«Amapaŭcy chadzili pa stupniach zatrymanych i pytali: «Chočaš — i tabie tak budzie?» Na sudzie ŭ Homieli abvinavačanyja raskazali pra hvałt
U Čyhunačnym sudzie Homla praciahvajecca sud nad Juryjem Ułasavym, Tacianaj Kanieŭskaj, Dźmitryjem Ivaškovym i Alaksandram Šabalinym. Ich vinavaciać u «masavych biesparadkach» i planavańni «zachopu administracyjnych budynkaŭ», piša «Svaboda».
Čytajcie taksama: U Homieli sudziać davieranych asobaŭ Cichanoŭskaj. Padsudnyja nie pryznali viny
Pasiedžańni prachodziać u praktyčna zakrytym režymie. Na ich dapuskajuć tolki blizkich abvinavačanych, pryčym u ich zabirajuć mabilnyja telefony.
20 krasavika na pasiedžańni abvinavačanyja raskazali pra hvałt da ich z boku milicyi i śledztva.
Abvinavačańnie hruntujecca na videa, zapisanym tajna na sustrečy Cichanoŭskaj z davieranymi asobami. Z 2-hadzinnaha videa byli ŭziatyja narezki, jakija prademanstravali pa televizii. Tam davieranyja asoby havorać pra «zachop budynkaŭ». Na sudzie abvinavačanyja patłumačyli, što nie źbiralisia ani rabić masavych biesparadkaŭ, ani zachoplivać budynki. Havorka išła pra toj varyjant padziej, kali na vybarach pieramoža Śviatłana Cichanoŭskaja, i pra toje, što rabić dalej.
Abvinavačanyja admaŭlajuć, što źbiralisia realizavać niejki siłavy varyjant. Što tyčycca prośbaŭ finansavańnia ŭ Cichanoŭskaj, to hrošy im byli patrebny na kalonki, mehafony i hetak dalej, bo 7 žniŭnia davieranyja asoby planavali pravieści ŭ Homli vialiki ahitacyjny pikiet.
U spravie jość «pryznańni» Alaksandra Šabalina na videa. Jon tam kaža, što Jury Ŭłasaŭ planavaŭ «zachop budynkaŭ». Siońnia ŭ sudzie Šabalin daŭ tłumačeńni, što ahavaryŭ Ułasava pad fizyčnym i psychalahičnym ciskam. Jon śćviardžaje, što jaho bili, u tym liku pa hałavie, dušyli i prymusili zavučyć tekst z papierki, jaki potym jon i začytaŭ na videa.
Pra fizyčny i psychalahičny hvałt skazaŭ na sudzie i Dźmitry Ivaškoŭ.
Jury Ŭłasaŭ havaryŭ pra psychalahičny hvałt i pahrozy ŭ jaho bok «pasadzić pa 328» (za narkotyki).
Taciana Kanieŭskaja raskazała, što była zatrymanaja pa administracyjnaj spravie 8 žniŭnia. 10 žniŭnia ŭ jaje byŭ sud, i sudździa adpraviła materyjały na dapracoŭku. Ale jaje nie vypuścili z kanvojnaha aŭtamabila, znoŭ zavieźli ŭ IČU. Tam, pa słovach abvinavačanaj, jaje zaviali ŭ niejkaje pamiaškańnie, dzie maładyja ludzi ŭ kajdankach stajali na kaleniach, a supracoŭniki AMAP chadzili pa stupakach hetych maładych ludziej. Tacianie skazali: «Chočaš — i z taboj tak budzie?»
Sud praciahniecca 27 krasavika.
Kamientary