Prakuror zapatrabavaŭ 11 hod dla Alaksandra Trockaha, jakoha sudziać za najezd na supracoŭnika DAI
Minski haradski sud razhladaje spravu za zamach na zabojstva supracoŭnika orhanaŭ unutranych spravaŭ (art. 14 art. 362) suprać 45‑hadovaha biznesoŭca Alaksandra Trockaha, nahadvaje «Radyjo Svaboda».
Prakuror Anton Ciumiencaŭ patrabuje 11 hadoŭ u kałonii ŭzmocnienaha režymu.
Incydent adbyŭsia 12 žniŭnia na praśpiekcie Pieramožcaŭ, dzie siłaviki ŭ bałakłavach i sa zbrojaj spyniali dla pravierki aŭtamabili. Pavodle dziaržabvinavaŭcy, u sudzie dakazali złačynnyja dziejańni Trockaha i jahony namier mienavita zabić supracoŭnika DAI.
Były top-mieniedžar banka MTB Alaksandr Trocki śćviardžaje, što źjechaŭ ź miesca, dzie jaho spynili ludzi sa zbrojaj, bo jany nie nazvalisia, nie skazali pryčynu spynieńnia aŭtamabila i nastavili na jaho zbroju, a jon spałochaŭsia za svajo žyćcio. Pavodle padsudnaha, jon najechaŭ na majora DAI vypadkova i hatovy kampiensavać naniesienuju škodu.
Paciarpieły Uładzimir Juraŭ padčas incydentu atrymaŭ traŭmy nahi, jakija ekśpiertyza pryznała niaciažkimi. Paciarpieły zaprasiŭ 20 tysiač rubloŭ kampiensacyi ad Trockaha. Prakuror pazoŭ padtrymaŭ i prasiŭ zadavolić jaho «z ulikam razumnaści».
U apošnim słovie Alaksandr Trocki skazaŭ, što nikoli nie moh ujavić, što moža apynucca ŭ takoj situacyi:
«Prahladajučy videa, ja bačyŭ, jak biespadstaŭna źbivajuć ludziej, i ja nie viedaŭ, što supracoŭniki milicyi mohuć nieści słužbu sa schavanymi tvarami i ŭ bałakłavach, biez admietnych znakaŭ. Kali ciabie spyniajuć ludzi sa schavanymi tvarami i zbrojaj biez tłumačeńnia pryčyn, nakiroŭvajuć bajavuju zbroju ŭ moj bok, to ja, biezumoŭna, spałochaŭsia. U mianie było adno žadańnie — prosta źjechać adtul. Ja ŭ pryncypie nie moh sabie ŭjavić, što takoje mahčyma i takoje moža być».
Heta samy surovy termin, jakoha damahajecca prakuratura ŭ suviazi z pratestami. Dasiul samym vialikim pakarańniem adznačyŭsia Brescki abłasny sud u dačynieńni da Alaksandra Kardziukova, jakomu dali 10 hadoŭ za nibyta zamach na zabojstva siłavika.
Kamientary