Klimatyčny kryzis prymušaje palarnych miadźviedziaŭ sparvacca z hryźli — atrymlivajucca «piźli»
Daśledčyki miarkujuć, što heta pahražaje bijaraznastajnaści.
U 2006 hodzie ŭ Kanadzie znajšli niezvyčajnaha biełaha miadźviedzia: na jaho šerści byli buryja plamy, a pysa mieła niezvyčajnuju formu. Palaŭničyja zastrelili miadźviedzia, i analiz DNK paćvierdziŭ zdahadku navukoŭcaŭ: heta byŭ hibryd biełaha miadźviedzia i hryźli.
U 2010 hodzie ŭ tym ža arktyčnym rehijonie Kanady zastrelili jašče adnaho miadźviedzia, u jakoha maci była hibrydam, a baćka — hryźli, piša The Independent.
Heta byli pieršyja zafiksavanyja vypadki źjaŭleńnia «piźli», abo «hrołaraŭ» (ad anhł. grizzly + polar). Za apošniaje dziesiacihodździe navukoŭcy zaŭvažyli pavieličeńnie kolkaści hibrydnych miadźviedziaŭ. Pryčyna tamu, na dumku daśledčykaŭ, źmieny klimatu.
Tempieratura ŭ Arktycy pavyšajecca ŭdvaja chutčej, čym u inšych rehijonach. Rezkija źmieny nadvorja ŭ Arktycy skaračajuć płošču ldoŭ — miescažycharystva biełych miadźviedziaŭ. Ź inšaha boku, terytoryi, dzie žyvuć hryźli, pavialičvajucca ŭhłyb na poŭnač. U vyniku areały pražyvańnia abodvuch vidaŭ pačynajuć pierasiakacca.
Bolš za toje, zhodna z apošnim daśledavańniem, klimat značna ŭpłyvaje na racyjon palarnych miadźviedziaŭ, jakija źjaŭlajucca drapiežnikami i palujuć na ciuleniaŭ. Daśledčyki aścierahajucca, što biełyja miadźviedzi mohuć nie paśpieć prystasavacca da novych areałaŭ pražyvańnia.
Usio čaściej biełym miadźviedziam prychodzicca šukać alternatyŭnyja krynicy charčavańnia. U vyniku im prychodzicca spaborničać za ježu z hryźli, jakija ŭsio chutčej ruchajucca na poŭnač. Da taho ž, abodva vidy ŭsio čaściej sparvajucca, što moža adlustravacca na bijaraznastajnaści. Takoje mižvidavaje sparvańnie moža pryvieści da źniknieńnia abo zamiaščeńnia adnaho ź vidaŭ.
Dakładna nieviadoma, kolki takich hibrydaŭ «piźli» isnuje ŭ pryrodzie, ale mahčymaściej dla sparvańnia abodvuch vidaŭ stanovicca ŭsio bolš.
Ciapier čytajuć
Bieśpiłotnik, jaki ŭpaŭ u Minsku, prylacieŭ z boku Barysava — šmatlikija śviedčańni14
Kamientary