Chto taki Juraś Ziankovič — amierykanski advakat, jaki mieŭ kałasalnaje žadańnie źviartać na siabie ŭvahu

Jurasiu Ziankoviču — 43 hady. Byŭ aktyvistam Partyi BNF, abiraŭsia ŭ Ždanovicki sielski saviet i Minski rajsaviet na miascovych vybarach. Kali byŭ deputatam, dabiŭsia, kab u pasiołku była vulica Vasila Bykava. Heta było vielmi daŭno. U 2007 hodzie Ziankovič razam z baćkami emihravaŭ u ZŠA, atrymaŭ tam hramadzianstva.

Spačatku žyŭ u Denviery (štat Kałarada), pracavaŭ raznosčykam picy. Paśla pierabraŭsia ŭ Ńju-Jork, staŭ advakatam, zajmaŭsia spravami mihracyi. Apošnim časam žyŭ u Chjustanie.

Advakackaja karjera apošnim časam nie składvałasia — letaś jamu na 6 miesiacaŭ zabaranili jurydyčnyja kansultacyi. Historyja była dziŭnaja: Ziankovič papiarednie ŭziaŭ u litoŭca $6 tysiač za vyrašeńnie imihracyjnaha pytańnia, ale ničoha nie rabiŭ. 

Uvohule ŭ ZŠA z asobaj Ziankoviča źviazany šerah kanfliktaŭ u emihracyjnych asiarodkach. Ën sprabavaŭ asiadłać niekatoryja arhanizacyi, starejšaje pakaleńnie dyjaspary staviłasia da jaho ź niedavieram. Lidaram Ziankovič u vyniku nie staŭ.

U toj ža čas, u adroźnieńnie ad bolšaści emihrantaŭ, jon praciahvaŭ rehularna naviedvacca na radzimu i sprabavaŭ udzielničać u palityčnym žyćci: taki ŭvieś «amierykanski», hučny, zaŭsiody ŭ harnitury ź jarkim halštukam. U 2017 hodzie na źjeździe Partyi BNF jon abviaściŭ pra svaje prezidenckija ambicyi.

Ziankovič chacieŭ vyłučacca kandydatam u prezidenty ŭ 2020 hodzie, ale prajhraŭ Alaksieju Janukieviču.

Ziankovič byŭ najbolš viadomy supiarečlivymi, časam adkryta skandalnymi zajavami. Mnohija bačyli ŭ ich prosta kałasalnaje žadańnie źviartać na siabie ŭvahu.

Paśla tajamničaj śmierci hałoŭnaha redaktara Chartyi'97 Aleha Biabienina Ziankovič vykazvaŭ zdahadki, što toj chacieŭ dasiahnuć seksualnaha zadavalnieńnia praz zadušeńnie, ale pierastaraŭsia i pamior. A paśla hibieli sałdata Koržyča jon zajaviŭ, što «heta narmalna, što ŭ vojsku zdarajucca nadzvyčajnyja stanoviščy i što navat hinuć ludzi». Jaho frazy vyklikali abureńnie ŭ sacsietkach, asabliva ŭ rodnych achviaraŭ, pra pamiać jakich cynična vykazvaŭsia Ziankovič.

Ziankovič vystupaŭ u jutubie, pisaŭ u fejsbuku, ale nidzie nie staŭ miehapapularnym błohieram.

U 2018-m Ziankovič sabraŭsia być miedyjataram pamiž ułaśnikami restarana «Pajedziem pajadzim» u Kurapatach i pradstaŭnikami hramadzianskaj supolnaści — maŭlaŭ, kab biznesmien Leanid Zajdes adkryŭ muziej pamiaci achviaraŭ stalinizmu. Dalej za razmovy sprava nie zvaruchnułasia. A praź niekalki hadoŭ aktyvisty zaŭvažyli Ziankoviča na ŭvachodzie ŭ skandalny restaran, kudy jon nakiroŭvaŭsia na viačeru.

Nie tak daŭno Ziankovič nabyŭ nieruchomaść u Miadzielskim rajonie. Hetaje leta jon razam z žonkaj Alenaj Dzienisaviec baviŭ u Biełarusi.

U prezidenckaj kampanii 2020 hoda jon nie ŭdzielničaŭ, sa štabam Cichanoŭskaj nijak nie byŭ źviazany. U čas burlivych padziej leta i vosieni 2020-ha Ziankoviča ŚMI zhadvali usiaho adzin raz. 31 žniŭnia jaho zatrymali i asudzili na 10 sutak u Miadzieli — jak paviedamiła žonka, za ŭdzieł u akcyi pratestu ŭ dzień vybaraŭ.

Zatoje Ziankovič pačaŭ aktyŭničać u pačatku 2021 hoda — źmiašaŭ z brudam Cichanoŭskuju, nazyvajučy jaje «Śvietkaj-katletnicaj» i davodziačy, što ŭłada nie patrebnaja ni joj, ni jaje štabu. Zasnavalnik Panda.doc Mikita Mikada, inicyjatar kampanij salidarnaści, atrymaŭ ad Ziankoviča charaktarystyku «nievierahodny debił».

A sam Ziankovič miesiac tamu abviaściŭ, što pačynaje farmavańnie «Družyn Narodnaj Samaabarony» — inicyjatyvy, jakaja musiła supraćstajać AMAPu na masavych akcyjach pratestu.

Juraś Ziankovič vyhladaje čałaviekam, jaki najmienš zdolny stać lidaram čahości — jon navat lidaram nievialikich emihracyjnych asiarodkaŭ ci Partyi BNF nie staŭ. Jon, jak i Alaksandr Fiaduta, i Ryhor Kastusioŭ, — nie čałaviek ź siłavym bekhraŭndam i suviaziami ŭ siłavych strukturach, što, napeŭna, jość pieradumovaju luboha paśpiachovaha pieravarotu.

Pavialičyć

Tym nie mienš, u videasiužetach na biełaruskim i rasijskim telebačańni havorycca, što Juraś Ziankovič i Alaksandr Fiaduta sustrakalisia ŭ karčmie na Sadovym kalcy ŭ Maskvie z «niekatorymi hienierałami Uzbrojenych Sił Biełarusi» — ci z asobami, jakija vydavali siabie za hienierałaŭ, ci z realnymi hienierałami, jakija «hulali» ŭ zmoŭnikaŭ, jakija majuć namier ažyćciavić pieravarot. Hetyja sustrečy byli źniatyja schavanaj kamieraj, imavierna, adnym z «hulcoŭ».

• 0
• 0
• 0
• 1
• 0
• 0
• 2
• 0