Babaryka zatrymany. «Z-za sproby ŭździejańnia na śviedak i ŭtojvańnia dokazaŭ złačynstva»
Babaryka zatrymany z-za sproby ŭździejańnia na śviedak i ŭtojvańnia dokazaŭ złačynstva, paviedamlaje Dziaržkantrol.
U vypusku navin na BT paviedamili, što Babaryka nibyta byŭ arhanizataram złačynnaj schiemy, zatrymana 20 čałaviek, jany dajuć pakazańni.
— Babaryka zatrymany ŭ suviazi z tym, što źjaŭlaŭsia niepasrednym arhanizataram supraćpraŭnaj dziejnaści, sprabavaŭ uździejničać na śviedkaŭ, utaić ślady raniej učynienych złačynstvaŭ i litaralna na dniach źniać bujnuju sumu hrošaj z padkantrolnych jamu rachunkaŭ, — skazaŭ kiraŭnik KDK Ivan Cierciel u efiry BT.
Cierciel zajaviŭ, što bolš za $430 młn niezakonna vyviedzienyja z rachunku Biełhazprambanka ŭ bank u Łatvii za niekalki hadoŭ.
— My ŭstanavili «admyvačnyja» schiemy, pa jakich ažyćciaŭlaŭsia vyvad u zamiežnyja banki vialikich sum valuty na padkantrolnyja struktury, — zajaviŭ Cierciel.
— Pavodle danych, jakija my atrymali ad našych łatvijskich kaleh, za niekalki hadoŭ u intaresach hetaha banka [ABLV] na jaho rachunki z rachunkaŭ Biełhazprambanka było vyviedziena bolš za 430 młn dalaraŭ ZŠA, — raspavioŭ staršynia KDK.
Jon dadaŭ, što zadakumientavanyja šmatlikija fakty atrymańnia chabaru słužbovymi asobami banka za davańnie kredytaŭ pradprymalnikam i asobam «z drennaj kredytnaj historyjaj».
Paviedamlajecca, što biełaruskija pravaachoŭniki ciapier supracoŭničajuć z kalehami z 18 krain, nakiravanyja adpaviednyja zapyty, u tym liku i ŭ ZŠA.
U apošni tydzień Alaksandr Łukašenka abrynuŭsia na Babaryku z pahrozami i abvinavačvańniami, nie nazyvajučy jaho, ale jasna ŭkazvajučy, pra kaho havorka. Heta adbyłosia paśla taho, jak stała jasna, što mienavita Babaryka nabiraje rekordnuju kolkaść podpisaŭ vybarcaŭ.
Adnačasova z napadkami Alaksandra Łukašenki ad 11 červienia ŭ kampanijach, źviazanych ź siabrami Babaryki, prajšli pieratrusy i zatrymańni.
«Rubikon piarojdzieny», — skazaŭ u suviazi z hetym Viktar Babaryka.
18 červienia suviaź ź Viktaram Babarykam i jahonym synam Eduardam, jaki ŭznačalvaje jaho inicyjatyŭnuju hrupu, źnikła. Jak miarkujecca, jany znachodziacca ŭ Departamiencie finansavych rasśledavańniaŭ Kamiteta dziaržaŭnaha kantrolu. Viadoma, što ŭ domie Babaryki ŭ Łahojskim rajonie pravodzicca pieratrus.
Čytajcie taksama: 425 001. Sumnaja historyja pra toje, što značyć heta adzinka
Pieraśled kaleh Viktara Babaryki pačaŭsia, kali stała viadoma, što jaho inicyjatyŭnaja hrupa sabrała rekordnuju dla alternatyŭnaha kandydata kolkaść podpisaŭ — 425 001 pa stanie na siońnia.
Raniej maksimum — 217 tysiač — sabraŭ u 1994-m, jašče na svabodnych vybarach, Zianon Paźniak. U Alaksandra Milinkieviča ŭ 2006-m było 198 tysiač. U Siamiona Domaša ŭ 2001-m — 164 tysiačy.
Čytajcie: Kolki podpisaŭ źbirali demakratyčnyja kandydaty na prezidenckich vybarach? TABLICA
Taksama i šerah apytańniaŭ pakazaŭ, što mienavita Viktar Babaryka moh by stać favarytam sumlennych vybaraŭ.
Babaryka sprabuje vybudavać šyrokuju antyłukašenkaŭskuju kaalicyju z udziełam samych roznych siłaŭ. Jaho kandydaturu padtrymała taksama nobieleŭskaja łaŭreatka Śviatłana Aleksijevič.
Čytajcie taksama: Babaryka zapisaŭ videazvaroty na vypadak svajho zatrymańnia
Ciapier čytajuć
Pavietranaja himnastka pakazała zakuliśsie pracy ŭ Biełdziaržcyrku7
Kamientary