Ramančuk: Ja prasiŭ Cichanoŭskuju, kab Šakucina vyklučyli z čornaha śpisu ES
Ekanamist i palityk Jarasłaŭ Ramančuk ličyć, što biznesmien Alaksandr Šakucin nie pavinien znachodzicca ŭ sankcyjnym śpisie Jeŭrasajuza. Jon pierakany, što ŭklučeńnie ŭłaśnika «Amkadora» ŭ čornyja śpisy — vialikaja pamyłka.
«Naša Niva»: Jarasłaŭ, čamu vy miarkujecie, što Šakucina treba vykraślić z šerahu asob, suprać jakich Jeŭrasajuz uvioŭ sankcyi?
Jarasłaŭ Ramančuk: Jość standarty, suprać kaho prymianiajucca sankcyi — kali čałaviek pracuje ŭ takich śfierach, jak naftapierapracoŭka, budaŭnictva, impart ryby i hetak dalej. Čałaviek biare resursy ad dziaržavy, asvojvaje ich, dušyć kankurentaŭ.
Kali ž čałaviek pracuje ŭ kankurentnym poli, jak Šakucin, jaho cisnuć ministerstvy, viedamstvy, urad, to heta zusim inšaja historyja. Dla mianie heta vialikaje pytańnie: čamu čałavieka dziaŭbuć z usich bakoŭ, a jon pry hetym nibyta źjaŭlajecca «kašalkom režymu»? Ja byŭ na pradpryjemstvach Šakucina, kali jašče ŭvachodziŭ u Radu pa pradprymalnictvie, bačyŭ tam našu moładź, jakaja pracuje na biełaruskich kampjutarach, raspracoŭvaje ŭnikalnyja rečy. Pa sutnaści, heta toje miesca, dzie my kujom kiroŭnyja kadry.
I kali takoha čałavieka ŭklučajuć u śpis, a inšych nie ŭklučajuć, to heta niezrazumieła. Heta jak sa mnoj było ŭ 2010 hodzie — kali ludzi, sprabujučy advieści adkaznaść ź siabie, usio śpichvali na Ramančuka.
«NN»: Usie ž cudoŭna viedajuć, što Šakucin siabravaŭ z Łukašenkam, jany razam na adpačynki jeździli.
JAR: Ja nie viedaju nivodnaha čałavieka, jaki b siabravaŭ z Łukašenkam. Čałavieku mahli skazać: siońnia ty jedzieš tudy, i jon navat moh nie viedać, kudy jedzie. Za 26 hadoŭ ułady Łukašenki my bačym, što siabroŭ u jaho niama. I niavažna, ci kasili vy razam travu, ci hulali ŭ tenis.
Važnaja reč — heta aktyvy, finansy, resursy. Ja saču za finansavymi pakazčykami «Amkadora» i inšych pradpryjemstvaŭ Šakucina. Dy ŭ mianie ŭražańnie, što jon bolš hulaje na inšym baku, čym ułady. Čałaviek ratuje svoj biznes, niejtralizuje pahrozy praź niejkija ŭzajemadziejańni z uradam ci Łukašenkam. Ale ci jość heta padstavaj dla ŭklučeńnia ŭ «čorny śpis»?
«NN»: Vy źviartalisia da Cichanoŭskaj, kab jana paspryjała vyklučeńniu Šakucina z sankcyjnaha śpisu. Ci była ad jaje ci jaje štabu reakcyja?
JAR: Nie. Ja faktyčna praz paru dzion paśla ŭklučeńnia Šakucina nakiravaŭ taki list Cichanoŭskaj. Nijakaj reakcyi nie było. Cichanoŭskaja pavinna viedać, što nie ŭsie adnolkavyja ŭ orhanach ułady i ŭ biznesie. Kali my za praŭdu i spraviadlivaść, za nacyjanalny biznes, to Šakucina tam być nie pavinna być. Na žal, ja ničoha nie pačuŭ u adkaz. Kali treba niejkaja dadatkovaja infarmacyja, to ja hatovy jaje dać.
«NN»: Vy z Šakucinym padtrymlivajecie niejkija adnosiny?
JAR: Nie, nu jakija adnosiny. Kali ja byŭ u Radzie pa raźvićci pradprymalnictva, to my razmaŭlali. U adroźnieńnie ad inšych, jon zaŭsiody padtrymlivaŭ rynkavyja prapanovy, jakija sychodzili ad nas. Jon nie chavaŭsia nikoli. Toj ža Mašenski nikoli ničoha nie kazaŭ, adkryta havaryŭ tolki Šakucin.
Čytajcie taksama: Šakucin ryzykuje paŭtaryć los Čyža — jeŭrapiejskija sankcyi razvalvajuć biznes
Šakucin: U mianie zabrali pravy, aryštavanaja majomaść, ja nie mahu vyjechać za miažu
Ciapier čytajuć
A my vam kazali: «nie dumajcie, što heta kapiejki»! Stali viadomyja źviestki, kolki padachodnaha biełarusy Litvy pieraličyli roznym hramadskim strukturam3030
Kamientary