Žonka biznesmiena Juryja Dańkova: «Taki Apałon, na serca nikoli nie skardziŭsia, a tut nie vytrymała»
Biznesmien Juryj Dańkoŭ, były ŭładalnik lehiendarnaha «Dańkoŭ-kłuba», pamior ad karanavirusa. Mužčynu było 58 hod. Žonka Ludmiła raskazała pra jaho apošnija dni ŭ balnicy. Jaje i Dańkova lačyli ŭ Homieli.
«Tempieratura 40 u Jury niekalki dzion trymałasia. My ź im razam zachvareli i tydzień da balnicy byli doma. U mianie niejak lahčej prajšło, a Juryju stanaviłasia tolki horš i horš. Prychodzili daktary z palikliniki, ale adekvatnaha lačeńnia naznačana nie było.
Napeŭna, heta interny z univiera — maładyja, niavopytnyja. Adzin doktar navat pry nas telefanavaŭ kansultavacca ź niekim, — uzdychaje Ludmiła. — Try razy ja chutkuju vyklikała — jana pryjechała tolki na treci dzień da nas.
U Homieli ŭsie balnicy zabityja. Tamu Juryja špitalizavali tudy, dzie byli miescy — u abłasny špital invalidaŭ Ajčynnaj vajny. Jon tam apošnija dni svaje pravioŭ…
U balnicu jon patrapiŭ 27 vieraśnia. Pakłali ŭ ahulnuju pałatu, a 2 kastryčnika jamu stała horš, upała saturacyja, i jaho pieraviali ŭ reanimacyju. 10 dzion lažaŭ na ŠVŁ. Jaho nie stała 13 kastryčnika. Arhanizm źniasileŭ, nie vytrymaŭ…
Kankretnaj pryčyny daktary nie kažuć — prosta asłabieła serca. Ja ździŭlena, bo kali vy ŭjaŭlajecie Juryja Dańkova, heta prosta Apałon, taki mužčyna zdarovy, dužy. Na serca jon nikoli nie skardziŭsia».
Dańkoŭ tolki dva hady tamu vyjšaŭ z turmy, dzie pravioŭ 7 hod. Jaho asudzili pa niekalkich artykułach, siarod jakich uchileńnie ad vypłaty padatkaŭ, uciahvańnie ŭ prastytucyju, padrobka dakumientaŭ. Da pandemii pracavaŭ u turyźmie.
«Pieršy čas paśla viartańnia adtul, zrazumieła, była adaptacyja, adnaŭleńnie, — zhadvaje žonka. — Bo za siem hod, što jon tam pravioŭ, i technałohii daloka napierad kročyli, i ŭzrovień žyćcia. Jon pa sutnaści pieršy hod reabilitavaŭsia.
Ale taki čałaviek dziejny i enierhičny, jak Jura, nie siadzieŭ biez spravy, paralelna šukaŭ niejkija biznesy. Chacieŭ siabie prymianić u takich kirunkach, jak zialonaja enierhietyka, budaŭnictva damoŭ ź mietałaprofilu. Heta pierśpiektyŭny kirunak — my ź im navat u Turcyju jeździli, stanki razhladali dla vytvorčaści.
Paśla ŭsiaho, što ź im zdaryłasia, jon vielmi aściarožna da kłubnaj śfiery staviŭsia. Tolki jak hość byvaŭ. Tak, kab samomu adnaŭlać — viedaju, što nie płanavaŭ».
Raźvitańnie ź Juryjem Dańkovym adbudziecca ŭ niadzielu 17 kastryčnika a 12-j hadzinie ŭ Minsku, u rytualnaj zale na Alšeŭskaha, 12.
***
Juryj Dańkoŭ u minułym vałodaŭ Dankoff Club. Kłub raniej znachodziŭsia na vulicy Miaśnikova 25. Pa hetym ža adrasie znachodziŭsia stryptyz-kłub «Vieniecyja», restaran Dankoff Club, sałon pryhažości i spa-sałon For Men. Bolš za 20 hod kompleks byŭ adnym z bujnych zabaŭlalnych centraŭ Minska.
Sam Dańkoŭ byŭ deputatam Minharsavieta. A ŭ 2001 hodzie navat sprabavaŭ udzielničać u prezidenckaj honcy. Łozunh jaho pieradvybarnaj kampanii byŭ taki: «Hałasujcie za Dańkova — budzie ŭsio ŭ vas tałkova».
Taksama Dańkoŭ aktyŭna dapamahaŭ vałancioram z «Ehidy», jakija ratavali žyvioł. Sam Dańkoŭ adznačaŭ, što ŭ jaho dźvie vyšejšych adukacyi, a taksama zvańnie kandydata navuk i doktara fiłasofii. Pradprymalnik byŭ žanaty, u jaho čaćviora dziaciej.
U 2012 hodzie suprać Dańkova zaviali kryminalnuju spravu, u vyniku čaho asudzili na 8 hadoŭ pazbaŭleńnia voli pa 7 artykułach, siarod jakich uchileńnie ad vypłaty padatkaŭ, uciahvańnie ŭ prastytucyju, padrobka dakumientaŭ i hetak dalej.
Sam Dańkoŭ z abvinavačvańniami byŭ nie zhodny. Svaju vinu nie pryznavaŭ jak na sudzie, tak i paśla vyzvaleńnia (za kratami Juryj pravioŭ bolš za 7 hod). Jon ličyŭ spravu sfabrykavanaj i źbiraŭsia abskardžvać rašeńnie ŭ mižnarodnych instancyjach.
Kamientary