Va Ukrainie aburylisia «karykaturnym vobrazam ukrainki» ŭ papularnym sieryjale Netflix
Hierainia-ŭkrainka ŭ novym siezonie sieryjała Netflix «Emili ŭ Paryžy» vystaŭlenaja jak nie nadta adukavanaja dziaŭčyna, jakaja moža ŭkraści, choča atrymlivać usio zadarma, baicca departacyi. Ministr kultury Ukrainy Alaksandr Tkačenka ličyć taki vobraz karykaturnym i abraźlivym.
Na dumku Tkačenki, u cełym sieryjał davoli niadrenny i zabaŭlalny, ale ŭ novym siezonie jaho aŭtary apynulisia ŭ pałonie haniebnych stereatypaŭ. Jon aburajecca:
U «Emili ŭ Paryžy» — karykaturny vobraz ukrainki, što nieprymalna. A ź inšaha boku, jon jašče i abraźlivy. Voś takimi buduć bačyć ukraincaŭ za miažoj? Jakija kraduć, chočuć atrymlivać usio biaspłatna, bajacca departacyi? Tak być nie pavinna.
Tkačenka ŭpeŭnieny, što Netflix dobra znajomy z Ukrainaj i moh by nie dapuskać padobnych pamyłak. I nastrojeny dziejničać rašuča: «Pryjdziecca praciahvać zmahacca sa stereatypami… Nakiruju tekst našaj pazicyi Netflix».
U druhim siezonie sieryjała «Emili ŭ Paryžy», jaki ŭvachodzić u top-10 samych papularnych sieryjałaŭ Netflix, jaho aŭtary ŭviali novaha piersanaža — ukrainku pa imieni Pietra, jakaja pryjechała ŭ Paryž z Kijeva. Hałoŭnaja hierainia sieryjała Emili paznajomiłasia ź joj na kursach francuzskaj movy ŭ čaćviortaj sieryi. Dziaŭčaty adpraŭlajucca razam na prahułku, kab papraktykavacca ŭ movie. I Pietra šakuje Emili svaim nievuctvam.
Ciapier čytajuć
U Minsku pamior adzin z samych viadomych zabojcaŭ Rasii. Jon žyŭ pad čužym imieniem i staŭ piśmieńnikam-fantastam5
Kamientary