Što adbyvajecca ŭ biełaruskaj ekanomicy i ci buduć źmieny ad padpisańnia sajuznych prahram? Razvažajuć Čały i Alachnovič
Što ciapier ź biełaruskaj ekanomikaj, čamu navat čynoŭniki nie śpiašajucca z padatkam na kvateru i ci daść Pucin hrošy ŭ abmien na padpisańnie sajuznych prahram? Pra heta ŭ strymie razvažali pradstaŭnik ofisa Cichanoŭskaj pa ekanamičnych reformach Aleś Alachnovič i analityk Siarhiej Čały. Zapisali samaje cikavaje.
Kryzis, jaki čakaje ludziej, budzie padobny da situacyi 2015-2016 hadoŭ, jak miarkuje Siarhiej Čały.
«Što važna mieć na ŭvazie — kryzis absalutna rukatvorny. Jon pačaŭsia jak kryzis lehitymnaści jak znutry, tak i zvonku. Ciapier zakrytyja rynki kapitału za vyklučeńniem Rasii. A prablema sa źniešnim doŭham nikudy nie dziełasia.
Srodki treba niedzie znachodzić, a značyć ich treba vymać z ekanomiki, što jašče bolš pryhniataje ekanamičnuju aktyŭnaść unutry krainy.
Taki paradaksalny kryzis: kali spryjalnyja ličby źniešnie maskirujuć absalutna nienarmalnuju situacyju znutry. Pakul nie źjavicca davier inviestaraŭ da palityki, jakaja pravodzicca, pakul ludzi nie pierastanuć bajacca za svaje dachody i źbieražeńni, hety kryzis nie moža skončycca», — kaža jon.
«Sposabaŭ znajści hrošy, jakija nie pahoršyli b situacyju, zusim niašmat»
Suśvietnaja ekanomika ciapier pakazvaje burny rost — 6%. Kali b u biełaruskaj ekanomicy nie było chraničnych prablem i palityčnaha abvastreńnia, jana mahła b prybaŭlać 7-9%, pryvodzić ličby Čały. Sam pa sabie hety kryzis nie vyrašycca — jakraz praz adsutnaść davieru.
«Ułada robić usio, kab raskołvać hramadstva na svaich i čužych. I ŭ takoj situacyi niemahčyma budavać dobruju ekanomiku, sučasnuju adukacyjnuju sistemu, IT-dziaržavu», — ličyć Aleś Alachnovič.
U takim vypadku papoŭnić biudžet za košt pavyšeńnia padatkaŭ i admieny lhot prablematyčna.
«Sami čynoŭniki, razhladajučy metazhodnaść takoha rašeńnia, jak zdymać padatak z adzinaj kvatery, unutry siabie pryjšli da vysnovy, što ŭvodzić jaho z pačatku nastupnaha hoda nie varta, bo sacyjalnyja nastupstvy buduć tolki horšymi, a źbiarom kapiejki. I było prapanavana adkłaści heta rašeńnie chacia b da 2023 hoda.
Sposabaŭ znajści hrošy, jakija nie pahoršyli b situacyju, zusim niašmat. Mohuć być varjackija idei zamarozki ŭkładaŭ, pieraŭtvareńnia valutnych układaŭ u rublovyja pa kursie Nacbanka, ale nastupstvy ich mohuć stać razburalnymi na doŭhija hady», — razvažaje Čały.
«Rasija nie vieryć, što Łukašenka hetyja prahramy vykanaje»
Łukašenka padpisaŭ dekret, što zaćviardžaje sajuznyja prahramy z Rasijaj. Ci značyć heta, što novy kredyt ad Pucina nie za harami? Ekśpierty nastrojeny skieptyčna.
«Na sustrečy ŭ vieraśni Rasija paabiacała Biełarusi $630-640 młn da kanca nastupnaha hoda. Heta mienš čym toje, što štohod Biełaruś pavinna vypłačvać Rasii za pracenty i kredyty.
Kali b heta intehracyja była čymści istotnym, kali b Rasija vieryła Łukašenku, dumaju, jana hatova była b padtrymać jaho, kab zabiaśpiečyć stabilnaść u ekanomicy. Kali hetaha niama, značyć Rasija nie vieryć, što Łukašenka hetyja prahramy vykanaje», — kaža Alachnovič.
«Zastałosia niekalki pryncypovych pytańniaŭ, jakija jak nie byli vyrašany ŭ 2005-m, tak nie vyrašany i dahetul. Tudy prosta dadali niekalki momantaŭ, jakija i tak dastatkova vidavočnyja. Ujavicie: u vas jość try nievyrašalnyja pytańni, 27 vyrašalnych, vyrašajecie ich i kažacie, što niečaha damahlisia.
Nasamreč nijakaha prasoŭvańnia niama. I heta važny momant. My nie bačym imknieńnia da abjadnańnia biudžetu, centrabankaŭ. Maksimum, što tam źjaŭlajecca ciapier, — heta składana nazvany sposab Rasii pazakryvać vialikuju kolkaść schiem, jakija dazvalali nažyvacca asobnym nabližanym kampanijam u Biełarusi, — dzielicca Čały. — Nie baču, što ŭsurjoz źmianiajecca dla Biełarusi ŭ paraŭnańni z usimi papiarednimi hadami.
Maksimum, što Rasija moža dać, heta hrošaj dla taho, kab nie zdaryłasia defołtu pa ŭsich papiarednich daŭhach, jakija Biełaruś joj vinnaja. Minimalny ŭzrovień padtrymańnia štanoŭ — adzinaje, što hatova Rasija apłačvać. Nijakaha raźvićcia za hetym nie staić. Heta kansiervacyja situacyi».
«Ja nie bomž, u mianie navat biełyja škarpetki». U Minsku dziaŭčyna z Łuhanska raskłała pałatku prosta ŭ padjeździe šmatpaviarchovika, ustryvožyŭšy žycharoŭ2121
Kamientary