Ciamju pratestoŭcaŭ z Bresta vyklikali ŭ kamisiju pa spravach niepaŭnaletnich
Palinu Šarendu-Panasiuk, žonku palitviaźnia, aktyvista «Jeŭrapiejskaj Biełarusi» Andreja Šarendy, kamisija pa spravach niepaŭnaletnich papiaredziła ab niedapuščeńni brać z saboj na mirnyja akcyi pratestu dziaciej, piša Radyjo Svaboda.
U siamji bieraściejskich aktyvistaŭ Andreja i Paliny Šarendaŭ dva syny: 11 i 4 hady. Palina daŭno pracuje repetytarkaj, maje stabilny zarobak, spraŭna płacić padatki.
Baćku — 2 razy pa 15 sutak, maci — štraf 20 bazavych
Andreja i Palinu Šarendaŭ zatrymali padčas «Maršu spraviadlivaści» 6 vieraśnia. Palina z małodšym synam praviali 6 hadzin u pastarunku. Dzicia zabrali svajaki, a Palinu pakinuli načavać u izalatary. Ranicaj byŭ sud, žančynie pryznačyli štraf — 20 bazavych vieličyniaŭ.
Andreja Šarendu za ŭdzieł u hetym maršy asudzili na 15 sutak, a 21 vieraśnia paŭtorna dali 15 sutak. Uvieś hety čas jaho trymajuć u IČU Bieraścia. Pavinien vyjści na volu 5 kastryčnika.
1 kastryčnika Palinu razam z synam vyklikali ŭ kamisiju ŭ spravach niepaŭnaletnich. Padtrymać Palinu ŭ administracyju Maskoŭskaha rajonu Bieraścia pryjšli bolš za 100 čałaviek.
«My zaniali ćviorduju pazycyju — damahlisia, kab nas ŭsich puścili ŭ budynak i kab uvieś hety «cyrk» adbyvaŭsia pry adčynienych dźviarach. Kožny siabar kamisii vymušany nazvać svajo proźvišča, pasadu. Ludzi ŭsio heta bačyli, prysutničali žurnalisty. Jak u narmalnaj krainie, usie bačyli, praces byŭ hałosny.
Siabry kamisii sprabavali čytać natacyi, što vyjści ź dziciem na vulicu — heta ledźvie nie patalohija. Maŭlaŭ, dziaciej brać z saboj nielha, heta pryraŭnoŭvajecca da pjanstva, alkahalizmu.
Ja dumaju, što heta pad uražańniem ad takoj kolkaści ludziej abmiežavalisia tolki papiaredžańniem», — raskazała Svabodzie Palina paśla pasiedžańnia kamisii ŭ spravach niepaŭnaletnich.
«Ja razumieju, što papiaredžańnie — heta pieršy krok, dalej buduć pahražać statusam SNS»
Žančyna kaža, što marš byŭ całkam mirny, było šmat ludziej ź dziećmi roznaha ŭzrostu i navat u vazkach. Ludzi išli z kvietkami, a na ich nalacieli bajcy AMAPu z aŭtamatami, adsiekli hałavu kalony, zablakavali, šmat narodu zatrymali. Napałochali pry hetym dziaciej.
«Mienavita supracoŭniki siłavych struktur na mirnych akcyjach stvarajuć niebiaśpieku, a nia ŭdzielniki. Jany nie zadumvajucca, kali zatrymlivajuć ludziej, što pałochajuć dziaciej, što dzieci mohuć zastacca biez nahladu.
Ja razumieju, što hetaje papiaredžańnie — pieršy krok, dalej buduć pahražać statusam SNS. Kali mianie zatrymajuć jašče raz, budzie stajać pytańnie ab nadańni dzieciam statusu, što jany znachodziacca ŭ sacyjalna niebiaśpiečnym stanoviščy. Kali sprabujuć cisnuć praź dziaciej, heta vielmi nizka», — ličyć Palina Šarenda.
Žančyna vykazvaje vialikuju padziaku ŭsim, chto jaje padtrymaŭ, pryjšoŭ na pasiedžańnie kamisii, prosta patelefanavaŭ.
Kamientary