«Spačatku mnie było strašna. Ale ciapier ja nie bajusia». Cichanoŭskaja vystupiła na BT VIDEA

Śviatłana Cichanoŭskaja ŭsprymałasia jak techničny kandydat, prosty simvał žadańnia pieramien, a nie palityk. Ale niečakana jaje pieršaja pramova na telebačańni była mocnaja: biez falšu i słabinak.

Apytanka

Voś asnoŭnyja punkty jaje vystupu.

«Moj muž Siarhiej Cichanoŭski znachodzicca ŭ SIZA, bo chacieŭ lepšaha žyćcia dla biełarusaŭ. Maje dzieci štodzień pytajucca, kali vierniecca tata. Ja chaču stać prezidentam, kab adnavić spraviadlivaść u hetaj krainie».

«Kali moj muž vyrašyŭ pajści na prezidenckija vybary, va ŭsich haradach stali vyciahvacca čerhi, kab padpisacca za jaho».

«Ułady nie zarehistravali majho muža, a taksama Viktara Babaryku i Valeryja Capkału, a zarehistravali mianie. Čamu? Tamu što jany bačać u hetych mužčynach pahrozu. Tolki jany nie zrazumieli, što pahroza dla ŭłady — heta nie kandydaty, a narod, jakomu nadakučyła žyć u prynižeńni i niesvabodzie».

«Moj muž Siarhiej Cichanoŭski razam ź inšymi kandydatami abudziŭ biełarusaŭ, jakija ŭžo nie viernucca ŭ zručny dla ŭrada sonny stan».

«Ja nie budu ničoha abiacać. Dla hetaha jość inšyja ludzi, jakija ŭžo 26 hadoŭ razdajuć pustyja abiacańni: pra hodnuju piensiju, zarpłatu papiccot, hodnuju achovu zdaroŭja».

«Pa televizary vam nie raskažuć, što ŭ dziejnaha prezidenta vielmi nizki rejtynh, što jaho padtrymlivaje vielmi mała ludziej, ale heta praŭda».

«Pa televizary vam nie pakažuć, što pa ŭsioj krainie vyciahvajucca kiłamietrovyja čerhi ludziej, jakija patrabujuć, kab Siarhieja Cichanoŭskaha, Viktara Babaryku i inšych palityčnych źniavolenych vypuścili z turmaŭ, ale heta praŭda».

«Pa televizary vam nie pakažuć, što ludzi, jakich chapaje AMAP, prosta mirna hulali pa vulicy i nie rabili ničoha kiepskaha, ale heta praŭda».

«Pa televizary vam nie pakažuć, što absalutnaja bolšaść suprać ciapierašniaj ułady i choča novaha prezidenta, ale heta praŭda».

«Pa televizary vam nie pakažuć, što biełarusy molać nastaŭnikaŭ i ŭsich, kaho prymušajuć padrablać padlik hałasoŭ, nie pahadžacca na hetaje złačynstva, i heta praŭda».

«Pa televizary vam nie pakažuć, što ad karanavirusa pamierła našmat bolš ludziej, čym kaža Minzdaroŭja».

«Pa televizary vam nie pakažuć, što daktaram nie chapała masak».

«Pa televizary vam nie pakažuć, u jakoj halečy žyvie bolšaja častka nasielnictva».

«Pa televizary vam nie pakažuć, što alternatyŭnych kandydataŭ pasadzili tamu, što za ich była bolšaść».

«Televizar naležyć tolki adnamu čałavieku».

«Ja pryjšła ŭ palityku nie dziela ŭłady, a dziela spraviadlivaści. Maja hałoŭnaja meta — arhanizavać sumlennyja vybary z udziełam usich alternatyŭnych kandydataŭ. Hałasujučy za mianie, vy hałasujecie za novyja spraviadlivyja i sumlennyja vybary».

«Ja pryniała padtrymku kamand Babaryki i Capkały. Z nami supracoŭničajuć najlepšyja ekśpierty, partyi».

«Pieršaje, što nam treba zrabić ciapier, — stać niezaležnymi naziralnikami».

«Nijakaha daterminovaha hałasavańnia!»

«Treba prahałasavać za mianie, Śviatłanu Cichanoŭskuju, i abaraniać svoj hołas».

«Ułada pavinna zrazumieć, što nas absalutnaja bolšaść».

«Treba sabrać rekordnuju kolkaść naziralnikaŭ». Jana zaklikała «padtrymać inicyjatyvy «Sumlennyja ludzi», «Prava vybaru», «Ruch praŭda», «Zubr».

«Čym bolšaja jaŭka, tym ciažej skraści naš hołas. Čym bolšaja jaŭka, tym bolš vidavočnaj budzie falsifikacyja».

«Paśla taho jak my atrymajem vidavočnyja dla ŭsioj krainy realnyja vyniki vybaraŭ 9 žniŭnia, vybar naroda pavinny buduć pavažać usie. Inakš nam daviadziecca abaraniać svaje hałasy».

«Vybary 9 žniŭnia nie buduć svabodnymi i sumlennymi. Ni adnaho z mocnych lidaraŭ nie zarehistravali ŭ jakaści kandydata ŭ prezidenty, u śmietnicu vykinuli sotni tysiač podpisaŭ. Nam patrebnyja novyja sumlennyja vybary z prazrystym padlikam hałasoŭ».

«Treba źmianić sistemu, kab usia ŭłada nie była ŭ rukach adnaho čałavieka».

«Paśla ŭstupleńnia na pasadu prezidenta ja prymu miery dla zachavańnia stabilnaści i praviadzieńnia sumlennych vybaraŭ. Usie nieabchodnyja dziejańni buduć zroblenyja na praciahu paŭhoda. Vy tolki padumajcie: upieršyniu za 20 hadoŭ u nas stolki sił, što my možam pieramahčy».

«My budujem krainu nie tolki dla siabie, ale i dla našych dziaciej. Kab dzieci zastalisia žyć tut, na svajoj ziamli, a nie chacieli źjechać u pošukach lepšaha žyćcia. Kab my adčuvali pavahu. Ja chaču, kab syšła ŭ minułaje podłaja tradycyja pieraśledavać ludziej za praŭdu».

«Razam my zmožam stvaryć bahatuju, biaśpiečnuju, raźvituju krainu».

«Ja lublu svajho muža. Tamu ja praciahnuła jaho spravu. Ja lublu svaich dziaciej, tamu ja chaču, kab jany raśli ŭ krainie, dzie nie zatykajuć ratoŭ. Ja lublu biełarusaŭ, tamu chaču dać im mahčymaść vybirać».

«Tak, spačatku mnie było strašna. Ja viedaju, da jakoha dna moža dajści ŭłada, sprabujučy ratavać svajo kresła. Ale ciapier ja nie bajusia. Ciapier ja adčuvaju vašu padtrymku i vašu siłu. Moj abaviazak — być tut, na hetym miescy, moj abaviazak — zrabić našu krainu svabodnaj».

«Ni ŭ jakim razie nie hałasujcie daterminova».

«Ja prosty čałaviek, prostaja biełaruska, žančyna, maci, jakaja choča i moža zrabić naša žyćcio takim, jakoje my zasłuhoŭvajem. Dyk davajcie razam zbudujem krainu dla žyćcia».

• 0
• 0
• 0
• 0
• 0
• 0
• 0
• 0