyššy.
Što kažuć miascovyja žychary
«Łaźnievy kompleks u nas dobry. Mnohija tudy chodziać, chvalać. A voś dziciačy sadok, viedajem, zabity. Damoŭ vakoł šmat nabudavali, a sadok usiaho adzin.
Kłub naohuł začyniŭsia, jaho pieranieśli ŭ staruju škołu, tam niešta abvaliłasia, ciapier ramantujuć. Kram mała, adzieńnia nie kupić, — skardziacca žurnalistam ludzi. — Ambułatoryju adramantavali niadaŭna, voś tolki pracavać niama kamu. Na ŭvieś pasiołak zastalisia doktar, akušerka i stamatołah. Pryčym apošni pracuje nie kožny dzień. A tak — usio ŭ nas dobra. Niama takoha, kab krali ci pili šmat. U dvary ŭsio možna pakinuć i nie začyniać, nichto nie ŭkradzie. Transpart da nas chodzić narmalna».
Alena raskazvaje, što pierajechała ŭ Astrašycki Haradok ź Minska. Tut jany z mužam žyvuć va ŭłasnym domie.
«Miescy tut pryhožyja, reljef — prosta abałdzieny. Niezdarma pobač usie harnałyžnyja kurorty. Da Minska 15 chvilin na mašynie, chodziać maršrutki i aŭtobusy. Usie darohi rehularna čyściać, śmiećcie vyvoziać, navat 1 studzienia pryjazdžali. Jeździć na pracu ŭ horad — biez prablem. Ranicaj źjechaŭ, a ŭviečary viartaješsia, i ŭ ciabie znoŭ zaharadnaje žyćcio. Tak, mahčyma, tut niama kaviarniaŭ, jak u Minsku, prosta kala doma. Ale zatoje tut zusim blizka Raŭbičy, možna pakatacca na łyžach pa lasnych trasach, a potym schadzić u armianskaje kafe abo piceryju», — kaža žančyna.
Astrašycki Haradok — centr sielsavieta, jaki raźmiaściŭsia na ziemlach płoščaj bolšaj za 5 tysiač hiektaraŭ. U 16 nasielenych punktach pražyvaje kala 6 tysiač čałaviek. U samim Haradku — kala 2,5 tysiačy.
Na terytoryi kompleksu «Aziorny» niedaloka ad Astrašyckaha Haradka znachodzicca rezidencyja Łukašenki. Heta adrestaŭravanaja siadziba pałacava-parkavaha ansambla hrafaŭ Tyškievičaŭ. Siadziba była zasnavana ŭ XVII stahodździ.
Tut Łukašenka nie tolki žyŭ doŭhi čas, ale i prymaŭ zamiežnych haściej, u tym liku akciora Žerara Depardźje, jakomu padaryŭ učastak ziamli pad Minskam.
Kamientary