U viaskovaj škole płaciać bolš, čym u Minsku. Pahladzieli vakansii i zarobki biełaruskich nastaŭnikaŭ
Na respublikanskim piedsaviecie Łukašenka zajaviŭ, što siońnia škoła nie moža być pa-za palitykaj, ale «palityka tam musić być adna — dziaržaŭnaja». «Patryjota moža vychavać tolki patryjot», — padkreśliŭ jon. «Naša Niva» pacikaviłasia, kolki «patryjotaŭ» nie chapaje škołam i jakija zarpłaty im prapanujuć.
Na sajcie dziaržaŭnaj słužby zaniataści — 528 vakansij dla nastaŭnikaŭ. Važna — u hety śpis uvachodziać vakansii i ź niapoŭnaj zaniataściu, naprykład na 0,25 ci navat na 0,1 staŭki, u tym liku i vakansii defiektołahaŭ i surdapiedahohaŭ.
Kali razhladać prapanovy pracy na standartnuju poŭnuju staŭku, to samy nizki zarobak prapanujecca nastaŭniku ŭ Astraŭcy — u miascovaj himnazii №1 chočuć płacić tolki 400 rubloŭ (pradmiet nie ŭkazvajecca). Cikava, što paśla budaŭnictva i zapusku AES, žyćcio ŭ Astaraŭcy pačało daražeć, asabliva heta tyčycca arendy žylla.
Tyja ž 400 rubloŭ prapanujuć u škołach Miadzielskaha i Kamianieckaha rajonaŭ, a taksama nastaŭniku matematyki, fiziki i infarmatyki ŭ Hrodzienskaj škole №3 ci nastaŭniku muzyki ŭ minskaj siaredniaj škole №82.
A samy vysoki zarobak zusim nie ŭ Minsku, a ŭ viaskovaj škole Hrodzienskaj vobłaści. Prosta ŭ vioscy Pielasy Voranaŭskaha rajona navučańnie viadziecca na litoŭskaj movie, jaje viedańnie abaviazkovaje dla nastaŭnika. Pry škole, jakaja znachodzicca kala litoŭskaj miažy, pracuje i litoŭski kulturna-aśvietnicki centr.
Vykładčyk matematyki, jaki vałodaje litoŭskaj, moža raźličvać na zarobak ad 1550 rubloŭ, fiziki i astranomii — ad 1440, litoŭskaj movy i litaratury — ad 1370. Nastaŭniku pačatkovych kłasaŭ prapanujuć 1230 rubloŭ zarobku.
Dla paraŭnańnia — Minski dziaržaŭny linhvistyčny ŭniviersitet šukaje starejšych vykładčykaŭ na zarobak ad 1100 rubloŭ: kandydaty musiać svabodna vałodać japonskaj, karejskaj, italjanskaj movami.
Adrazu za viaskovaj škołaj idzie minskaja himnazija №31, dzie šukajuć nastaŭnika matematyki. Zarpłata — ad 1200 rubloŭ. Ale heta chutčej vyklučeńnie, bolšaść minskich škoł prapanuje zarpłatu ŭ 700-800 rubloŭ.
1000 rubloŭ abiacajuć płacić u Zasłaŭskaj himnazii. Tam šukajuć matematyka i nastaŭnika ruskaj movy i litaratury. Anałahičny z Zasłaŭjem zarobak prapanuje staličnaja siaredniaja škoła №196, dzie taksama patrebny vykładčyk matematyki. Tuju ž tysiaču abiacajuć vykładčyku biełaruskaj movy i litaratury ŭ himnazii №31 Minska.
Na zarobak u 900 rubloŭ zaprašajuć vykładčykaŭ infarmatyki: možna ŭładkavacca ŭ škołu ahraharadka Krapiŭna Aršanskaha rajona, a možna ŭ hrodzienski licej №1.
Kali hladzieć pa abłasnych centrach, to
- u Breście maksimalnyja zarobki prapanujuć trenieru-vykładčyku ŭ vučelni alimpijskaha reziervu (ad 700 rubloŭ) i defiektołahu (ad 600 rubloŭ);
- u Hrodnie — nastaŭniku infarmatyki (ad 900) ci fiziki (ad 800);
- u Mahilovie — nastaŭniku pracoŭnaha navučańnia (ad 650 rubloŭ).
U Viciebsku i Homieli aktualnych vakansij dla nastaŭnikaŭ na sajcie słužby zaniataści niama.
Dla paraŭnańnia: u pryvatnyja škoły ŭ Minsku šukajuć nastaŭnikaŭ na zarobak ad 1200 rubloŭ, psichołahaŭ — ad 1500 rubloŭ.
Ciapier čytajuć
U Minsku pamior adzin z samych viadomych zabojcaŭ Rasii. Jon žyŭ pad čužym imieniem i staŭ piśmieńnikam-fantastam6
Kamientary