«Prajhrajuć usie, i sankcyi heta nie spynić». Ekśpierty vykazalisia pra pahrom hramadzianskaj supolnaści
Siońnia ad ranicy siłavyja orhany pryjšli va niaŭradavyja arhanizacyi pa ŭsioj krainie — ad pravaabarončaha centra « Viasna» da rehijanalnych inicyjatyŭ, jakija zajmalisia adukacyjnymi prahramami. Pakul jašče vyniki dnia nie padsumavanyja: kahości z zatrymanych zabirajuć na dopyty, chtości pakul na svabodzie, zabrali tolki techniku. Ale zrazumieła adno — takoha pahroma treciaha siektara ŭ Biełarusi jašče nie było. Da čaho pryviadzie abłava, «Naša Niva» raspytała ŭ ekśpiertaŭ.
«Ułada choča demanstravać Zachadu, što jaho sankcyi nie tolki nie pracujuć, ale i majuć advarotny efiekt. Niešta kštałtu, kali vy idziecie na šturm, my rastrelvajem pa 10 zakładnikaŭ, — kaža palityčny ahladalnik Arciom Šrajbman. — Heta padvyšeńnie košta cisku na aficyjny Minsk. Pryblizna pa hetaj ža łohicy stvorany mihracyjny kryzis Litvie.
Uvohule davoli daŭno stała zrazumieła, što ŭłady buduć vyniščać usiu žyvuju hramadzianskuju supolnaść, bo bačać u joj instrumient źniešnich vorahaŭ pa zrynańni režymu.
Kamu ad hetaha kiepska? Kiepska ludziam, jakija karystalisia pasłuhami pravaabaroncaŭ, humanitarnymi i kulturnymi prahramami astatnich NDA.
Kali u pravaabaroncaŭ mienš mahčymaściaŭ pracavać u krainie, budzie mienš manytorynha sudovych pracesaŭ, mienš pravavoj dapamohi. Mienš hramadzianskaj supolnaści — mienš zvarotnaj suviazi z hramadstvam, značyć, prablemy nie vyrašajucca, a tolki akumulucca».
U acency nastupstvaŭ ź im salidarna dyrektar BEROC, ekanamist Kaciaryna Barnukova. Siońnia ź pieratrusam pryjšli i da ich.
«U hetuju začystku trapili nie tolki tyja arhanizacyi, jakija chacia b tearetyčna dziaržava mahła b razhladać jak pahrozu. BEROC, naprykład, pravodziŭ unikalnyja ekanamičnyja kanfierencyi, byŭ suarhanizataram «Kastryčnickaha ekanamičnaha foruma» (udzieł u im prymali nie tolki niezaležnyja ekśpierty, ale i pradstaŭniki ŭradu — zaŭv. NN), pryvoziŭ ekanamistaŭ suśvietnaj vieličyni, našy aśpiranty pracujuć jak u pryvatnym, tak i ŭ dziaržaŭnym siektary. Mnohija arhanizacyi ź siońniašniaha śpisa aktyŭna supracoŭničali ź dziaržavaj. Dumaju, usie jany pracavali na karyść Biełarusi, i ad pahromu prajhrajuć usie: i hramadzianie Biełarusi, jakija zastanucca biez pravaabaroncaŭ, biez adukacyjnych mahčymaściaŭ i hetak dalej, i dziaržava, jakaja hublaje apošnija nici zvarotnaj suviazi. Kali začyščali niezaležnyja ŚMI, možna było padumać, što heta vyhadna Rasii, ale siońnia i hetaha nie skažaš: ni ŭ ŚMI, ni ŭ hramadzianskaj supolnaści Rasija nie prapanoŭvaje svaich alternatyŭ. Tamu tłumačeńnie zastajecca adno — hetaja tyja samyja «kontrsankcyi». Ale taki razmach represij pałochaje: jon vyjšaŭ z-pad kantrolu i spynić jaho ciažka», — ličyć Barnukova.
Valeryj Kavaleŭski, pradstaŭnik Śviatłany Cichanoŭskaj pa mižnarodnych spravach, ličyć pahrom iracyjanalnym, bo heta nie dapamoža režymu admianić ci spynić sankcyi:
«U padziejach dnia ja baču dva palityčnych sihnały.
Ułady pakazvajuć Zachadu — u adkaz na vaš cisk my zabjem samaje darahoje dla vas — hramadzianskuju supolnaść, i adnačasova demanstrujuć Pucinu svaju łajalnaść, maŭlaŭ, my moža Krym i nie budziem pryznavać, ale voś tak, na praktycy, dakažam svaju viernaść, źniščym «jeŭrapiejska» i toje, što vy taksama nie lubicie.
Kancavy bienieficyjar hetaha pahromu — Rasija.
Biezumoŭna, usio heta asłablaje hramadstva, dla jakoha važnaja haryzantalnaja kamunikacyja.
Ale heta asłablaje i ŭłady, u jakich nie zastajecca nadziei na stabilizacyju adnosin z Zachadam, nie kažu ŭžo pra palapšeńnie.
Takija dziejańni ŭ vačach Jeŭropy daplusoŭvajucca ŭ skarbonku arhumientaŭ na karyść uzmacnieńnia i naroščvańnia sankcyj. Dumaju, budzie praanalizavana, jak ich zrabić bolš efiektyŭnymi, razumniejšymi, uličvajučy rolu rasijskaha ŭpłyva na padziei».
Ciapier čytajuć
«Dekałanizacyja — heta pryjści i zaniać svajo miesca». Nasta Rahatko budzie ŭdzielničać u fiestyvali rasijskaj knihi. Sulima jaje asudziŭ, jana nie zmaŭčała ŭ adkaz5858
Kamientary