Ejsmant raskazała, jak niadaŭna chvareła na karonu: Łukašenka asabista sačyŭ za chodam jaje chvaroby
Natalla Ejsmant dała nievialikaje intervju telekanału «Biełaruś 1», u jakim pryznałasia, što zusim niadaŭna pierachvareła na karanavirus. Pres-sakratarka Łukašenki adznačyła, što vostraja faza chvaroby ciahnułasia 2,5 dnia. U hety čas jana lažała ŭ balnicy. A za chodam chvaroby padnačalenaj sačyŭ sam Łukašenka.
«Jon sačyŭ za chodam ciačeńnia majoj chvaroby. U pieršuju čarhu, kab razumieć tendencyi, razumieć pavodziny siońniašniaha štama, jaki zaraz cyrkuliruje, — skazała Natalla Ejsmant. — Vostraja faza ciahnułasia litaralna niekalki dzion.
Daktary ŭžo dobra znajomyja z karanavirusam. Našy daktary ŭžo ŭmiejuć jaho lačyć. Tamu, viadoma, taja faza, što patrabuje znachodžańnia ŭ balnicy, samaja vostraja faza, ciahnułasia litaralna 2-2,5 dnia. Paśla hetaha, kali stała značna lahčej (vy razumiejecie, doma dapamahajuć i ścieny, vielmi chaciełasia dadomu), viadoma, kali heta było mahčyma, daktary mianie z balnicy vypuścili.
Doma… Usio, jak rekamiendujecca, usio pa kłasicy žanru. Ja starałasia jak maha bolš dychać pavietram, prytrymlivacca ŭsich parad daktaroŭ. Ale vieści taki aktyŭny ład žyćcia. Heta sapraŭdy vielmi dapamahło. Jak bačycie, niekalki dzion u špitali, potym niekalki dzion uznaŭleńnia doma. I litaralna ŭ chutkim časie ja była na pracy. Biezumoŭna, nie padviarhajučy nikoha nijakaj niebiaśpiecy».
Cikava, što na źlivach aŭdyjarazmoŭ za listapad minułaha hoda hołas, padobny da hołasa Natalli Ejsmant, kazaŭ pra adsutnaść pachaŭ: «Mnie ŭsio roŭna padajecca, što heta voś jano». Havorka niedvuchsensoŭna išła pra karanavirus.
Ale tady Łukašenka jašče nazyvaŭ karanavirus «psichozam». Jak stała viadoma z zapisaŭ razmoŭ, što trapili ŭ sietku, na toj momant topavyja čynoŭniki chadzili na pasiadžeńni biez masak, a pryznavacca ŭ chvarobie Łukašenku bajalisia.
Kamientary