Cichanoŭskaja stvaraje Kaardynacyjnuju radu dla zabieśpiačeńnia mirnaha pierachodu ŭłady

Śviatłana Cichanoŭskaja źviarnułasia sa zvarotam.

«Dobry dzień, siabry.

Moj štab, štab Śviatłany Cichanoŭskaj, praciahvaje pracavać. Kiraŭnikom štaba pa-raniejšamu zastajecca Maryja Maroz. Jana znachodzicca sa mnoj i praciahvaje kiravać štabam. Ja paćviardžaju paŭnamoctvy Volhi Kavalkovaj i Mikałaja Kazłova jak maich davieranych asob, jakija buduć kaardynavać dziejańnie majho štaba ŭ Biełarusi.

Ja zajaŭlaju, što my hatovyja da dyjałohu z uładami.

Z ulikam taho, što adbyvajecca ŭ krainie i nieabchodnaści pryniaćcia nieadkładnych mier dla adnaŭleńnia zakonnaści ŭ Biełarusi, Ja, Śviatłana Cichanoŭskaja, inicyjuju stvareńnie Kaardynacyjnaj rady dla zabieśpiačeńnia tranśfieru ŭłady. U hetu radu mohuć uvajści pradstaŭniki hramadzianskaj supolnaści, pavažanyja i viadomyja biełarusy, prafiesijanały svajoj spravy. Ja daručaju svajoj davieranaj asobie Volzie Kavalkovaj i advakata Maksima Znaka prymać zajaŭki ab vyłučeńni členaŭ savieta ad arhanizacyj i abjadnańniaŭ hramadzian.

Dziakuj usim ludziam, usim arhanizacyjam, jakija padtrymali mianie i hatovyja dapamahčy ŭ pieramoŭnym pracesie.

Ja prašu vas abjadnacca ŭ kaardynacyjnuju radu.

Nam vielmi patrebna vaša dapamoha i vopyt. Nam patrebnyja vašy suviazi, kantakty, ekśpiertnyja parady i padtrymka. U hety kaardynacyjny saviet pavinny ŭvajści ŭsie, chto zacikaŭleny ŭ dyjałohu i mirnaj pieradačy ŭłady — pracoŭnyja kalektyvy, partyi, prafsajuzy i inšyja arhanizacyi hramadzianskaj supolnaści.

Ja źviartajusia da mižnarodnaj supolnaści, jeŭrapiejskich krain z prośbaj dapamahčy nam u arhanizacyi dyjałohu ź biełaruskimi ŭładami.

Ja zachaplajusia biełarusami. Dziakuj, maje darahija! My zrabili niemahčymaje. My pakazali, što nas bolšaść. I hetaja kraina naležyć nam, narodu Biełarusi, a nie adnamu čałavieku.

Ja vykazvaju spačuvańnie kožnamu paciarpiełamu ŭ hetyja dni, kožnaj siamji. Mnie było vielmi ciažka hladzieć na toj hvałt, u jaki ŭłada pahruziła našy harady za apošni tydzień. Hetaha nikoli nie pavinna paŭtarycca.

Ułada pavinna pakazać hatoŭnaść da dyjałohu z narodam.

Heta značyć, adpuścić usich zatrymanych.

Heta značyć, prybrać z vulic haradoŭ AMAP i vojski.

Heta značyć, zavieści kryminalnuju spravu suprać tych, chto addavaŭ złačynnyja zahady źbivać i stralać u ludziej.

Ja źviartajusia da meraŭ haradoŭ. Vyjdzicie i pačnicie razmaŭlać, słuchać ludziej. Heta ŭ vašych kampietencyjach arhanizavać zakonnyja i mirnyja mitynhi na płoščach haradoŭ.

Ja źviartajusia da supracoŭnikaŭ milicyi, armii i inšych siłavikoŭ. Nie vykonvajcie złačynnych zahadaŭ. Pahavarycie z vašym načalstvam, spynicie krovapralićcie. Vy davali prysiahu słužyć Respublicy Biełaruś i svajmu narodu. My, ludzi, budziem udziačnyja kožnamu, chto stanie na bok naroda».

• 0
• 0
• 0
• 0
• 0
• 0
• 0
• 0