«Praces zakryli, bo soramna hladzieć u vočy ludziam». Siastra Maksima Viniarskaha pra pajezdku ŭ Mahiloŭ na sud nad bratam
Alena Cieraškova, siastra aktyvista «Eŭrapiejskaj Biełarusi» Maksima Viniarskaha, była 12 traŭnia kala Mahiloŭskaha abłasnoha sudu. Tam u zakrytym režymie pačaŭsia praces nad jaje bratam i jašče 6 aktyvistami, u tym liku nad sustaršyniom BCHD Paŭłam Sieviaryncam, paviedamlaje Radyjo Svaboda.
Alena Cieraškova kaža, što, jak i svajaki inšych padsudnych, viedała, što ŭ sud ich nia puściać.
«Była ŭsio ž niejkaja pryvidnaja nadzieja, što krajočkam voka pabačymsia ci choć zdala budzie mahčymaść, kali ich buduć vieści, kryknuć słovy padtrymki. Ale ŭłady takuju mahčymaść całkam vyklučyli. Jany jakraz hetaha — našaj padtrymki — i bajacca», — miarkuje jana.
Pavodle Aleny, jaje dy inšych svajakoŭ u sud nie prapuścili milicyjanty ŭ formie, jakija stajali za turnikietam. Da taho ž ich adrazu papiaredzili, kab adyšli dalej ad budynka — «inakš buduć prablemy». Paźniej Alena daviedałasia, što ŭ susiednim dvary milicyjanty zatrymali dvuch žurnalistaŭ.
Pieršuju minimalnuju infarmacyju pra pačatak pracesu Alena atrymała ad advakataŭ u pierapynku na abied.
«Paśpieli skazać, što nastroj va ŭsich padabaronnych narmalny, bajavy. Z advakataŭ uziatyja padpiski ab nierazhałošvańni materyjałaŭ spravy, tamu peŭnaha ničoha pra abvinavačańnie nia viedaju, ale pa ŭskosnych prykmietach mahu mierkavać, što tam niama realnych faktaŭ, niama dokazaŭ ichnaj viny. Maksim paviedamlaŭ, što viny nie pryznaje. Miarkuju, hetak i inšyja», — skazała siastra Maksima Viniarskaha.
Sudździa Iryna Łančava zrabiła praces zakrytym, spasłaŭšysia na toje, što «materyjały spravy ŭtrymlivajuć tajamnicu, jakuju achoŭvaje zakon».
Alena nazyvaje «zapałochvańniem i falšyŭkaj» toje, što jaje bratu dy inšym fihurantam spravy inkryminavali mienavita 293 artykuł Kryminalnaha kodeksu pra masavyja biesparadki, padpały, pahromy i paškodžańnie majomaści.
«Heta zusim nie pra ich, bo takoha, jak my ŭsie viedajem, nie było. Ale dyktatura ŭ nas ryhidnaja, jana ŭvieś čas rychtujecca da minułaj vajny. Kinuli za kraty dziasiatki aktyvistaŭ, a masavyja pratesty adbylisia paźniej dy prachodzili mirna. Voś hetaj praŭdy jany i bajacca. Što prakuroram, sudździam budzie soramna hladzieć u vočy ludziam. Što svajakam i dzieciam daviadziecca adkazvać na pytańnie: čamu sudziać za pratest, jaki achapiŭ usiu krainu. Bajacca soramu i adkaznaści», — miarkuje Alena Cieraškova.
Siadzić u kamery, dzie 18 viaźniaŭ
Maksim Viniarskibyŭ aryštavany letaś u studzieni. Pavodle Aleny, Maksim viedaŭ pra palavańnie na jaho i tamu nia žyŭ doma, chavaŭsia.
«Raniej jaho časta zatrymlivali preventyŭna napiaredadni važnych padziejaŭ, takich, jak vybary ci čempijanaty śvietu, tamu byŭ aściarožny», — miarkuje siastra aktyvista.
Padličana, što jašče da padziejaŭ žniŭnia minułaha hodu aktyvist Maksim Viniarski «na administracyjnych sutkach» adbyŭ u viaźnicach ahułam bolš za hod, ale ŭ śledčym izalatary ciapier akazaŭsia ŭpieršyniu. Spačatku Maksima Viniarskaha trymali ŭ mienskim SIZA na Vaładarskaha, pierad sudom pieraviali ŭ mahiloŭskaje SIZA.
«Ad jaho dachodziać listy, choć nia ŭpeŭnienaja, što jon atrymlivaje ŭsio, što my pišam. Siadzić u kamery, dzie razam ź im 18 viaźniaŭ, pryčym usie pa kryminalnych artykułach, za palityku — nikoha. Ale kaža, što ludzi ŭsie adekvatnyja, kanfliktaŭ niama. Pra ŭmovy piša minimum: što zbolšaha ŭsio narmalna, ale jon nikoli nia skardzicca, navat kali jość na što. Dakładna viedaju, što ŭ kamery ciopła, bo stolki čałaviek dychajuć, nie zamierźnieš. Praduktovyja pieradačy jamu pieradaju, tut prablem niama. Voś i ŭčora ŭ mianie pryniali pieradaču. Bačyła, što inšyja svajaki taksama pieradavali», — raskazała Alena Cieraškova pra naviedvańnie SIZA.
U spravie bolš za 30 tamoŭ
Pavodle Aleny Cieraškovaj, praces praciahniecca sama mieniej da 28 traŭnia.
«Viedaju, što na hety termin raśpisany raskład pasiedžańniaŭ. U spravie bolš za 30 tamoŭ, tamu ličać, što času zojmie šmat», — miarkuje Alena Cieraškova. Žančyna skazała, što choć praces zakryty, jana źbirajecca jašče nia raz pryjaždžać u Mahiloŭ.
«Kab prosta pabyć kala sudu, kab advakat moh sumlenna skazać bratu, što ciabie pryjechali padtrymać. Hetak źbirajucca rabić i inšyja svajaki dy siabry padsudnych».
Razam z Maksimam Viniarskim sudziać sustaršyniu BCHD Paŭła Sieviarynca, błohiera Źmitra Kazłova, hramadzkuju aktyvistku Irynu Ščasnuju, aktyvistaŭ «Eŭrapiejskaj Biełarusi» Jaŭhiena Afnahiela, Paŭła Juchnieviča i Andreja Vojniča.
Ciapier čytajuć
«Naiŭna spadziavalisia zarablać u Jeŭropach, pryjazdžać dadomu lačyć zuby na chalavu i zdavać kvateru». Prapahanda pačała apraŭdvać darahija žyroŭki dla «darmajedaŭ»2222
Kamientary