«My stali čyścić horad». U Minsku milicyja ŭznaharodziła «nieabyjakavych hramadzian»

Pra heta paviedamlaje staličnaja milicyja. Tut.by zhadaŭ, što viadoma pra niekatorych uznaharodžanych.

Načalnik Leninskaha RUUS Vital Kapilevič razam z namieśnikam kiraŭnika administracyi Leninskaha rajona Mikałajem Strokam uznaharodzili ludziej, jakija aktyŭna dapamahali supracoŭnikam milicyi. Na videa možna naličyć jak minimum siem čałaviek, jakija atrymali ŭznaharody.

Im padziakavali za aktyŭnuju hramadzianskuju pazicyju i naviadzieńnie paradku ŭ rajonie, uručyli pamiatnyja padarunki.

Što viadoma pra ludziej, jakich uznaharodžvali za «naviadzieńnie paradku»?

Asobna Vital Kapilevič adznačyŭ Volhu Zabiełu, jakaja spryjała vyjaŭleńniu i zatrymańniu asoby, jakaja ŭčyniła złačynstva.

Taksama jana raspaviała, što zatrymała jašče adnaho chłopca-«vandała».

Raniej užo raspaviadali, jak prachodziŭ sud nad Maryjaj Safonavaj, jakuju i zatrymała Zabieła.

Pavialičyć

20-hadovaja Safonava ŭnačy ŭ adnym ź minskich dvaroŭ napisała na asfalcie farbaj łozunh «Žyvie Biełaruś» i namalavała pobač bieł-čyrvona-bieły ściah.

Zabieła skazała na sudzie, što ličyć nadpis «Žyvie Biełaruś» i bieł-čyrvona-bieły ściah «kałabaracyjanisckimi». Sama znachodzicca ŭ hrupie vałancioraŭ, jakija viaduć baraćbu z takoj simvolikaj.

— Ale naohuł ja liču, što fasady damoŭ pavinny być čystymi ad usialakich palityčnych nadpisaŭ, — udakładniła jana svaju pazicyju.

Nahadajem, tady ž na sudzie advakaty ahučyli ekśpiertnaje zaklučeńnie ad navukoŭcaŭ z Akademii navuk z nahody frazy «Žyvie Biełaruś!» i bieł-čyrvona-biełaha ściaha: fraza nie źjaŭlajecca cyničnaj, abraźlivaj, u joj niama pahardy maralnymi kaštoŭnaściami, a ściah — nacyjanalny simvał biełaruskaha naroda, jaki byŭ stvorany ŭ 1917 hodzie i jaki dvojčy ŭ historyi mieŭ dziaržaŭny status.

Sudździa prysudziŭ Maryju Safonavu da dvuch miesiacaŭ aryštu, dziaŭčyna padavała apielacyju.

Julija Barysionak na videa raspaviała, što padziaku atrymała za svaju pracu arhanizatara ruchu «Antyvandał», udzielniki jakoha zrazajuć bieł-čyrvona-biełyja stužački i zamaloŭvajuć bieł-čyrvona-biełyja ściahi i nadpisy «Žyvie Biełaruś».

Pavialičyć

U videaroliku z sustrečy z padziakami Zabieła raspaviadaje, što jana złaviła mastakoŭ, jakija malavali pad jaje voknami. Žančyna vyklikała milicyju, vyjšła na vulicu i stała zdymać hetych ludziej, kab byli dokazy.

— Pačynała sama, zatym stali dadavacca ludzi. My stali čyścić horad, pryvodzić u paradak — taki, jakim jon pavinien być. Učynak vielmi prosty — my patryjoty, i patryjoty my nie z 9 žniŭnia, a patryjoty my ź pialonak i dziakujučy vychavańniu našych baćkoŭ, niepasredna žyćcia. Addać našu krainu my nie chočam, — skazała Julija.

Barysionak ličyć, što bieł-čyrvona-bieły ściah treba pryraŭniać da nacysckaj simvoliki.

Nastupny hieroj videa — Vital Kaŭryha. Z rolika nie zrazumieła, čym jon vyznačyŭsia, mužčyna prosta padziakavaŭ milicyi.

— Za toje, što zachavali našy damy, našy siemji, našy pracoŭnyja miescy. Dziakuj, što jany nie zdradzili nam i nie pradali, — skazaŭ Kaŭryha.

Pavialičyć

Viadoma tolki, što raniej mužčyna byŭ IP, zajmaŭsia pieravozkami, a taksama pracavaŭ dyrektaram u fitnies-kłubie.

Taksama na videa siarod uznaharodžanych možna paznać Dziemida Harbaceviča — jon u majcy ź dziaržaŭnaj simvolikaj. Udzielničaje ŭ aŭtaprabiehach i mierapryjemstvach «Antyvandał» — chodzić zrazać stužački i zafarboŭvać bieł-čyrvona-biełyja ściahi.

Taksama Harbacevič śpiavaje aŭtarskija pieśni na manier Vysockaha i na vajennuju tematyku.

Pavialičyć

Harbaceviču 36 hadoŭ, jon veb-raspracoŭščyk, mužčyna raspaviadaŭ u intervju, što da 9 žniŭnia byŭ apalityčny. Darečy, raniej u jaho instahramie byli fota z aŭtaprabiehaŭ i praŭładnych mitynhaŭ. Ciapier — nivodnaha.

• 0
• 0
• 0
• 0
• 0
• 0
• 0
• 0