Z vystavy ŭ Hrodnie źniali karciny Nadzi Buki — bo tam spałučeńnie biełaha i čyrvonaha koleraŭ FOTA
Z vystavy «Asabistaja sprava» Nadzi Buki ŭ Horadni raptam źniali šeść karcin. Usiaho ekspazicyja ŭklučaje ŭ siabie piaćdziasiat šeść pałotnaŭ, a taksama hrafiku i knižnuju ilustracyju. Raboty, jakich vystava pazbaviłasia, majuć peŭnaje spałučeńnie biełaha i čyrvonaha koleraŭ, chacia niekatoryja ź ich napisanyja da 2020 hoda i, pavodle mastački, nie majuć adsyłki da bieł-čyrvona-biełaha ściaha.
Ekspazicyja adkryłasia 13 lutaha ŭ halerei handlovaha centra Kazzarma Mall u Horadni. Ab tym, što ŭ vystavie zroblenyja karekciroŭki, mastačka daviedałasia ad žurnalistaŭ, ale aficyjna ni pryčyn umiašańnia, ni imia taho, chto jaho inicyjavaŭ, joj nie paviedamili.
«Tvor Freedom z tryma bałonikami amal adrazu pradali i niekatoryja paličyli, što jaho źniali naŭmysna, ale ŭ hetym vypadku pakupnik prosta paprasiŭ zabrać karcinu adrazu. A nakont astatniaha mnie skazali, što pakul ničoha nie mohuć prakamientavać. Mnie nie zrazumieła, čamu tak vyrašana i adkul pryjšła takaja kamanda, ale nie dumaju, što heta zrabili supracoŭniki halerei».
Siarod źniatych rabot — «Nadzieja», napisanaja ŭ 2018-m, «Raj» (na joj — jabłyk na biarozie) albo «Maja viera», dzie ad serca Chrysta adychodziać biełyja i čyrvonyja promni.
«Sens karciny «Raj» u tym, što nie treba šukać radzimu ŭ inšych krainach. Ja pisała jaje na pačatku 2020 hoda, ale bačycie, pryjšoŭ čas, kali vielmi šmat biełarusaŭ šukaje radzimu za miažoj. Rajskim jabłyčkam na biarozie ja chacieła skazać, što treba tut niejak raźvivacca i rabić krainu lepšaj, a niechta ŭ hetym ubačyŭ prosta čyrvony jabłyk na biełaj biarozie.
Na tvory «Maja viera» — serca Jezusa Chrysta. Ja praktykujučaja katalička, i mnie daŭno chaciełasia adlustravać hety simvał. Kali na jaho fonie ja malavała vitraž ź biełych i čyrvonych promniaŭ, dumała nie pra bieła-čyrvona-bieły ściah, chacia jon mnie vielmi padabajecca, a pra ściah uvaskrosłaha Chrysta. Kali Chrystos uvaskros, jon u rukach trymaŭ ściah, dzie na biełym fonie byŭ čyrvony kryž. Ja naohuł nie baču sensu zdymać hetuju karcinu».
Nadzia Buka spadziajecca, što niekatoryja tvory buduć usio ž viernutyja ŭ ekspazicyju da 27 lutaha, kali jana asabista praviadzie ekskursiju pa vystavie. «Asabistaja sprava» budzie pracavać da 12 sakavika.
Dazvanicca ŭ Kazzarma Mall i atrymać kamientaryj u nas nie atrymałasia.
Čytajcie taksama:
«Biełaruskich knižnych ilustrataraŭ ceniać va ŭsim śviecie. Akramia Biełarusi». Chto robić najlepšyja knižnyja ilustracyi
Ciapier čytajuć
«Miesiacami ŭ kabinie, na siabie zabiŭ. I staŭ pytać: moža, žonka taksama budzie pracavać?». Čamu emihracyja raźbivaje siemji i što rabić, kab usio papravić4040
Kamientary