«Pisali, što ja ledź nie mańjačeła». Amapaviec Biekiš sudzicca z «Našaj Nivaj»
Milicyjanier AMAP Andrej Biekiš padaŭ u sud na «Našu Nivu». Nahodaj stała publikacyja, u jakoj jaho adnakłaśniki raskazvajuć svaje ŭspaminy ad sumiesnaj vučoby. Biekiš staŭ viadomym paśla taho, jak u lipieni 2020 hoda u telehram-kanałach było apublikavana videa, na jakim vidać, jak jon žorstka zatrymlivaje demanstrantaŭ. Biekiš kaža, što skazanaje pra jaho niapraŭda, i patrabuje vypłacić jamu 3000 rubloŭ za maralnyja pieražyvańni.
Redaktar «Našaj nivy» Jahor Marcinovič prasiŭ pravodzić praces pa-biełarusku, Biekiš byŭ nie suprać, adnak sudździa Ina Jałavaja zajaviła, što sud budzie prachodzić pa-rusku. Jahor Marcinovič davaŭ tłumačeńni pa-biełarusku, Biekiš na jahonyja pytańni taksama adkazvaŭ pa-biełarusku, heta nie vyklikała ŭ jaho składanaściaŭ.
Imia Biekiša źjaviłasia ŭ telehram-kanale Ściapana Puciły. Da hetaha zdaryŭsia kanfuz: žycharu Maładziečna, jaki źniešnie padobny da amapaŭca, pisali niehatyŭnyja kamientary. Chłopiec publična zajaviŭ, što jaho zbłytali ź Biekišam.
Praź niekalki dzion «Naša niva» apublikavała artykuł, dzie adnakłaśniki Biekiša zhadvajuć, jakim jon byŭ u školnyja hady. Siem cytat z tekstu pazoŭnik ličyć niepraŭdzivymi, kaža, što jany zakranajuć jahonyja honar i hodnaść. Havorka pra praźmiernuju žorstkaść, niepradkazalnyja pavodziny i jak znajomym stavicca da jaho paśla publikacyi videa z žorstkim zatrymańniem.
Darečy, heta samaje videa sudździa Ina Jałavaja admoviłasia dałučyć da materyjałaŭ spravy, suprać hetaha vystupiŭ i sam Biekiš.
Andrej Biekiš u sudzie zajaviŭ, što jaho adnakłaśniki nie mahli pra jaho tak skazać, što vydańnie naŭmysna skaziła ich słovy, kab vystavić jaho ŭ niehatyŭnym kantekście.
«17 lipienia ja ŭbačyŭ hetyja publikacyi, — patłumačyŭ amapaviec. — Masavyja mierapryjemstvy prachodzili 14 lipienia, materyjały byli apublikavanyja praz try dni. Ja prosta tak nikoha nie zatrymlivaŭ, prosta tak nikoha nie źbivaŭ, maje dziejańni byli nakiravany na toje, kab praduchilić pravaparušeńnie. Pravierki ŭ dačynieńni da mianie nie pravodzilisia, usio było ŭ miežach zakonu.
Sudździa ŭdakładniła, jakija mienavita maralnyja pakuty pieranios pazoŭnik.
«Pieražyvańni. Uźnik šerah nieparazumieńniaŭ u rodnym horadzie, reputacyja ŭsio ž taki, — rastłumačyŭ jon. — U škole i technikumie ja zarekamiendavaŭ siabie sa stanoŭčaha boku, a paśla hetych materyjałaŭ mnie pisali, što ja ledź nie mańjačeła i hałavarez. Pieražyvaŭ za siabie i rodnych. U mianie małodšy brat u hetaj ža škole vučycca. Mnie prychodzili pahrozy ad nieviadomych asob na telefon. U paštovuju skryniu kidali ananimki».
Hałoŭny redaktar »Našaj Nivy» ŭdakładniŭ, ci źviartaŭsia Biekiš z zajavaj u sud abo pravaachoŭnyja orhany z hetaj nahody. Amapaviec vyrazna patłumačyć nie zmoh, skazaŭ tolki, što Śledčy kamitet pravodziŭ pravierku, vinavatych znajści nie zmahli. Vyniki pravierki ŭ sudzie ahučanyja nie byli.
Uźnikła pytańnie, jak Andrej Biekiš moža abhruntavać zajaŭlenuju sumu 3000 rubloŭ. U hetyja dni prachodzić sud pa fakcie abrazy kamandzira minskaha AMAP Dźmitryja Bałaby, jon acaniŭ svaje pieražyvańni ŭ 1000 rubloŭ.
«Ja liču, što maje maralnyja pieražyvańni moža kampiensavać hetaja suma», — zajaviŭ Biekiš.
«Naša niva» nie pryznaje pazoŭ, bo ŭ siami cytatach, jakija asprečvaje amapaviec, źmiaščajecca abo dakładnaja infarmacyja (Biekiš sapraŭdy zatrymlivaŭ ludziej z užyvańniem fizičnaj siły), abo mierkavańnie adnakłaśnikaŭ, a prava na svabodu mierkavańnia harantavana Kanstytucyjaj.
Sudovaje pasiadžeńnie praciahniecca 11 śniežnia.
Ciapier čytajuć
Usie biełaruskija banki pačnuć sačyć za miescaznachodžańniem klijentaŭ? Alfa-bank užo papiaredziŭ, admovicca niemahčyma19
Usie biełaruskija banki pačnuć sačyć za miescaznachodžańniem klijentaŭ? Alfa-bank užo papiaredziŭ, admovicca niemahčyma
Kala Safii ŭ Połacku pastavili pomnik lotčykam Ničyparčyku i Kukanienku. Ale navat nie samalot toj madeli, na jakoj jany zahinuli, a aerapłan stalinskaha času2020
Kamientary