Łukašenka pryznačyŭ piać novych pasłoŭ: raskazvajem, chto heta takija
U čaćvier, 19 listapada, Alaksandr Łukašenka pryznačyŭ piać pasłoŭ. Admietna, što nivodnaje pryznačeńnie nie tyčyłasia krain Jeŭrasajuza. Novyja pradstaŭniki Biełarusi źjavilisia ŭ Kitai, Azierbajdžanie, Armienii, Pakistanie i Kienii. Chto ž hetyja ludzi?
Juryj Siańko (Kitaj)
Łukašenka ličyć Kitaj klučavym partnioram Biełarusi, ale pasada pasła była vakantnaj ad červienia. Sprava ŭ tym, što były pasoł Mikałaj Snapkoŭ nie adpracavaŭ u Piekinie i paŭhoda, jak jaho viarnuli ŭ vice-premjery ŭ Minsk. Snapkoŭ prabyŭ samy składany pieryjad, kali karanavirus jakraz uzmacniaŭsia.
Juryj Siańko da siońniašniaha dnia ŭznačalvaŭ Mytny kamitet. Na hetaj pasadzie jon prabyŭ šeść hadoŭ. Jamu 53 hady, a rodam z Daŭhinava Karelickaha rajona.
Siańko skončyŭ Hrodzienski dziaržaŭny ŭniviersitet imia Janki Kupały, fakultet pravaznaŭstva. Paśla čaho i zastaŭsia na pracy ŭ Hrodnie. Zajmaŭ roznyja pasady ŭ Hrodzienskaj rehijanalnaj mytni. U 35 hadoŭ uznačaliŭ Hrodzienskuju rehijanalnuju mytniu. U 2011 Siańko pieraviali kiraŭnikom Minskaj rehijanalnaj mytni. «Chutka, jakasna, z uśmieškaj na tvary», — takija rekamiendacyi svaim kaleham davaŭ Juryj Siańko.
Za čas pracy Siańko ŭ Hrodnie mnohija supracoŭniki mytni apynulisia ŭ turmie, ale na samim načalniku heta nijak nie adbiłasia. Siańko — ułaśnik adnaho z 113 elitnych katedžaŭ u Drazdach.
Mytnia — heta ŭsio ž nie represiŭny orhan, a struktura, jakaja zacikaŭlenaja ŭ tym, kab dziaržava zarabiła pabolej hrošaj. Usie hetyja hady Siańko zastavaŭsia nieprykmietnaj asobaj, ci źmienicca niešta ŭ Piekinie?
Nastupnik Juryja Siańko ŭ Mytnym kamitecie na dadzieny momant jašče nie pryznačany.
Andrej Raŭkoŭ (Azierbajdžan)
53-hadovy były ministr abarony i dziaržsakratar Rady biaśpieki jedzie ŭ Baku. Takoje pryznačeńnie vypadkovym nie vyhladaje. Azierbajdžan — adzin z asnoŭnych kupcoŭ biełaruskaj zbroi.
Raŭkoŭ, jak i Siańko, 53 hady. Jon naradziŭsia ŭ maleniečkaj vioscy Raviaki Biešankovickaha rajona, za dziesiać kiłamietraŭ ad radzimy kanclera VKŁ Lva Sapiehi. U 1988 hodzie Raŭkoŭ skončyŭ z załatym miedalom Maskoŭskaje vyšejšaje ahulnavajskovaje kamandnaje vučylišča. Varta adznačyć, što hetaje vučylišča raźmiaščałasia niepasredna ŭ Kramli. Kursantaŭ tamu prosta tak i nazyvali «kramloŭcy».
Karotki termin Andrej Raŭkoŭ byŭ kamandziram 103-j asobnaj hvardziejskaj mabilnaj bryhady. Heta elitnaja častka desantnikaŭ. A potym pierajšoŭ u štab Zachodniaha apieratyŭnaha kamandavańnia z centram u Barysavie, jaki ŭ vyniku i ŭznačaliŭ.
Pry Raŭkovie ŭ vojsku byŭ hučnym vypadak z zabojstvam ci daviadzieńniem da samazabojstva šarahoŭca Alaksandra Koržyča ŭ Piečach. A jašče Minabarony byŭ raspracavany «zakon ab adterminoŭkach», jaki adbivaŭsia na mnohich studentach. Zamiest vučoby jany pavinny byli trapić «u boty».
Za čas pracy na pasadzie dziaržsakratara Rady biaśpieki Raŭkoŭ najbolš zapomniŭsia zatrymanymi pierad vybarami «vahnieraŭcami». Bajevikami ČVK pałochali na ŭsich dziaržaŭnych kanałach, a ŭ vyniku ich prosta addali nazad Rasii. Voś i ŭsia pahroza. U pieršyja dni paśla vybaraŭ u fejsbuku Raŭkoŭ pisaŭ, kali ŭsie zabastujuć, to chutka my adzin adnaho jeści pačniom. A 4 vieraśnia jaho vyzvalili z pasady, na jakoj hienierał nie prabyŭ i hoda.
Alaksandr Kaniuk (Armienija)
U Jerevan nie ŭpieršyniu adpraŭlajuć siłavika na źlocie karjery. U 2008 u hetym ža kirunku palacieŭ były staršynia KDB Ściapan Sucharenka. Kaniuk ža da vieraśnia ŭznačalvaŭ hienieralnuju prakuraturu.
Kaniuk naradziŭsia ŭ 1960 u Hrodnie. Skončyŭ BDU (1982). Paśla pastupiŭ u rasparadžeńnie kamandzira vajskovaj čaści ŭ Barysavie. Dva hady byŭ kamandziram uzvoda. Ad 1993 — sudździa Biełaruskaha vajskovaha suda. Ad 1997 — sudździa i staršynia Minskaha mižharnizonnaha vajskovaha suda. Ad 2006 — sudździa i staršynia Biełaruskaha vajskovaha suda. Ad 2009 hoda — namieśnik staršyni, staršynia vajskovaj kalehii Viarchoŭnaha Suda. Ad vieraśnia 2011 — hienieralny prakuror.
U hetaha hienierała niaprosty asabisty los. Piatnaccać hadoŭ tamu ŭ jaho zahinuŭ 19-hadovy syn, jaki syšoŭ z domu praz kanflikt z baćkam z-za kampjutara. Mahčyma, mienavita hetaja padzieja nakłała adbitak sumny na tvar siłavika. Druhi syn Kaniuka byŭ supracoŭnikam IT-kampanii PandaDoc, jakuju paśla vybaraŭ razhramili za pazicyju ŭłaśnika Mikity Mikada. Adzin z supracoŭnikaŭ «Pandy» ŭsio jašče znachodzicca ŭ źniavoleńni.
Na dumku mnohich, Kaniuk nie demanstravaŭ asablivaha zapału ŭ padziejach, što adbyvalisia paśla 9 žniŭnia, pry hetym zastajučysia čałaviekam sistemy, praz što jaho i pamianiali na Andreja Švieda.
Andrej Miacielica (Pakistan)
Adno z takich pasolstvaŭ, pra isnavańnie jakich uvohule nie zdahadvaješsia. Da hetaha času Miacielica pracavaŭ načalnikam hałoŭnaha dahavorna-pravavoha ŭpraŭleńnia MZS. Rodam Miacielica z Kruhłaha, što na Mahiloŭščynie. Letaś jamu byŭ nadadzieny ranh nadzvyčajnaha i paŭnamocnaha pasła druhoha kłasa.
Pavieł Uziatkin (Kienija)
Da niadaŭniaha času hetaje pasolstva raźmiaščałasia ŭ Efiopii, ale potym było pryniataje rašeńnie pierajechać u Najrobi. Uziatkin źjaŭlajecca namieśnikam dyrektara departamienta źniešnieekanamičnaj dziejnaści MZS. Byŭ načalnikam adździeła sadziejničańnia ekspartu. U toj čas, jak mnohija rabotniki syšli z MZS paśla vybaraŭ, Uziatkin praciahnuŭ pracu ŭ viedamstvie.
Muzyka Cim Suładze: Roźnica 30 hadoŭ — toje, što adpaviadaje maim ujaŭleńniam pra adnosiny41
Kamientary